സാദിഖലി ശിഹാബ് തങ്ങൾ എസ്.വൈ.എസ് സംസ്ഥാന പ്രസിഡന്റ്

കോഴിക്കോട്: സുന്നി യുവജന സംഘം സംസ്ഥാന പ്രസിഡന്റായി പാണക്കാട് സാദിഖലി ശിഹാബ് തങ്ങളെ തിരഞ്ഞെടുത്തു. എസ്വൈഎസ് സംസ്ഥാന സെക്രട്ടേറിയറ്റ് യോഗമാണ് തിരഞ്ഞെടുത്തത്. പാണക്കാട് ഹൈദരലി ശിഹാബ് തങ്ങളുടെ വിയോഗം മൂലം ഒഴിവുവന്ന സ്ഥാനത്തേക്കാണ് സംസ്ഥാന വൈസ് പ്രസിഡന്റായിരുന്ന സാദിഖലി തങ്ങളെ തിരഞ്ഞെടുത്തത്. വൈസ് പ്രസിഡന്റ് സ്ഥാനത്തേക്ക് ഇബ്രാഹിം ഫൈസി പേരാലിനെയും തിരഞ്ഞെടുത്തു.

സമസ്ത കേരള ഇസ്ലാം മത വിദ്യാഭ്യാസ ബോർഡ് ട്രഷററും പട്ടിക്കാട് ജാമിഅ നൂരിയ്യ പ്രസിഡന്റും പെരിന്തൽമണ്ണ എംഇഎ എൻജിനീയറിങ് കോളജ് ജനറൽ സെക്രട്ടറിയുമാണ് സാദിഖലി ശിഹാബ് തങ്ങൾ. വിവിധ മഹല്ലുകളുടെ ഖാസിയുമാണ്. സമസ്ത കേരള ജംഇയ്യത്തുൽ ഉലമയുടെ വിദ്യാർത്ഥി വിഭാഗമായ എസ്‌കെഎസ്എസ്എഫിന്റെ സംസ്ഥാന പ്രസിഡന്റ് പദവിയിൽ 15 വർഷം പ്രവർത്തിച്ചിട്ടുണ്ട്.