നിതീഷ് രാഷ്ട്രപതി സ്ഥാനാർത്ഥിയാകണം; പിന്തുണയ്ക്കാൻ തയ്യാറെന്ന് ബിഹാറിലെ പ്രതിപക്ഷ പാർട്ടികൾ

പട്‌ന: മുഖ്യമന്ത്രി നിതീഷ് കുമാർ രാഷ്ട്രപതി സ്ഥാനാർത്ഥിയായാൽ പിന്തുണയ്ക്കാൻ തയാറാണെന്നു ബിഹാറിലെ പ്രതിപക്ഷ പാർട്ടികൾ. നിതീഷ് കുമാർ രാഷ്ട്രപതിയാകാൻ സർവഥാ യോഗ്യനാണെന്ന ജനതാദൾ (യു) മന്ത്രി ശ്രാവൺ കുമാറിന്റെ പ്രസ്താവനയോടു പ്രതികരിക്കുകയായിരുന്നു ആർജെഡിയും കോൺഗ്രസും ഉൾപ്പെട്ട പ്രതിപക്ഷ കക്ഷികൾ.

ബിഹാറിൽ നിന്നൊരാളെ രാഷ്ട്രപതിയാക്കുന്നത് അഭിമാനകരമാകുമെന്ന് ആർജെഡി വക്താവ് ചിത്തരഞ്ജൻ ഗഗൻ പറഞ്ഞു. കഴിഞ്ഞ തവണ ബിഹാർ സ്വദേശിയായ മീരാ കുമാറിനെ കോൺഗ്രസ് രാഷ്ട്രപതി സ്ഥാനാർത്ഥിയാക്കിയപ്പോൾ ആർജെഡി പിന്തുണച്ചുവെന്നു ഗഗൻ ചൂണ്ടിക്കാട്ടി.

മതേതരനായ നിതീഷ് കുമാർ മികച്ച രാഷ്ട്രപതി സ്ഥാനാർത്ഥിയാകുമെന്നു കോൺഗ്രസ് നിയമസഭാ കക്ഷി നേതാവ് അജിത് ശർമ അഭിപ്രായപ്പെട്ടു. ബിഹാർ ജനതയെ സേവിച്ച നിതീഷിനു ഇനി രാജ്യത്തെ സേവിക്കാനാണ് ആഗ്രഹമെങ്കിൽ നല്ല കാര്യമാണെന്നും അദ്ദേഹം പറഞ്ഞു. ബിഹാർ മുഖ്യമന്ത്രി സ്ഥാനം നിതീഷിൽനിന്നു തട്ടിയെടുക്കാനായി ബിജെപി അദ്ദേഹത്തെ ഉപരാഷ്ട്രപതിയാക്കാൻ സാധ്യതയുണ്ടെന്ന് സിപിഐ (എംഎൽ) സംസ്ഥാന സെക്രട്ടറി കുനാൽ പ്രതികരിച്ചു.