മലപ്പുറം: പോക്സോ കേസിൽ പ്രതിയായ മലപ്പുറത്തെ സിപിഎം മുൻ കൗൺസിലറും അദ്ധ്യാപകനുമായിരുന്ന കെ.വി ശശികുമാറിനെ അറസ്റ്റ് ഉടൻ അറസ്റ്റ് ചെയ്യണമെന്നാവശ്യപ്പെട്ടു മലപ്പുറത്ത് വ്യാപക പ്രതിഷേധങ്ങൾ. വിവിധ സംഘടനകളുടെ നേതൃത്വത്തിൽ പ്രതിഷേധപ്രകടനങ്ങളും ധർണയും നടത്തി. യൂത്ത് കോൺഗ്രസ്സ് മലപ്പുറം നിയോജക മണ്ഡലം കമ്മിറ്റി മലപ്പുറം പൊലീസ് സ്റ്റേഷനിലേക്ക് മാർച്ച് നടത്തി. മലപ്പുറത്ത് വിദ്യാർത്ഥിനികളെ പീഡിപ്പിച്ച അദ്ധ്യാപകനെ അറസ്റ്റ് ചെയ്യണം എന്നാവശ്യപ്പെട്ടു മുസ്ലിം യൂത്ത്ലീഗും, വനിതാ ലീഗും, ഫ്രറ്റേണിറ്റിയും ജില്ലാ ആസ്ഥാനത്ത് മാർച്ച് നടത്തി.

30 വർഷം നീണ്ട പീഡനത്തിന് ഒരു അദ്ധ്യാപകൻ തന്നെ നേതൃത്വം നൽകി എന്നുള്ളത് മനസ്സാക്ഷിയുള്ള മുഴുവൻ ആളുകളെയും ഞെട്ടിപ്പിച്ച പീഡന വാർത്തയാണ്. സംസ്ഥാനത്ത് ഭരണം നടത്തുന്ന പിണറായി വിജയന്റെ നേതൃത്വത്തിലുള്ള ഇടതുപക്ഷമുന്നണി കുട്ടികൾക്ക് പീഡനവും അതിവേഗ റെയിൽ കുറ്റികൾക്ക് സംരക്ഷണവും ഒരുക്കുന്ന വിരോധാഭാസത്തിന്റെ ഭരണകൂടമാണെന്ന് മുസ്ലിം യൂത്ത് ലീഗ് സംസ്ഥാന വൈസ് പ്രസിഡന്റും മലപ്പുറം നഗരസഭാ ചെയർമാനുമായ മുജീബ് കാടേരി പ്രസ്താവിച്ചു.

മലപ്പുറത്ത് വിദ്യാർത്ഥിനികളെ പീഡിപ്പിച്ച അദ്ധ്യാപകനെ അറസ്റ്റ് ചെയ്യണമെന്ന് ആവശ്യപ്പെട്ടുകൊണ്ട് മുനിസിപ്പൽ മുസ്ലിം യൂത്ത് ലീഗ് നടത്തിയ പ്രതിഷേധ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സുദീർഘമായ 30 വർഷം ഒരു അദ്ധ്യാപകൻ തന്നെ തന്റെ വിദ്യാർത്ഥിനികളെ പീഡിപ്പിച്ചു എന്ന വാർത്ത മലയാളി മനസാക്ഷിയെ ഞെട്ടിപ്പിച്ചിരിക്കുകയാണ്.

പ്രമാദമായ കൊലപാതകങ്ങളിലെ പ്രതികളെ പോലും മണിക്കൂറുകൾക്കകം പിടിക്കുന്നതിന് നേതൃത്വം നൽകിയ സംസ്ഥാന പൊലീസിന് ഒരധ്യാപകനെ അറസ്റ്റ് ചെയ്യാൻ ആവുന്നില്ല എന്നുള്ളത് ആശ്ചര്യകരമാണ്. ചരിത്രത്തിൽ കേട്ടുകേൾവിയില്ലാത്ത വിധത്തിലുള്ള പീഡന ദുരന്ത കഥകളാണ് വിദ്യാർത്ഥിനികൾ പരസ്യമായി തുറന്നുപറയാൻ ധൈര്യം കാണിച്ചത്. സിമ്പോസിയങ്ങളും, സെമിനാറുകളും, മനുഷ്യ മതിലുകളും തീർക്കുന്ന ഇടതുപക്ഷത്തിന്റെ സ്ത്രീ പക്ഷ നിലപാട് എന്താണെന്ന് അറിയാൻ ജനങ്ങൾക്ക് താല്പര്യമുണ്ട്.

ജനങ്ങളുടെ കണ്ണിൽ പൊടിയിടുന്നതിന് പാർട്ടി പദവികളിൽ നിന്നും നീക്കി എന്ന് അറിയിപ്പു നൽകിയ ഇടതുപക്ഷം അദ്ധ്യാപകനെ അറസ്റ്റ് ചെയ്യാൻ വൈകുന്നതിൽ സംയുക്ത പ്രക്ഷോഭത്തിന് തയ്യാറുണ്ടോ എന്നും അദ്ദേഹം ചോദിച്ചു. കുട്ടികൾക്ക് പീഡനവും കുട്ടികൾക്കു സംരക്ഷണവും ഒരുക്കുന്ന അപൂർവ്വ പ്രതിഭാസമാണ് പിണറായി വിജയന്റെ ഭരണ കാലഘട്ടത്തിൽ സംഭവിക്കുന്നതെന്നും അദ്ദേഹം പറഞ്ഞു. മുൻസിപ്പൽ മുസ്ലിം യൂത്ത് ലീഗ് പ്രസിഡണ്ട് സി പി സാദിഖലി അധ്യക്ഷത വഹിച്ചു.

ജനറൽ സെക്രട്ടറി സുബൈർ മൂഴിക്കൽ സ്വാഗതം പറഞ്ഞ ചടങ്ങിൽ മുനിസിപ്പൽ മുസ്ലിം ലീഗ് ട്രഷറർ ഹാരിസ് ആമിയൻ,പി കെ ബാവ, പി കെ സക്കീർ ഹുസൈൻ, റഷീദ് കാളമ്പാടി, മണ്ഡലം മുസ്ലിം യൂത്ത് ലീഗ് ജനറൽ സെക്രട്ടറി ഷാഫി കാടേങ്ങൽ, ഫെബിൻ കളപ്പാടൻ, സമീർ കപ്പുർ, എംഎസ്എഫ് മണ്ഡലം പ്രസിഡണ്ട് അഖിൽ ആനക്കയം, സദാദ് കാബ്ര, റസാഖ് വാളൻ, എസ് വാജിദ്, സി കെ അബ്ദുറഹിമാൻ, എൻ മുസ്ഥഫ, സാലി മാടമ്പി, വി ടി ഷബീബ്, മുനീർ വി ടി, റസാഖ് കാരാത്തോട്, അമീർ തറയിൽ, മഹറൂഫ് പി,തബ്ഷീർ വി കെ, അക്‌ബർ ഒ പി, ബുഷൈർ സി കെ, റംസാൻ കാട്ടുങ്ങൽ, ഹബീബ് എന്നിവർ പങ്കെടുത്തു.

പോക്സോ കേസിൽ പ്രതിയായ സിപിഎം മുൻ കൗൺസിലറായിരുന്ന കെ.വി ശശികുമാറിനെ അറസ്റ്റ് ഉടൻ അറസ്റ്റ് ചെയ്യണമെന്നാവശ്യപ്പെട്ടു കൊണ്ട് യൂത്ത് കോൺഗ്രസ്സ് മലപ്പുറം നിയോജക മണ്ഡലം കമ്മിറ്റി മലപ്പുറം പൊലീസ് സ്റ്റേഷനിലേക്ക് മാർച്ച് നടത്തി. മാർച്ച് ഡി.സി.സി പ്രസിഡന്റ് അഡ്വ. വി എസ് ജോയ് ഉദ്ഘാടനം ചെയ്തു. പൊലീസ് സ്റ്റേഷന് മുന്നിൽ നടന്ന പ്രതിഷേധ പരിപാടിയിലേക്ക് കാർ ഇടിച്ചു കയറി 2 പേർക്ക് പരിക്കേറ്റു. പ്രതിയെ പൊലീസ് കസ്റ്റഡിയിലെടുത്തു. മാർച്ച് യൂത്ത് കോൺഗ്രസ്സ് നിയോജക മണ്ഡലം പ്രസിഡന്റ് കെ.പി ഷറഫുദ്ധീൻ അധ്യക്ഷത വഹിച്ചു.

യൂത്ത് കോൺഗ്രസ്സ് സംസ്ഥാന ജനറൽ സെക്രട്ടറി പി.കെ നൗഫൽ ബാബു, ബ്ലോക്ക് കോൺഗ്രസ്സ് പ്രസിഡന്റ് എം.കെ മുഹ്സിൻ,ഖാദർ മച്ചിങ്ങൽ, അജ്മൽ മൊറയൂർ,പി.ടി റിയാസലി, അർഷദ് സി.ടി, ദിനിൽ, റാഫി, റാഷിദ് പൂക്കോട്ടൂർ, ജിജി മോഹൻ, സമീർ മുണ്ടുപറമ്പ്, ഷാഹിദ്,ശിഹാബ് മേൽമുറി എന്നിവർ നേതൃത്വം നൽകി.

വിദ്യാർത്ഥിനികളെ ലൈംഗികമായി പീഡിപ്പിച്ച സെന്റ് ജമ്മാസ് സ്‌കൂൾ അദ്ധ്യാപകനും, സിപിഎം നേതാവും നഗരസഭാംഗവുമായ കെ.വി ശശികുമാറിനെ ഉടൻ അറസ്റ്റു ചെയ്യണമെന്നാവശ്യപ്പെട്ട് ഫ്രറ്റേണിറ്റി മൂവ്മെന്റ് മലപ്പുറം ജില്ലാ കമ്മറ്റി സെന്റ് ജമ്മാസ് സ്‌കൂളിലേക്ക് മാർച്ച് നടത്തി. നിരവധി വിദ്യാർത്ഥിനികളിൽ നിന്ന് പരാതികൾ ലഭിച്ചിട്ടും പ്രതിയെ സംരക്ഷിച്ച സ്ഥാപന മേധാവികൾക്കെതിരെ കേസെടുക്കണമെന്നും നേതാക്കൾ ആവശ്യപ്പെട്ടു.

ഫ്രറ്റേണറ്റി മൂവ്മെന്റ് മലപ്പുറം ജില്ലാ വൈസ് പ്രസിഡന്റ് സഫ്വാൻ തിരൂർ മാർച്ച് ഉദ്ഘാടനം ചെയ്തു. ജില്ലാ സെക്രട്ടേറിയറ്റ് അംഗം ഹാദിക്ക് എൻ.കെ, ജില്ലാ കമ്മിറ്റി അംഗവും സ്‌കൂളിലെ പൂർവ്വ വിദ്യാർത്ഥിയുമായ സാജിദ വടക്കാങ്ങര എന്നിവർ സംസാരിച്ചു. ഷമീം, അനസ് നസീർ, കമറുന്നീസ എന്നിവർ നേതൃത്വം നൽകി.

ജംഷാദ് മലപ്പുറം

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍