കർണാടകയിലെ റോഡിന് ഗോഡ്സെയുടെ പേരിട്ടത് വിവാദത്തിൽ; പൊലീസ് കേസെടുത്തു

ഉഡുപ്പി: കർണാടകത്തിൽ റോഡിന് ഗാന്ധി ഘാതകൻ നാഥുറാം ഗോഡ്‌സെയുടെ പേരിട്ടത് വിവാദത്തിൽ. ഉഡുപ്പി ജില്ലയിലെ കാർക്കള താലൂക്കിൽ പുതുതായി നിർമ്മിച്ച റോഡിനാണ് ഗോഡ്സെയുടെ പേരിട്ടിരിക്കുന്നത്. 'പദുഗിരി നാഥുറാം ഗോഡ്‌സെ റോഡ്' എന്നാണ് ബോർഡിൽ പേരെഴുതിയിരുന്നത്.

കർണാടക ഊർജ മന്ത്രി വി. സുനിൽ കുമാറിന്റെ മണ്ഡലത്തിൽപ്പെടുന്ന കാർക്കള താലൂക്കിലെ ബോലോ ഗ്രാമപഞ്ചായത്തിലെ പാതയോരത്താണ് ബോർഡ് സ്ഥാപിച്ചത്. ഇത് സ്ഥാപിച്ചത് സർക്കാരോ പഞ്ചായത്ത് അധികൃതരോ അല്ലെന്ന് മന്ത്രി പറഞ്ഞു. ഇതിനു പിന്നിൽ പ്രവർത്തിച്ചവരെ ഉടൻ പിടികൂടുമെന്നും മന്ത്രി വ്യക്തമാക്കി


ഇതിന്റെ ചിത്രം സോഷ്യൽ മീഡിയയിൽ വ്യാപകമായി പ്രചരിക്കുകയും ചെയ്തു. സംഭവം വിവാദമായതോടെ ഗോഡ്‌സെയുടെ പേരെഴുതിയ ബോർഡ് ഗ്രാമപഞ്ചായത്ത് അധികൃതർ നീക്കം ചെയ്തു. അധികൃതരുടെ പരാതിയിൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.