ഖത്തറിൽ ഈ ആഴ്ച അവസാനം വരെ ശക്തമായ കാറ്റിന് സാധ്യതയെന്ന് മുന്നറിയിപ്പ്

ദോഹ: ഖത്തറിൽ ഞായറാഴ്ച മുതൽ ഈ ആഴ്ച അവസാനം വരെ ശക്തമായ കാറ്റിന് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ വകുപ്പിന്റെ അറിയിപ്പ്.

12 മുതൽ 22 നോട്‌സ് വരെയായിരിക്കും കാറ്റിന്റെ വേഗതയെങ്കിലും ചില സമയങ്ങളിൽ 30 നോട്‌സിലും കൂടിയ വേഗതയിൽ കാറ്റടിക്കാൻ സാധ്യതയുണ്ടെന്ന് ക്യു.എം.ഡി പുറത്തിറക്കിയ അറിയിപ്പിൽ പറയുന്നു.

രാജ്യത്ത് ഈ ദിവസങ്ങളിൽ ശക്തമായ പൊടിക്കാറ്റ് ഉണ്ടായേക്കാമെന്ന മുന്നറിയിപ്പും നൽകിയിട്ടുണ്ട്. ചില പ്രദേശങ്ങളിൽ ദൂരക്കാഴ്ച രണ്ട് കിലോമീറ്ററിൽ താഴെയായേക്കും. കാഴ്ച പൂർണമായും അസാധ്യമാവുന്ന തരത്തിലുള്ള പൊടിക്കാറ്റ് രൂപപ്പെടാനുള്ള സാധ്യതയും പ്രവചിച്ചിട്ടുണ്ട്.

കടലിൽ മൂന്ന് അടി മുതൽ എട്ട് അടി വരെ ഉയരത്തിൽ തിരമാലകളുണ്ടാകും. ഇത് പരമാവധി 10 അടി വരെ ഉയരാനും സാധ്യതയുണ്ട്. അസ്ഥിര കാലാവസ്ഥ അനുഭവപ്പെടുന്ന സമയത്ത് പൊതുജനങ്ങൾ ജാഗ്രത പാലിക്കണമെന്ന് ഖത്തർ കാലാവസ്ഥാ നിരീക്ഷണ വകുപ്പ് ആവശ്യപ്പെട്ടു. രാജ്യത്തിന്റെ വടക്ക്, പടിഞ്ഞാറൻ മേഖലകളിൽ ചെറിയ മഴ ലഭിച്ചതായും അറിയിപ്പിൽ പറയുന്നു.