കുവൈത്ത്: അതിരുകളില്ലാത്തതും കലവറയില്ലാത്തതുമായ മനുഷ്യ സ്‌നേഹമാണ് പെരുന്നാൾ സന്ദേശമെന്നും ഇതാണ് ഇന്ന് മക്കയിലെ കഅ്ബ മന്ദിരത്തിനും ചുറ്റും ഭൂഗോളത്തിന്റെ വിവിധ ദിക്കുകളിൽ നിന്ന് ദേശ-ഭാഷ-വർണ-വർഗ വ്യതിരിക്തകൾക്കതീതമായി പാൽകടൽ തീർക്കുന്നതിലൂടെ കാണുന്നതെന്നും ഈദ് ഖുതുബയിൽ ഖതീബുമാർ സൂചിപ്പിച്ചു.

ഇന്ത്യൻ ഇസ്ലാഹി സെന്ററിന് കീഴിൽ സാൽമിയിലെ മസ്ജിദുൽ വുഹൈബിൽ സയ്യിദ് അബ്ദുറഹ്മാൻ തങ്ങളും മംഗഫിലെ മസ്ജിദ് ഫാത്തിമ ഹസ്സാനിൽ മുഹമ്മദ് ഷാനിബ് പേരാന്പ്രയും മഹ്ബൂലയിൽ മുഹമ്മദ് മുർഷിദ് അരീക്കാടും നമസ്‌കാരത്തിനും ഈദ് ഖുതുബയ്ക്കും നേതൃത്വം നൽകി.

ഐ.ഐ.സിയുടെ കീഴിൽ സ്വരൂപിച്ച ഉദ്ഹിയ്യത്ത് ഫണ്ട് വടക്കു കിഴക്കൻ സംസ്ഥാനങ്ങളിലെ 400 പരം ഗ്രാമങ്ങളിൽ ഫോക്കസ് ഇന്ത്യയുടെ കീഴിൽ സംഘടിപ്പിക്കുന്ന ഉദ്ഹിയ്യത്ത് കർമ്മത്തിലേക്ക് നൽകി.