ഗാർലന്റ് (ഡാളസ്) : ഡാളസ് കൗണ്ടി ഗാർലന്റ് സിറ്റിയിലെ മഗ്നോളിയ ഡ്രൈവിൽ ശനിയാഴ്ച രാത്രി ഉണ്ടായ വെടിവെപ്പിൽ 2 കൗമാരപ്രായക്കാർ കൊല്ലപ്പെടുകയും രണ്ടു പേർക്ക് പരിക്കേൽക്കുകയും ചെയ്തു .
സംഭവത്തിൽ പ്രതികളെന്ന് സംശയിക്കുന്ന രണ്ടു പേരെ ഞായറാഴ്ച അറസ്റ്റ് ചെയ്തതായി പൊലീസ് അറിയിച്ചു . ജീസസ് സൽട്ടാന (21) , ക്രിസ്റ്റഫർ ടോറസ് (22) എന്നിവരാണ് കൊലപാതകക്കുറ്റം ചുമത്തി അറസ്റ്റ് ചെയ്യപ്പെട്ടവരെന്നും ഗാർലന്റ് പൊലീസ് അറിയിച്ചു .
മഗ്നോളിയയിലെ വീട്ടിൽ വച്ച് നടന്ന പാർട്ടിക്കിടയിലാണ് വെടിവെപ്പ് ഉണ്ടായത് . പാർക്ക് ചെയ്തു കിടന്നിരുന്ന കാറിന് സമീപം നടന്ന ബഹളമാണ് വെടിവെപ്പിൽ കലാശിച്ചത് . നാല് പേർക്കാണ് വെടിയേറ്റത് ഇതിൽ ഒസെ ഡാമിയൻ ഗാർഡിയ (18) സംഭവസ്ഥലത്ത് വെച്ചും 17 വയസ്സുള്ള ഒരാൾ ആശുപത്രിയിലുമാണ് മരിച്ചത് . വെടിയേറ്റ രണ്ടു പേർ ആശുപത്രിയിൽ ഗുരുതരാവസ്ഥ തരണം ചെയ്തതായും പൊലീസ് പറഞ്ഞു .
വെടിവെപ്പിന് കാരണം എന്താണെന്ന് വ്യക്തമല്ലെന്നും സംഭവത്തെക്കുറിച്ചു വിവരം ലഭിക്കുന്നവർ ഗാർലന്റ് പൊലീസിനെ 972485 4840 - ൽ ബന്ധപ്പെടണമെന്നും അധികൃതർ അഭ്യർത്ഥിച്ചിട്ടുണ്ട് .
അറസ്റ്റ് ചെയ്ത രണ്ടു പേരെയും ഗാർലന്റ് ഡിറ്റൻഷൻ സെന്ററിൽ അടച്ചു . ജാമ്യം അനുവദിക്കുന്നതിനുള്ള നടപടികൾ ആരംഭിച്ചതായും പൊലീസ് പറഞ്ഞു .
