മുക്കം: കുട്ടികളിലെ ഹൃദയ ശസ്ത്രക്രിയക്കും തുടർ ചികിത്സക്കും സൗജന്യ സഹായം നൽകുന്ന വെളിച്ചം ശിശുമിത്ര പദ്ധതിക്ക് തുടക്കമായി. ഹൃദയസംബന്ധമായ അസുഖം മൂലം പ്രയാസപ്പെടുന്ന കുട്ടികളുള്ള കുടുംബങ്ങൾക്ക് എറെ ആശ്വാസമാവുന്നതാണ് പദ്ധതി. ചേന്നമംഗല്ലൂർ ഇസ്ലാഹിയ അസോസിയേഷന്റെ കീഴിലുള്ള സേവന വിഭാഗം ഇഹ്സാൻ ചാരിറ്റബിൾ ട്രസ്റ്റും, കനഡയിലെ 'നയിമ'യും, കോഴിക്കോട് മെട്രോ ഇന്റർനാഷണൽ കാർഡിയാക് സെന്ററും സഹകരിച്ചുകൊണ്ടാണ് പദ്ധതി നടപ്പിലാക്കുന്നത്.

ഇത് സംബന്ധമായ ധാരണാപത്രത്തിൽ കോഴിക്കോട് മെട്രോ ഇന്റർനാഷണൽ കാർഡിയാക് സെന്റർ എം.ഡി. ഡോക്ടർ മുസ്തഫ, ഇഹ്സാൻ ചെയർമാൻ പി.കെ. അബ്ദുറസാഖ് എന്നിവർ ഒപ്പ് വെച്ചു. കുട്ടികളുടെ ഹൃദയ ശസ്ത്രക്രിയക്ക് സൗജന്യ സഹായം നൽകുന്ന പദ്ധതിയാണ് 'വെളിച്ചം ശിശു മിത്ര'. മാധ്യമം ചീഫ് എഡിറ്റർ ഒ.അബ്ദുറഹ്‌മാൻ, ഇസ്ലാഹിയ അസോസിയഷൻ പ്രസിഡണ്ട് കെ. സുബൈർ, റൈഹാന(നൈമ-കനഡ) തുടങ്ങിയവർ സംബന്ധിച്ചു.