പൊതുവിദ്യാഭ്യാസ വകുപ്പിന് കീഴിൽ കുട്ടികളിലെ പഠനവൈകല്യ നിർണയവും പരിപാലനവും, യോഗയും ജീവിത ശൈലി രോഗങ്ങളും വിഷയത്തിൽ മുഖ്യ പരിശീലകർക്കുള്ള പരിശീലനം തിരുവനന്തപുരത്ത് ആരംഭിച്ചു. പൊതു വിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി പരിശീലനം ഉദ്ഘാടനം ചെയ്തു.
യോഗയിലും, മാനേജ്‌മെന്റ് ഓഫ് ലേണിങ് ഡിസബിലിറ്റിയിലും പഠനം വിജയകരമായി പൂർത്തിയാക്കിയവരിൽ നിന്നും തെരഞ്ഞെടുത്തവർക്ക് മുഖ്യ പരിശീലകരാകാനുള്ള പരിശീലന പരിപാടിയാണ് സംസ്ഥാന സർക്കാരിന്റെ നൂറുദിന പരിപാടിയിൽ ഉൾപ്പെടുത്തിയിട്ടുള്ളത്. യോഗയിൽ 40 പേർക്കും മാനേജ്‌മെന്റ് ഓഫ് ലേണിങ് ഡിസബിലിറ്റിയിൽ 35 പേർക്കുമാണ് ഇവിടെ പരിശീലനം നൽകുന്നത്. ഈ പരിശീലനം പൂർത്തിയാക്കുന്നവരെ മുഖ്യ പരിശീലകരായി പ്രയോജനപ്പെടുത്തി ജില്ലാ അടിസ്ഥാനത്തിൽ കൂടുതൽ പേരെ കർമ്മനിരതരാക്കാനുള്ള പ്രവർത്തനങ്ങൾ യോഗ പരിശീലന പരിപാടിയുടെ തുടർ പരിപാടിയായി സംഘടിപ്പിക്കും. ജീവിത ശൈലീരോഗങ്ങളെ ചെറുത്ത് ആരോഗ്യവും ഉന്മേഷവും പ്രദാനം ചെയ്യുന്ന യോഗ ജനങ്ങളുടെ നിത്യ ജീവിതത്തിന്റെ ഭാഗമാക്കുന്നതിനുള്ള കർമ്മപദ്ധതികൾ ആസൂത്രണം ചെയ്യുന്നതാണ്.
കുട്ടികളിലെ പഠനവൈകല്യ നിർണ്ണയവും പരിപാലനവും കൈകാര്യം ചെയ്യുന്നതിന് സംസ്ഥാനത്തെ എല്ലാ പ്രൈമറി അദ്ധ്യാപകരെയും സജ്ജരാക്കുന്ന പ്രവർത്തനങ്ങളാണ് മാനേജ്‌മെന്റ് ഓഫ് ലേണിങ് ഡിസബിലിറ്റി പരിശീലന പരിപാടിയുടെ തുടർ പരിപാടിയായി സംഘടിപ്പിക്കുന്നത്. പൊതുവിദ്യാഭ്യാസ വകുപ്പിന്റെ സഹകരണത്തോടെ ഈ പ്രവർത്തനങ്ങൾ കാര്യക്ഷമമായി മുന്നോട്ട് കൊണ്ടുപോകുന്നതാണ്.
കേരള സർക്കാർ പൊതുവിദ്യാഭ്യാസ വകുപ്പിനു കീഴിൽ ഒരു സ്വയംഭരണ സ്ഥാപനമാണ് സ്റ്റേറ്റ് റിസോഴ്‌സ് സെന്റർ, കേരളം. 1978 ൽ സ്ഥാപിതമായ സ്റ്റേറ്റ് റിസോഴ്‌സ് സെന്റർ സംസ്ഥാനത്തെ അനൗപചാരിക തുടർ വിദ്യാഭ്യാസ മേഖലയിലെ ഒരു സുപ്രധാന കേന്ദ്രമായി പ്രവർത്തിച്ചുവരുന്നു. ആജീവനാന്ത വിദ്യാഭ്യാസം എന്ന കാഴ്ചപ്പാടിൽ 2017 ൽ എസ്.ആർ.സി ആരംഭിച്ച കമ്മ്യൂണിറ്റി കോളേജിനു കീഴിൽ വിവിധ വിഷയങ്ങളിൽ സർട്ടിഫിക്കറ്റ്, ഡിപ്ലോമ, അഡ്വാൻസ് ഡിപ്ലോമ പ്രോഗ്രാമുകൾ നടത്തിവരുന്നു. ജനങ്ങളുടെ അറിവും കഴിവും വർദ്ധിപ്പിക്കുന്നതിനും മനോഭാവത്തിൽ ഗണ്യമായ മാറ്റം വരുത്തുന്നതിനും ഇവ സഹായകമാണ്. 2017 ൽ ആരംഭിച്ച എസ്.ആർ.സി കമ്മ്യൂണിറ്റി കോളേജിൽ 13000 ൽ പരം പഠിതാക്കൾ ഇതിനോടകം രജിസ്റ്റർ ചെയ്തിട്ടുണ്ട്. 4000 ൽ പരം പേർ യോഗയിലും 1000 ൽ പരം പേർ മാനേജ്‌മെന്റ് ഓഫ് ലേണിങ് ഡിസബിലിറ്റിയിലും ഇതിനോടകം രജിസ്റ്റർ ചെയ്തുകഴിഞ്ഞു
