കുവൈത്തിൽ വ്യാപക പരിശോധന; മദ്യം നിർമ്മിച്ചിരുന്ന അഞ്ച് കേന്ദ്രങ്ങൾ കണ്ടെത്തി

കുവൈത്ത് സിറ്റി: കുവൈത്തിന്റെ വിവിധ ഭാഗങ്ങൾ നിയമ ലംഘനങ്ങൾ കണ്ടെത്താൻ ലക്ഷ്യമിട്ട് അധികൃതർ നടത്തുന്ന പരിശോധനകൾ തുടരുന്നു. കഴിഞ്ഞ ദിവസം അഹ്മദി ഗവർണറേറ്റ് സെക്യൂരിറ്റി ഡയറക്ടറേറ്റിന്റെ നേതൃത്വത്തിൽ നടത്തിയ റെയ്ഡുകളിൽ അഞ്ച് മദ്യ നിർമ്മാണ കേന്ദ്രങ്ങൾ കണ്ടെത്തിയതായി അധികൃതർ അറിയിച്ചു.

മഹ്ബുലയിൽ നടത്തിയ പരിശോധനകളിലാണ് മദ്യം നിർമ്മിച്ച് കുപ്പികളിലാക്കി വിൽപന നടത്തുന്ന കേന്ദ്രങ്ങൾ കണ്ടെത്തിയത്. മദ്യ വിൽപനയ്ക്ക് ഉപയോഗിച്ചിരുന്ന രണ്ട് വാഹനങ്ങളും പിടിച്ചെടുത്തു. അനധികൃതമായി തെരുവുകളിൽ കച്ചവടം നടത്തിയ 13 പേരെയും പരിശോധനകളിൽ അറസ്റ്റ് ചെയ്തു.

താമസ നിയമങ്ങൾ ലംഘിച്ച് രാജ്യത്ത് കഴിഞ്ഞുവന്നിരുന്ന നാല് പേരും തിരിച്ചറിയൽ രേഖകളൊന്നും കൈവശമില്ലാതിരുന്ന ആറ് പേരും പിടിയിലായി.

ഭക്ഷണം വിതരണം ചെയ്തിരുന്ന വാഹനങ്ങളും കഴിഞ്ഞ ദിവസം അധികൃതർ പരിശോധിച്ചു. നിയമ ലംഘനങ്ങൾ കണ്ടെത്തിയ 16 ഫുഡ് ഡെലിവറി വാഹനങ്ങൾക്കെതിരെ നിയമ നടപടികൾ സ്വീകരിച്ചതായും കുവൈത്തിലെ പ്രാദേശിക മാധ്യമങ്ങൾ പുറത്തുവിട്ട റിപ്പോർട്ടുകൾ വ്യക്തമാക്കുന്നു.