ബെംഗളൂരു: ലഹരിമരുന്ന് ഉപയോഗിച്ചതിന് നടൻ ശക്തി കപൂറിന്റെ മകൻ സിദ്ധാന്ത് കപൂർ അടക്കം ആറുപേർ അറസ്റ്റിൽ. ബെംഗളൂരുവിലെ പാർക്ക് ഹോട്ടലിൽ നടന്ന ഡി.ജെ. പാർട്ടിക്കിടെ നടത്തിയ റെയ്ഡിലാണ് നടനും സിനിമാപ്രവർത്തകനുമായ സിദ്ധാന്ത് പിടിയിലായത്. വൈദ്യ പരിശോധനയിൽ സിദ്ധാന്ത് ലഹരിമരുന്ന് ഉപയോഗിച്ചതായി തെളിഞ്ഞതിനെ തുടർന്നാണ് അറസ്റ്റ്.

35 പേരെയാണ് പാർട്ടിയിൽനിന്ന് പൊലീസ് കസ്റ്റഡിയിലെടുത്ത് വൈദ്യപരിശോധനയ്ക്ക് വിധേയരാക്കിയത്. ഇതിൽ സിദ്ധാന്ത് അടക്കം ആറുപേർ ലഹരിമരുന്ന് ഉപയോഗിച്ചതായി വൈദ്യപരിശോധനയിൽ കണ്ടെത്തുകയും തുടർന്ന് അറസ്റ്റ് ചെയ്യുകയുമായിരുന്നു. എൻ.ഡി.പി.എസ്. ആക്ട് പ്രകാരമാണ് സിദ്ധാന്ത് അടക്കമുള്ളവർക്കെതിരേ കേസെടുത്തിരിക്കുന്നതെന്ന് ബെംഗളൂരു ഈസ്റ്റ് ഡിവിഷൻ ജില്ലാ പൊലീസ് മേധാവി ഭീമശങ്കർ എസ്. ഗുലേദ് മാധ്യമങ്ങളോട് പറഞ്ഞു.

ബെംഗളൂരുവിലെ ഹോട്ടലിൽ നടന്ന പാർട്ടിയിൽ ഡി.ജെ. ആയാണ് സിദ്ധാന്ത് കപൂറിനെ ക്ഷണിച്ചിരുന്നതെന്നാണ് റിപ്പോർട്ട്. ലഹരിമരുന്ന് ഉപയോഗിച്ചതായി വൈദ്യപരിശോധനയിൽ തെളിഞ്ഞതോടെയാണ് ഇവരുടെ അറസ്റ്റ് രേഖപ്പെടുത്തിയതെന്നും തിങ്കളാഴ്ച തന്നെ പ്രതികളെ കോടതിയിൽ ഹാജരാക്കുമെന്നും അദ്ദേഹം പറഞ്ഞു.

നേരത്തെ സിദ്ധാന്ത് കപൂറിന്റെ സഹോദരിയും നടിയുമായ ശ്രാദ്ധ കപൂറിനെ നാർക്കോട്ടിക്സ് കൺട്രോൾ ബ്യൂറോ(എൻ.സി.ബി) ചോദ്യംചെയ്തിരുന്നു. ലഹരിമരുന്ന് കൈവശംവെച്ചെന്ന ആരോപണത്തിലാണ് 2020-ൽ ശ്രദ്ധാ കപൂറിനെ ചോദ്യംചെയ്തത്.

 

അറസ്റ്റ്‌നടൻ ശക്തി കപൂർമകൻ സിദ്ധാന്ത് കപൂർലഹരിമരുന്ന്