കൊച്ചി: കൊച്ചി നഗര പരിധിയിൽ സ്വകാര്യ ബസുകൾ ഹോൺ മുഴക്കി ഓവർടേക്ക് ചെയ്യുന്നതിനു നിരോധനം ഏർപ്പെടുത്തി ഹൈക്കോടതി. നഗരമേഖലയിൽ ഹോണടിക്കുന്നത് തടയണം. ഓവർടേക്കിങ് കർശനമായി നിരോധിക്കണം. സ്വകാര്യ ബസുകൾ റോഡിന്റെ ഇടതുവശം ചേർന്ന് പോകണമെന്നും കോടതി നിർദേശിച്ചു.നിയമലംഘനങ്ങൾക്കെതിരെ അടിയന്തരമായി ഉത്തരവിറക്കാൻ എറണാകുളം സിറ്റി പൊലീസ് കമ്മിഷണർക്കും മോട്ടർ വാഹന വകുപ്പിനും കോടതി നിർദ്ദേശം നൽകി.

പെരുമ്പാവൂർ നഗരപരിധിയിലെ ഓട്ടോറിക്ഷാ പെർമിറ്റുകളുമായി ബന്ധപ്പെട്ട ഹർജിയിൽ വാദം കേൾക്കവെയാണ് ഹൈക്കോടതി കൊച്ചിയിലെ വിഷയത്തിൽ ഇടപെട്ടത്. നഗരത്തിലെ ബസുകളുടെ ചീറിപ്പായലും തോന്നിയതുപോലുള്ള വാഹനമോടിക്കലും ചൂണ്ടിക്കാട്ടിയാണ് ഹൈക്കോടതി കൊച്ചി സിറ്റി പൊലീസ് കമ്മീഷണർക്കും മോട്ടോർവാഹന വകുപ്പിനും നിർദ്ദേശം നൽകിയത്. റോഡു നിറഞ്ഞു ബസുകൾ ഓടിക്കുന്നതിനും ഓട്ടോറിക്ഷകളുടെ നിയമലംഘനങ്ങൾക്കും മൂക്കുകയറിടുന്നതാണ് കോടതി പുറപ്പെടുവിച്ച ഉത്തരവ്.

സ്വകാര്യ ബസുകൾ റോഡു നിറഞ്ഞ് ഓടുന്നതു മൂലമുള്ള ട്രാഫിക് കുരുക്കുകൾ ശ്രദ്ധയിൽ പെട്ടതു കോടതി ചൂണ്ടിക്കാട്ടി. നിർബന്ധമായും ഇടതു ഭാഗത്തു കൂടി മാത്രം വാഹനങ്ങൾ ഓടിക്കണം എന്നും നിർദേശിച്ചിട്ടുണ്ട്. നഗര പരിധിയിൽ ഓവർടേക്കിങ് പാടില്ലെന്നും ഹോൺ മുഴക്കരുതെന്നും വ്യക്തമാക്കിയിട്ടുണ്ട്. ഓട്ടോറിക്ഷകൾ നിശ്ചിത അനുമതിയുള്ള സ്ഥലങ്ങളിൽ നിന്നു മാത്രമേ ആളുകളെ കയറ്റാൻ പാടുള്ളൂ. തോന്നുന്നിടത്തു നിർത്തി യാത്രക്കാരെ കയറ്റുകയും ഇറക്കുകയും ചെയ്യുന്നതു കുറ്റകരമാണ്.

സിഗ്‌നലുകൾ നോക്കാതെയും നൽകാതെയും ഓട്ടോറിക്ഷകൾ ഓടിക്കുന്നത് ഉൾപ്പടെയുള്ള നിയമലംഘനങ്ങൾ ശ്രദ്ധയിൽ പെടുന്നുണ്ടെന്നും ഇവ പരിധി ലംഘിക്കുന്നുണ്ടെന്നും കോടതി വ്യക്തമാക്കി. പെരുമ്പാവൂർ നഗര പരിധിയിലെ ഓട്ടോറിക്ഷകളുടെ പെർമിറ്റുകളുമായി ബന്ധപ്പെട്ട ഒരു കൂട്ടം ഹർജി പരിഗണിക്കുമ്പോഴാണ് ഹൈക്കോടതി വാഹന വകുപ്പിനോടും പൊലീസിനോടും ഉത്തരവിറക്കാൻ നിർദേശിച്ചിരിക്കുന്നത്.

മറുനാടന്‍ മലയാളി

    മറുനാടന്‍ മലയാളി ബ്യൂറോ