ഉപഭഓക്താക്കൾക്ക് കൂടുതൽ സൗകര്യങ്ങളൊരുക്കി വാട്‌സാപ്പ് വീണ്ടും മാറുന്നു. ഒരു ഗ്രൂപ്പിൽ അംഗമാകാവുന്നവരുടെ എണ്ണം വർദ്ധിപ്പിച്ചും വേണമെങ്കിൽ ഒരു സിനിമ മുഴുവനായും ഷെയർ ചെയ്യാനുള്ള സൗകര്യമൊരുക്കിയുമാണ് വാട്‌സാപ്പിന്റെ പുതിയ മാറ്റം. മാത്രമല്ല ഗ്രൂപ്പുകളിൽ അംഗങ്ങൾ അയക്കുന്ന കുഴപ്പം പിടിച്ച സന്ദേശങ്ങൾ നീക്കം ചെയ്യാനുള്ള അധികാരം അഡ്‌മിനു നൽകിയും വാട്‌സാപ്പ് അടിമുടി മാറുകയാണ്. ഉപയോക്താക്കൾ കാലങ്ങളായി ആവശ്യപ്പെട്ടുകൊണ്ടിരിക്കുന്ന ഈ സൗകര്യങ്ങൾ വരുന്ന ആഴ്ചകളിൽ വിവിധ ഘട്ടങ്ങളിലായി ലഭ്യമാക്കും.
നിലവിൽ ഒരു ഗ്രൂപ്പിൽ 256 അംഗങ്ങളെ മാത്രമേ ഉൾക്കൊള്ളാൻ സാധിച്ചിരുന്നുള്ളു. എന്നാൽ ഇനി ഇത് 512 ആയി വർധിക്കും. ബിസിനസുകളെയും വിവിധ സ്ഥാപനങ്ങളെയും സഹായിക്കാനാണിത്. 256 പേർ എന്ന പരിധി മൂലം ഒരേ സ്ഥാപനം ഒന്നിലേറെ ഗ്രൂപ്പുകൾ സൃഷ്ടിക്കേണ്ട സ്ഥിതിയുണ്ടായിരുന്നു. ഇതി ഈ അവസ്ഥ മാറും. മാത്രമല്ല ഗ്രൂപ്പിലെ അംഗങ്ങൾ വേണ്ടാത്തതെന്തെങ്കിലും പോസ്റ്റ് ചെയ്താൽ അതു ഡിലീറ്റ് ചെയ്യാൻ അഡ്‌മിൻ അംഗത്തിന്റെ കാലുപിടിക്കേണ്ട കാര്യമില്ല. മെസേജിൽ അമർത്തിപ്പിടിച്ച് ഡിലീറ്റ് ചെയ്യാൻ സാധിക്കും.
വേണമെങ്കിൽ ഒരു സിനിമ മുഴുവനും വാട്‌സാപ്പിലൂടെ ഷെയർ ചെയ്യാമെന്നതാണ് മറ്റൊരു പ്രധാന മാറ്റം. രണ്ട് ജിബി വരെ വലുപ്പമുള്ള ഫയലുകൾ ഒറ്റത്തവണ അയയ്ക്കാനുള്ള സൗകര്യമാണ് പുതുതായി ഒരുക്കുന്നത്. നിലവിൽ 100 എംബി വരെ വലുപ്പമുള്ള ഫയലുകളാണ് അയയ്ക്കാനാവുക. പരിധി ഉയരുന്നതോടെ ഒരു സിനിമ പൂർണമായി അയയ്ക്കാനാവും. വലിയ ഫയലുകൾ ഷെയർ ചെയ്യാൻ കഴിയുന്ന ടെലിഗ്രാം മെസഞ്ചർ സിനിമ പൈറസിക്കായി ദുരുപയോഗം ചെയ്യുന്നതിനെതിരെ ശക്തമായ പ്രതിഷേധം നിലനിൽക്കെയാണ് വാട്‌സാപ്പിലെ മാറ്റം.
കൂടാതെ വോയ്‌സ് കോളിൽ ഉൾപ്പെടുത്താവുന്നവരുടെ എണ്ണവും വർദ്ധിപ്പിച്ചു. ഒരേസമയം 32 പേരെ വരെ ചേർക്കാം. ഇപ്പോൾ എട്ട് പേരെയാണു ചേർക്കാവുന്നത്. 32 പേരിൽ കൂടുതലുള്ള കോളുകൾക്ക് നിലവിലുള്ള ഗ്രൂപ്പ് കോൾ സംവിധാനം തന്നെ ഉപയോഗിക്കാം. വാട്‌സാപ് അപ്‌ഡേറ്റ് ചെയ്തിട്ടും ഈ സൗകര്യങ്ങളൊന്നും കിട്ടിയില്ലെങ്കിൽ ആശങ്കപ്പെടാനില്ല. ഏതാനും ആഴ്ചകൾക്കുള്ളിൽ ഇതൊക്കെ എല്ലാവരിലേക്കും എത്തും.
ഓരോ സന്ദേശത്തിനും ഇമോജികൾ വഴി, സന്ദേശത്തിനുള്ളിൽ തന്നെ പ്രതികരിക്കാവുന്ന 'ഇമോജി റിയാക്ഷൻസ്' ആണ് ഏറ്റവും ഒടുവിലത്തെ അപ്‌ഡേറ്റിൽ ലഭ്യമാക്കിയിട്ടുള്ള സൗകര്യം. ഇതിനു പുറമേ പുതുതായി വാട്‌സാപ് പ്രഖ്യാപിച്ചിരിക്കുന്ന അപ്‌ഡേറ്റുകൾ ഇവയാണ്.
