സ്വയം വിവാഹം (self-marriage) ചെയ്യാനൊരുങ്ങി ഗുജറാത്തിലെ വഡോദര സ്വദേശിയായ 24കാരി. മറ്റൊരാളെ വിവാഹം കഴിക്കാൻ താൽപര്യം ഇല്ലാത്തതിനാൽ 24 കാരിയായ ക്ഷമ ബിന്ദു (Kshama Bindu) ആണ് തന്നെത്തന്നെ വിവാഹം ചെയ്യാൻ തയ്യാറെടുക്കുന്നത്. പരമ്പരാഗത രീതിയിലുള്ള വിവാഹച്ചടങ്ങുകളും സംഘടിപ്പിച്ചിട്ടുണ്ട്. ജൂൺ 11 ന് ആയിരിക്കും ചടങ്ങുകൾ.

'ഞാൻ ഒരിക്കലും മറ്റൊരാളെ വിവാഹം കഴിക്കാൻ ആഗ്രഹിച്ചിട്ടില്ല. പക്ഷേ എനിക്ക് ഒരു വധു ആകാൻ ആഗ്രഹമുണ്ടായിരുന്നു. അങ്ങനെ ഞാൻ എന്നെ തന്നെ വിവാഹം കഴിക്കാൻ തീരുമാനിച്ചു', ക്ഷമ ടൈംസ് ഓഫ് ഇന്ത്യയോട് പറഞ്ഞു. ഒരു വധുവിനെ പോലെ താൻ അണിഞ്ഞൊരുങ്ങുമെന്നും നെറ്റിയിൽ സിന്ദൂരം ചാർത്തുമെന്നും ക്ഷമ പറഞ്ഞിട്ടുണ്ട്. ഒരു സ്വകാര്യ സ്ഥാപനത്തിലെ ജീവനക്കാരിയാണ് ക്ഷമ. ഒരുപക്ഷേ നമ്മുടെ രാജ്യത്ത് ആദ്യമായി ആത്മസ്‌നേഹത്തിന്റെ ഇത്തരമൊരു മാതൃക കാണിക്കുന്നത് താനായിരിക്കുമെന്നും ക്ഷമ പറഞ്ഞു.

'സ്വയം-വിവാഹം ചെയ്യുക എന്നത് നിങ്ങളോടു തന്നെ കാണിക്കുന്ന പ്രതിബദ്ധതയും തന്നോട് തന്നെയുള്ള നിരുപാധികമായ സ്‌നേഹവുമാണ് കാണിക്കുന്നത്. അത് സ്വയം അംഗീകരിക്കാനുള്ള ഒരു പ്രവൃത്തി കൂടിയാണ്. മറ്റുള്ളവർ അവർ ഇഷ്ടപ്പെടുന്ന ഒരാളെ വിവാഹം കഴിക്കുന്നു. ഞാൻ എന്നെത്തന്നെ സ്‌നേഹിക്കുന്നു, അതിനാലാണ് ഇത്തരമൊരു കല്യാണം', ക്ഷമ കൂട്ടിച്ചേർത്തു.

ഗോത്രിയിലെ ഒരു ക്ഷേത്രത്തിൽ വച്ച് തന്റെ കല്യാണം നടത്താനാണ് ക്ഷമ പദ്ധതിയിട്ടിരിക്കുന്നത്. അതിനായി അപേക്ഷ നൽകിയിട്ടുണ്ട്. അഞ്ച് പ്രതിജ്ഞകളും എഴുതി തയ്യാറാക്കിയിട്ടുണ്ട്. വിവാഹത്തിനു ശേഷം ഗോവയിൽ രണ്ടാഴ്ചത്തെ ഹണിമൂൺ നടത്താനും ക്ഷമ ആഗ്രഹിക്കുന്നുണ്ട്.

24കാരിസ്വയം വിവാഹം ചെയ്യാൻ