കോൺഗ്രസിന്റെ പതിനൊന്നിൽ പത്ത് എംഎൽഎമാരും നിയമസഭയിൽ; ഗോവയിൽ ബിജെപിയുടെ വിമതനീക്കം പൊളിഞ്ഞു; പാർട്ടിക്കൊപ്പം നിൽക്കുമെന്ന് മൈക്കൽ ലോബോ; പ്രചരണങ്ങൾ അടിസ്ഥാനരഹിതമാണെന്ന് കോൺഗ്രസ്

പനാജി: വിമതരുടെ നേതൃത്വത്തിൽ ബിജെപിയിലേക്ക് ചേക്കേറുമെന്ന് കരുതിയ മുഴുവൻ കോൺഗ്രസ് എംഎൽഎമാരും ഗോവ നിയമസഭയിലെത്തി. കോൺഗ്രസിന്റെ പതിനൊന്ന് എംഎൽഎമാരിൽ പത്ത് പേരും നിയമസഭയിൽ ഹാജരാവുകയായിരുന്നു. അസുഖബാധിതനായതിനാലാണ് ഒരാൾ എത്താതിരുന്നത്. ഇതോടെ ഗോവയിൽ ബിജെപിയുടെ വിമതനീക്കം പൊളിഞ്ഞു.

പാർട്ടി വിടുമെന്ന പ്രചരണങ്ങൾ അടിസ്ഥാനരഹിതമാണെന്നും, പ്രശ്നങ്ങളൊന്നുമില്ലെന്നും കോൺഗ്രസ് പ്രതികരിച്ചു. ബിജെപിയിലേക്ക് ഇല്ലെന്ന് വിമത നേതാക്കളായ ദിഗംബർ കമത്തും, മൈക്കൽ ലോബോയും വ്യക്തമാക്കി. കൂറുമാറ്റ ഗൂഢാലോചന നടന്നുവെന്ന പ്രചരണം തന്നെ ഞെട്ടിച്ചുവെന്നും, പാർട്ടി ചുമതലയുള്ള ദിനേഷ് ഗുണ്ടു റാവുവിന്റെ വാക്കുകൾ തന്നെ വല്ലാതെ വേദനിപ്പിച്ചെന്നും മുൻ മുഖ്യമന്ത്രി ദിഗംബർ കമത്ത് പ്രതികരിച്ചു. പ്രതിപക്ഷ നേതാവ് സ്ഥാനത്ത് നിന്ന് ലോബോയെ കോൺഗ്രസ് പുറത്താക്കിയിരുന്നു.

കോൺഗ്രസിന്റെ എല്ലാ എംഎൽഎമാരും ഒറ്റക്കെട്ടാണെന്ന് മൈക്കൽ ലോബോ പ്രതികരിച്ചു. ഞായറാഴ്ച ഒരു യോഗത്തിനായി സൗത്ത് ഗോവയിൽ പോയിരുന്നു. കോൺഗ്രസിലെ ചില നേതാക്കൾ ആവശ്യമില്ലാതെയാണ് മറ്റൊരു വാർത്താസമ്മേളനം നടത്താൻ ആഗ്രഹിച്ചത്. അതുകൊണ്ടാണ് അതിൽ പങ്കെടുക്കാതിരുന്നത്. കോൺഗ്രസ് ടിക്കറ്റിലാണ് തങ്ങൾ മത്സരിച്ച് വിജയിച്ചത് എന്നും പാർട്ടിക്കൊപ്പം നിൽക്കുമെന്നും ലോബോ പറഞ്ഞു.

നിയമസഭാ സമ്മേളനം ആരംഭിക്കാനിരിക്കെയായിരുന്നു ഗോവയിൽ വിമത നീക്കമെന്ന അഭ്യൂഹം ശക്തമായത്. എംഎൽഎമാർ മുഖ്യമന്ത്രിയുമായി ചർച്ച നടത്തിയെന്ന റിപ്പോർട്ടുകളെ തുടർന്നായിരുന്നു ലോബോയെ പ്രതിപക്ഷ നേതാവിന്റെ സ്ഥാനത്ത് നിന്നും നീക്കിയത്. കോടികൾ നൽകി എംഎൽഎമാരെ ബിജെപി തങ്ങൾക്കൊപ്പം ചേർക്കുകയാണെന്നും കോൺഗ്രസ് ആരോപിച്ചിരുന്നു. ഈ ആരോപണങ്ങൾ നിഷേധിച്ച് ബിജെപിയും രംഗത്തെത്തിയിരുന്നു.

എഐസിസി ഗോവയുടെ ചുമതലയുള്ള ദിനേശ് ഗുണ്ടു റാവു കോൺഗ്രസ് എംഎൽഎമാരുമായി നടത്തിയ ചർച്ചയുടെ രണ്ടാം ദിവസമായിരുന്നു ഞായറാഴ്ച. ശനിയാഴ്ച, കോൺഗ്രസിന്റെ 11 എംഎൽഎമാർ പനജിയിൽ റാവുവിനെ കണ്ടിരുന്നു. തിങ്കളാഴ്ച ആരംഭിക്കുന്ന നിയമസഭാ സമ്മേളനത്തിന് മുന്നോടിയായി എട്ട് എംഎൽഎമാർ പാർട്ടിയിൽ ഭദ്രമാണെന്ന് തറപ്പിച്ചുപറഞ്ഞു. എംഎൽഎമാർ കൂറുമായതുമായി ബന്ധപ്പെട്ട കിംവദന്തികൾ നിരസിച്ചു.

ഞായറാഴ്ച ഉച്ചയോടെ, റാവുവുമായുള്ള കൂടിക്കാഴ്ചയ്ക്കായി കോൺഗ്രസ് എംഎൽഎമാർ മാർഗാവോ ഹോട്ടലിലേക്ക് പോകുന്നുവെന്ന വിവരം പുറത്തുവന്നതോടെയാണ് എംഎൽഎമാർ ബിജെപിയിലേക്ക് മാറുമെന്ന അഭ്യൂഹം ഉയർന്നത്. 11 എംഎൽഎമാരിൽ മൂന്ന് പേർ മാത്രമാണ് ഹോട്ടലിൽ എത്തിയതെന്നതാണ് ഊഹാപോഹങ്ങൾക്ക് ആക്കം കൂട്ടിയത്.

കൂറുമാറ്റങ്ങളെക്കുറിച്ചുള്ള വാർത്തകൾ ബിജെപി സൃഷ്ടിച്ച കിംവദന്തികളാണെന്ന് ഗോവ പ്രദേശ് കോൺഗ്രസ് കമ്മിറ്റി (ജിപിസിസി) അധ്യക്ഷൻ അമിത് പട്കർ തള്ളി. ബിജെപി മഹാരാഷ്ട്രയിൽ എന്താണ് ചെയ്തതെന്ന് നോക്കൂ. അവർക്ക് പ്രതിപക്ഷം വേണ്ട. അവർ എപ്പോഴും പിളർത്താൻ ശ്രമിക്കുന്നു (പ്രതിപക്ഷ കക്ഷികൾ). ദേശീയതലത്തിൽ, ബിജെപിയെ നേരിടാൻ കഴിയുന്ന ഒരേയൊരു പാർട്ടി കോൺഗ്രസാണ്, അതുകൊണ്ടാണ് അവർ കോൺഗ്രസിനെ ലക്ഷ്യമിടുന്നത്,'' അദ്ദേഹം പറഞ്ഞു.

റാവുവുമായുള്ള കൂടിക്കാഴ്ചയ്ക്ക് ഏഴ് എംഎൽഎമാർ എത്തിയതോടെ മറ്റുള്ളവരും തങ്ങൾക്കൊപ്പം ചേരുമെന്ന് പട്കർ പറഞ്ഞു. കോൺഗ്രസ് എംഎൽഎയും പ്രതിപക്ഷ നേതാവ് മൈക്കിൾ ലോബോയുടെ ഭാര്യയുമായ ദെലീല ലോബോയ്ക്ക് സിയോലിമിൽ നിന്ന് മർഗോവിലേക്ക് വളരെ ദൂരം സഞ്ചരിക്കേണ്ടിവരുമെന്നതിനാൽ വരരുതെന്ന് പറഞ്ഞതായി അദ്ദേഹം പറഞ്ഞു.

മൂന്ന് വർഷം മുമ്പ്, 2019 ജൂലൈ 10 ന്, ഗോവയിൽ 15 നിയമസഭാംഗങ്ങളിൽ 10 പേർ ബിജെപിയിലേക്ക് കൂറുമാറിയപ്പോൾ കോൺഗ്രസിന് വലിയ തിരിച്ചടി നേരിട്ടു. ഈ സംഭവമാണ് ഗോവയിലെ നിയമസഭാ തിരഞ്ഞെടുപ്പിന് മുന്നോടിയായി തങ്ങളുടെ 37 തിരഞ്ഞെടുപ്പ് സ്ഥാനാർത്ഥികളെ 'വിശ്വസ്തതയുടെ പ്രതിജ്ഞ' എടുക്കാൻ കോൺഗ്രസിനെ പ്രേരിപ്പിച്ചത്. ക്ഷേത്രത്തിലും പള്ളിയിലും ദർഗയിലും ചെയ്ത പ്രതിജ്ഞകൾക്ക് പുറമേ, സ്ഥാനാർത്ഥികൾ തങ്ങൾ എംഎൽഎമാരായാൽ അഞ്ച് വർഷത്തേക്ക് കോൺഗ്രസിൽ തുടരുമെന്ന് പ്രഖ്യാപിക്കുന്ന സത്യവാങ്മൂലത്തിലും ഒപ്പുവച്ചു.

''ഞങ്ങളുടെ 11 എംഎൽഎമാരിൽ എട്ട് പേർ പുതിയവരാണ്, ഞാൻ ഇത് ആവർത്തിച്ച് പറഞ്ഞിട്ടുണ്ട്. ഞങ്ങളുടെ പുതിയ എംഎൽഎമാരാരും എവിടെയും പോകില്ല. പാർട്ടി പിളരാൻ പോകുന്നു എന്ന തെറ്റായ സന്ദേശം ജനങ്ങളിൽ എത്തിക്കാനാണ് അഭ്യൂഹങ്ങൾ പരത്തുന്നത്,'' പട്കർ പറഞ്ഞു.