മലപ്പുറം: ഒരു ദിവസത്തെ രാത്രി കാല പരിശോധനയിൽ മലപ്പുറത്ത് 30 പിടികിട്ടാപുള്ളികൾ പിടിയിൽ.വർദ്ധിച്ചുവരുന്ന കുറ്റകൃത്യങ്ങൾ തടയുന്നതിനായി മലപ്പുറം ജില്ല പൊലീസ് മേധാവി സുജിത് ദാസിന്റെ നിർദ്ദേശ പ്രകാരം ജില്ലയിലെ മുഴുവൻ പൊലീസ് ഉദ്വോഗസ്ഥരും ഏഴിന് രാത്രി 11.00 മണി മുതൽ എട്ടിനു രാവിലെ 06.00 മണിവരെ ജില്ലയിൽ രാത്രികാല പ്രത്യേക പരിശോധന നടത്തിയതോടെയാണ് മലപ്പുറം ജില്ലയിലെ മുഴുവൻ പൊലീസ് സ്റ്റേഷനുകളിലും നടത്തിയ രാത്രികാല പ്രത്യേക പരിശോധനയിൽ ആകെ 207 കേസുകൾ രജിസ്റ്റർ ചെയ്തത്.

ജില്ലാ പൊലീസ് മേധാവിയുടെ നിർദ്ദേശ പ്രകാരം മലപ്പുറം, പെരിന്തൽമണ്ണ, നിലമ്പൂർ, കൊണ്ടോട്ടി, തിരൂർ, താനൂർ ഡി വൈ എസ് പി മാരുടെ നേതൃത്വത്തിൽ ജില്ലയിൽ നടത്തിയ രാത്രികാല പരിശോധനയിൽ വിവിധ പൊലീസ് സ്റ്റേഷനുകളിൽ നിരവധി കേസുകളിൽ പ്രതിയായിട്ട് കോടതിയിൽ നിന്ന് ജാമ്യം എടുത്ത് ഒളിവിൽ കഴിഞ്ഞ് വരികയായിരുന്ന പിടിക്കിട്ടാപുള്ളികളായ 30 ഓളം പേരെ ജില്ലയിലെ വിവിധ ഇടങ്ങളിൽ നിന്ന് പൊലീസ് പിടികൂടുകയും, നോൺ ബെയിലബിൾ വാറന്റുള്ള 87 പേരെയും, മറ്റ് വിവിധ ക്രൈം കേസുകളുമായി ബന്ധപ്പെട്ട് 51 പേരെയും രാത്രി കാല പരിശോധനയിൽ പിടികൂടി.

കൂടാതെ യുവതലമുറയെ വഴിതെറ്റിക്കുന്ന മയക്ക് മരുന്ന്, കഞ്ചാവ്, നിരോധിത പുകയില വിൽപ്പന ചില്ലറ വിൽപ്പന നടത്തുന്നവരെയും വിവിധ ഇടങ്ങളിൽ നിന്ന് പിടികൂടുകയും ആയതുമായി ബന്ധപ്പെട്ട് 38 കേസുകൾ ജില്ലയിൽ രജിസ്റ്റർ ചെയ്യുകയും കൂടാതെ അബ്ക്കാരി ആക്ട് പ്രകാരം വരുന്ന 48 കേസ്സുകളും, ഗതാഗത നിയമ ലംഘനങ്ങളുമായി ബന്ധപ്പെട്ടും മറ്റും വിവിധ വകുപ്പുകളിലായി 121 കേസ്സുകളും രാത്രികാല പ്രത്യേക പരിശോധനയുടെ ഭാഗമായി രജിസ്റ്റർ ചെയ്തിട്ടുള്ളതുമാണ്.

പരിശോധനയുടെ ഭാഗമായി ജില്ലയിലൂടെ ദീർഘദൂര സർവ്വീസ് നടത്തുന്ന സർവ്വീസ് ബസുകൾ ഉൾപ്പെടെയുള്ള 4002 വാഹനങ്ങൾ പരിശോധിക്കുകയും, 165 ലോഡ്ജുകൾ ചെക്ക് ചെയ്യുകയും ചെയ്തു. വരും ദിവസങ്ങളിലും കർശനമായ രാത്രികാല പരിശോധന തുടരുമെന്ന് ജില്ലാ പൊലീസ് മേധാവി അറിയിച്ചു.

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍