ടെക്സസ് : ഡ്രൈവറെ കുത്തി പരുക്കേൽപിച്ചു ജയിലിലെ വാഹനവുമായി രക്ഷപ്പെട്ട കൊലക്കേസ് പ്രതി ഗൊൺസാലൊ ലോപസ്(46) നെ കണ്ടെത്തുന്നതിന് മൂന്നാഴ്ചയായി പൊലീസ് നടത്തുന്ന ശ്രമം വിജയിച്ചില്ല. മെയ്‌ 12 നായിരുന്നു സംഭവം. ഗൊൺസാലൊയെ ജയിലിൽ നിന്നും പുറത്തേക്ക് ബസിൽ കൊണ്ടു പോകവെ, വാഹനം ഓടിച്ചിരുന്ന ക്രിമിനൽ ജസ്റ്റിസ് ഓഫിസറെ കുത്തി പരുക്കേൽപ്പിച്ചു ബസ് തട്ടിയെടുക്കുകയായിരുന്നു.

തട്ടിയെടുത്ത ബസുമായി മുന്നോട്ടു പോകുന്നതിനിടെ വാഹനത്തിന്റെ ടയർപൊട്ടിയതിനെ തുടർന്ന് ഗൊൺസാലൊ ബസ് ഉപേക്ഷിച്ചു ഓടി രക്ഷപ്പെടുകയായിരുന്നു. പൊലീസ് അന്വേഷിച്ചെങ്കിലും ഇതുവരെ ഇയാളെ കണ്ടെത്താനായില്ല.

പ്രതിയെ കണ്ടെത്തുന്നതിനു കൂടുതൽ വിവരങ്ങൾ പൊലീസ് പുറത്തുവിട്ടു. ശരീരത്തിൽ മുഴുവൻ ടാറ്റു ചെയ്ത ചിത്രം പരസ്യപ്പെടുത്തിയിട്ടുണ്ട്. കണ്ടെത്തുന്നവർക്ക് 50,000 ഡോളർ പ്രതിഫലവും പൊലീസ് പ്രഖ്യാപിച്ചു.