കൊല്ലം പ്രവാസി അസോസിയേഷന്റെ 2022 വർഷത്തെ ജില്ലാ സമ്മേളനം ജൂൺ 24, പൊതു സമ്മേളനം ജൂലൈ 1 എന്നീ തീയതികളിൽ നടക്കും എന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു.
ജൂൺ 24നു സെഗയ്യ കെ.സി.എ ഹാളിൽ രാവിലെ 9 മണിക്ക് പതാക ഉയർത്തലൂടെ ആരംഭിക്കുന്ന ജില്ലാ സമ്മേളനത്തിലെ ആദ്യ സെഷനായ ജനറൽ ബോഡി മീറ്റിംഗിൽ നിലവിലെ സെക്രട്ടറിയേറ്റ് അംഗങ്ങൾ, സെൻട്രൽ കമ്മിറ്റി അംഗങ്ങൾ, ഏരിയാ ഭാരവാഹികൾ, പ്രവാസി യൂനിറ്റ് കോഒർഡിനേറ്റേഴ്‌സ് എന്നിവർ പങ്കെടുക്കും.
രണ്ടാം സെഷനായ പ്രതിനിധി സമ്മേളനത്തിൽ കഴിഞ്ഞ ഏപ്രിൽ-മെയ്‌ മാസങ്ങളിൽ നടന്ന ഏരിയ സമ്മേളനങ്ങളിലൂടെ തിരഞ്ഞെടുക്കപെട്ട പുതിയ ഏരിയ ഭരണസമിതിയുടെ അംഗീകാരവും, സെൻട്രൽ കമ്മിറ്റിയിലേക്ക് തിരഞ്ഞെടുക്കപെട്ട പ്രതിനിധികളുടെ അംഗീകാരവും തുടർന്ന് 2022-2024 കാലത്തേക്കുള്ള പുതിയ ഭരണസമിതിയുടെ തിരഞ്ഞെടുപ്പ് നടക്കും. വൈകിട്ട് 3 മണിമുതൽ നടക്കുന്ന സാംസ്‌കാരിക സമ്മേളനത്തിൽ കൊല്ലം പ്രവാസി അസോസിയേഷന്റെ കലാ-സാഹിത്യ വിഭാഗമായ 'സൃഷ്ടി' യുടെ നേതൃത്വത്തിൽ ബഹ്‌റൈനിലെ സാമൂഹിക സാംസ്‌കാരിക രംഗത്തെ പ്രമുഖർ ഇതിൽ പങ്കെടുക്കും.
ജൂലൈ 1 നു വൈകിട്ട് നാല് മണിമുതൽ ഇന്ത്യൻ ക്ലബ്ബ് ഓഡിറ്റോറിയത്തിൽ നടക്കുന്ന ജില്ലാ സമ്മേളനത്തിന്റെ രണ്ടാം ഭാഗമായ പൊതുസമ്മേളനത്തിൽ കൊല്ലം ലോക്‌സഭാ അംഗം ശ്രീ.എൻ.കെ. പ്രേമചന്ദ്രൻ മുഖ്യാതിഥിയായി പങ്കെടുക്കും. കഴിഞ്ഞ രണ്ടു വർഷമായി കെപിഎ ആശുപത്രി ചാരിറ്റി വിങ്ങിൽ നിസ്വാർത്ഥ സേവനം നടത്തുന്ന വിവിധ ആശുപത്രികളിൽ ജോലി ചെയ്യുന്ന ഡോക്റ്റർമാർ, നേഴ്‌സുമാർ, പാരമെടിക്കൽ സ്റ്റാഫ് എന്നിവരെ ചടങ്ങിൽ ആദരിക്കും.
കൂടാതെ കെപിഎ സമ്മേളനത്തിന്റെ ഭാഗമായി പുറത്തിറക്കുന്ന സുവനീറിന്റെ പ്രകാശനവും സമ്മേളനത്തിൽ വെച്ച് നടക്കും. തുടർന്ന് ഐഡിയ സ്റ്റാർ സിംഗർ താരങ്ങളായ ശ്രീനാഥും, ദുർഗ്ഗാ വിശ്വനാഥും ചേർന്ന് അവതരിപ്പിക്കുന്ന മ്യുസിക് നൈറ്റും കെപിഎ കലാകാരന്മാർ അവതരിപ്പിക്കുന്ന മറ്റു പരിപാടികളും ഉണ്ടായിരിക്കും. പൂർണമായും സൗജന്യ പ്രവേശനം ആയ ഈ മ്യൂസിക് & ഡാൻസ് നൈറ്റിന് പിന്തുണ നൽകുന്നത് സ്റ്റാർ വിഷൻ ഈവന്റ്‌സ് ബഹ്റൈൻ, റേഡിയോ രംഗ് എന്നിവരാണ് .
ബഹ്‌റൈനിലെ കൊല്ലം പ്രവാസികളുടെ കൂട്ടായ്മയായ കൊല്ലം പ്രവാസി അസോസിയേഷൻ, കഴിഞ്ഞ രണ്ടു വർഷക്കാലമായി ബഹ്‌റൈനിലെ സാമൂഹിക-സാംസ്‌കാരിക-ജീവകാരുണ്യ-വിദ്യാഭ്യാസ മേഖലയിൽ നിസ്വാർത്ഥമായ സേവനം നടത്തിവരുകയാണെന്നും. സ്ത്രീകളുടെ ശാക്തീകരണത്തിന് കുടുംബശ്രീ മാതൃകയിൽ ആരംഭിച്ച 'പ്രവാസിശ്രീ' മികച്ച പ്രവർത്തനം നടത്തുന്നു എന്നും കൂടാതെ വിവിധങ്ങളായ പദ്ധതികളിലൂടെ പ്രവാസികളുടെ വിശിഷ്യ കൊല്ലം പ്രവാസികളുടെ ദൈനംദിന വിഷയങ്ങൾക്ക് പരിഹാരം കാണാൻ ശ്രമിക്കുന്നതായും ഭാരവാഹികൾ അറിയിച്ചു. കൊല്ലം പ്രവാസി അസോസിയേഷൻ പ്രസിഡന്റ് നിസാർ കൊല്ലം, ജനറൽ സെക്രട്ടറി ജഗത് കൃഷ്ണകുമാർ, വൈ. പ്രസിഡന്റ് വിനു ക്രിസ്ടി , സ്റ്റാർ ഇവെന്റ്‌സ് ചെയർമാൻ സേതുരാജ് കടക്കൽ എന്നിവർ വാർത്താസമ്മേളനത്തിൽ പങ്കെടുത്തു
