തിരുവനന്തപുരം: ആധുനിക കാലഘട്ടത്തിലെ സാങ്കേതിക മുന്നേറ്റങ്ങൾ ഉൾക്കൊണ്ടും രാജ്യാന്തര തൊഴിൽ സാധ്യതകൾക്കനുസരിച്ചും എഞ്ചിനീയറിങ് വിദ്യാഭ്യാസമേഖലയിൽ സമഗ്രമായ മാറ്റങ്ങൾക്ക് കേരളം പ്രതിജ്ഞാബദ്ധമാണെന്ന് എ.പി.ജെ. അബ്ദുൾകലാം സാങ്കേതിക സർവ്വകലാശാല വൈസ്ചാൻസിലർ ഡോ. എം. എസ്. രാജശ്രീ പറഞ്ഞു.
കേരള കാത്തലിക് എഞ്ചിനീയറിങ് കോളജ് മാനേജ്മെന്റ്സ് അസോസിയേഷൻ സാങ്കേതിക വിദ്യാഭ്യാസം-സാധ്യതകൾ പ്രതിസന്ധികൾ ഭാവിപ്രതീക്ഷകൾ വെബിനാർ ഉദ്ഘാടനം ചെയ്തു സംസാരിക്കുകയായിരുന്നു ഡോ. എം. എസ്. രാജശ്രീ. ഇതരസംസ്ഥാനങ്ങളിൽ നിന്നും വിദേശരാജ്യങ്ങളിൽ നിന്നും ഉന്നതവിദ്യാഭ്യാസത്തിനായി കേരളത്തിൽ വിദ്യാർത്ഥികൾ എത്തിച്ചേരണം. ഇതിന് കൂടുതൽ അനുകൂല സാഹചര്യങ്ങൾ സൃഷ്ടിക്കപ്പെടും. തൊഴിൽ മേഖലകളിലെ ആവശ്യകതയും ലക്ഷ്യമാക്കിയുള്ള സിലബസ് പരിഷ്‌ക്കരണങ്ങൾ അനിവാര്യമാണെന്നും വൈസ്ചാൻസിലർ കൂട്ടിച്ചേർത്തു.
കാത്തലിക് എഞ്ചിനീയറിങ് കോളജ് മാനേജ്മെന്റ്സ് അസോസിയേഷൻ പ്രസിഡന്റ് റവ.ഡോ.മാത്യു പായിക്കാട്ട് അധ്യക്ഷത വഹിച്ചു. സിൻഡിക്കേറ്റ് അംഗം ഡോ.പി.കെ.ബിജു എക്സ് എംപി. മുഖ്യപ്രഭാഷണം നടത്തി. അസോസിയേഷൻ സെക്രട്ടറി റവ.ഡോ.ജോസ് കുറിയേടത്ത്, എക്സിക്യൂട്ടീവ് സെക്രട്ടറി ഷെവലിയാർ അഡ്വ.വി സി,സെബാസ്റ്റ്യൻ എന്നിവർ പ്രസംഗിച്ചു.
വിവിധ കാത്തലിക് എഞ്ചിനീയറിങ് കോളജുകളെ പ്രതിനിധീകരിച്ച് എഞ്ചിനീയറിങ് വിദ്യാഭ്യാസ മേഖലയിലെ വിദഗ്ദ്ധരും പ്രഗത്ഭരുമായ ഡോ. നിക്സൺ കുരുവിള, ഡോ. കെ. കെ. രാജൻ, ഡോ. സജീവ് ജോൺ, ഡോ. ലില്ലിക്കുട്ടി ജേക്കബ്, പ്രൊ. പോൾ ആൻസെൽ വി., ഡോ. ബേഷിബ വിൽസൺ, ഡോ. എ. സാംസൺ, ഡോ. എബ്രാഹം ടി മാത്യു, റവ. ഡോ. ജോസ് കണ്ണമ്പുഴ, ഡോ. വി. പി. ദേവസ്യാ, ഡോ. പോൾ കെ. മാത്യു, ഡോ. ജോബിൻ കെ. ആന്റണി എന്നിവർ ആധുനിക കാലഘട്ടങ്ങളിലെ മാറ്റങ്ങൾക്കനുസരിച്ച് കേരളത്തിന്റെ സാങ്കേതിക വിദ്യാഭ്യാസമേഖലയിൽ നടപ്പിലാക്കേണ്ട അടിയന്തര പരിഷ്‌കാരങ്ങളെക്കുറിച്ചും ദേശീയ രാജ്യാന്തര സാധ്യതകളെക്കുറിച്ചുമുള്ള പ്രതികരണങ്ങൾ പങ്കുവെച്ചു.
വെബിനാറിന്റെയും വിവിധ ചർച്ചകളുടെയും അടിസ്ഥാനത്തിൽ ഉന്നതവിദ്യാഭ്യാസ മേഖലയിലും, പ്രത്യേകിച്ച് എഞ്ചിനീയറിങ് പഠനരംഗത്തും കേരളം വരുത്തേണ്ട പരിഷ്‌കാരങ്ങളും മാറ്റങ്ങളും നിർദ്ദേശിക്കുന്ന വിശദമായ പഠനറിപ്പോർട്ട് സംസ്ഥാന സർക്കാരിന് കേരള കാത്തലിക് എഞ്ചിനീയറിങ് കോളജ് മാനേജ്മെന്റ്സ് അസോസിയേഷൻ സമർപ്പിക്കുമെന്ന് എക്സിക്യൂട്ടിവ് സെക്രട്ടറി ഷെവലിയർ അഡ്വ.വി സി,സെബാസ്റ്റ്യൻ പറഞ്ഞു.
