മുക്കം: മലയോരത്തെ പ്രശസ്ത കോളേജായ എം.എ.എം.ഒ വിൽ പൂർവ്വ വിദ്യാർത്ഥി സംഗമത്തിന് അവസരമൊരുങ്ങുന്നു. 1982 മുതൽ അവിടെ പഠിച്ചിറങ്ങിയവിദ്യാർത്ഥികളും പഠിപ്പിച്ച പൂർവ അദ്ധ്യാപകരും ജൂലൈ 24 ന് വീണ്ടും മാമോകിൽ ഒത്തുചേരും.

യൂറോപ്പിലും ഗൾഫിലുമടക്കം വിദേശത്തും സ്വദേശത്തും വ്യത്യസ്ത മേഖലയിൽ പ്രവർത്തിക്കുന്ന നിരവധി പൂർവ വിദ്യാർത്ഥികളാണ് പങ്കെടുക്കുന്നത്. കോളേജിന്റെ ആരംഭം മുതലുള്ള ബാച്ചുകളിലെ വിദ്യാർത്ഥികളെയും അദ്ധ്യാപകരെയും പങ്കെടുപ്പിക്കാനും നിരവധി കലാ പരിപാടികൾ അവതരിപ്പിക്കാനും ഈയവസരം ഉപയോഗപ്പെടുത്തും.

പൂർവ വിദ്യാർത്ഥികളുടെയും കുടുംബത്തിന്റെയും ക്ഷേമവും സാമൂഹിക പ്രതിബദ്ധതയുള്ള വിഷയങ്ങളിൽ സഹായവും മറ്റു ജീവകാരുണ്യ പ്രവർത്തനങ്ങളും നടത്തുക എന്ന ലക്ഷ്യത്തോടെയാണ് ഗ്ലോബൽ അലുംനി പ്രവർത്തിച്ചു വരുന്നത്.

യൂറോപ്പ്, സൗദി, ഖത്തർ, ദുബായ് എന്നിവിടങ്ങളിൽ പൂർവ വിദ്യാർത്ഥി കൂട്ടായ്മ സജീവമായി പ്രവർത്തിച്ചു വരുന്നു. ഒമാൻ, ബാംഗ്ലൂർ എന്നിവിടങ്ങളിൽ കൂട്ടായ്മയുടെ രൂപീകരണം നടന്നു വരുന്നു. ലക്ഷക്കണക്കിനു വരുന്ന രൂപയുടെ ജീവകാരുണ്ണ്യ പ്രവർത്തനങ്ങളാണ് കോവിഡ് മഹാമാരിക്കാലത്തും നടപ്പിലാക്കിയത്.
പൂർവ്വ പഠിതാക്കളിൽ പ്രശസ്തരായവരെ ആദരിക്കൽ, അവരെ പുതു തലമുറക്ക് പരിചയപ്പെടുത്തൽ പഠനത്തിൽ മിടുക്കരും നിർദ്ധനരുമായ വിദ്യാർത്ഥികൾക്ക് സ്‌കോളർഷിപ്പ് നൽകുക, ഫീസ് അടച്ചു സഹായിക്കുക, വിദേശത്തു മരണപ്പെട്ടവരുടെ മൃതദേഹം നാട്ടിലെത്തിക്കാൻ സഹായിക്കുക, അപകടത്തിൽ പരിക്കേറ്റവരെ സഹായിക്കുക തുടങ്ങി നിരവധി ജീവകാരുണ്യ പ്രവർത്തനങ്ങൾ കൂട്ടായ്മ ചെയ്തുകൊണ്ടിരിക്കുന്നുണ്ട്.
നിലവിലെ വിദ്യാർത്ഥികൾക്ക് കരിയർ ഗൈഡൻസ്, പ്ലേസ്മെന്റ്, പൂർവവിദ്യാർത്ഥികളിൽ ഉന്നതങ്ങളിൽ എത്തിയവരുമായുള്ള ആശയവിനിമയ ക്ലാസുകൾ, മോട്ടിവേഷൻ ക്ലാസുകൾ എന്നിവ നടത്തിവരുന്നു.

കോളേജ് പ്രിൻസിപ്പൽ ഡോ. അബ്ബാസ് ടി.പി മുഖ്യ രക്ഷാധികാരിയാണ്. സംഗമത്തിന്റെ ലോഗോ പ്രകാശനം വൈസ് പ്രിൻസിപ്പൽ ഡോ. അബൂബക്കർ മങ്ങാട്ടു ചാലിൽ ഗ്ലോബൽ അലുംനി പ്രസിഡണ്ട് അഡ്വ. മുജീബ് റഹ്മാന് നൽകി നിർവഹിച്ചു.

''പേര് നിർദ്ദേശിക്കാം സമ്മാനം നേടാം' മത്സരത്തിൽ വിജയിയായ 2007 മൈക്രോ ബയോളജി ബാച്ചിലെ ഡാനിഷ് ഹുസൈന് യമഹ മുക്കം സമ്മാനം നൽകും. സംഗമത്തിന്റെ വിജയത്തിനായി വിപുലമായ സന്നാഹങ്ങളാണ് ഒരുക്കുന്നത്. വിവിധ ഉപ വകുപ്പുകൾ രൂപീകരിച്ച് പ്രവർത്തനം ആരംഭിച്ചു. ഗ്ലോബൽ അലുംനി വൈസ് പ്രസിഡണ്ട് അഷ്റഫ് വയലിൽ, ട്രഷറർ ഫൈസൽ എം.എ, സെക്രട്ടറിമാരായ മുഫ്സിറ, നൗഫൽ ടി.എം, ടീച്ചർ കോഡിനേറ്റർ ഇർഷാദ് തുടങ്ങിയവരും പത്രസമ്മേളനത്തിൽ പങ്കെടുത്തു. മീഡിയ കോഡിനേറ്റർ റീന ഗണേശ് സ്വാഗതവും സെക്രട്ടറി മുജീബ് ഇ.കെ നന്ദിയും പറഞ്ഞു.