ഗ്രീൻവുഡ്(ഇന്ത്യാന): ഇന്ത്യാന ഗ്രീൻവുഡ് പാർക്കിൽ ഞായറാഴ്ച(ജൂലായ് 17) വൈകീട്ട് 6 മണിക്ക് 22 വയസ്സുക്കാരനായ തോക്കുധാരി നടത്തിയ വെടിവെപ്പിൽ മൂന്നുപേർ കൊല്ലപ്പെടുകയും, മൂന്നാൾക്ക് പരിക്കേൽക്കുകയും ചെയ്തതായി ഗ്രീൻവുഡ് പൊലീസ് ഡിപ്പാർട്ട്മെന്റ് ചീഫ് ജീം ഞായറാഴ്ച വൈകീട്ട് നടത്തിയ വാർത്താ സമ്മേളനത്തിൽ അറിയിച്ചു.
ഈ സമയം അവിടെ ഉണ്ടായിരുന്ന മറ്റൊരു യുവാവ് അക്രമിയെ വെടിവെച്ചു. വെടിയേറ്റ അക്രി സംഭവസ്ഥലത്തുവെച്ചുതന്നെ മരിച്ചു. നിയമപരമായി തോക്കു കൈവശം വയ്ക്കാൻ അനുമതിയുള്ള യുവാവാണ് അക്രമിക്കുനേരെ നിറയൊഴിച്ചത്.
വെടിയേറ്റ നാലുപേരിൽ മൂന്ന് പേർ സ്ത്രീകളും ഒരാൾ പുരുഷനുമാണ്. 12 വയസ്സുള്ള ഒരു കുട്ടിക്കും വെടിയേറ്റിട്ടുണ്ട്.
ഇന്ത്യാന പൊലീസ് മെട്രോപൊലീറ്റൻ പൊലീസും, മറ്റു ഏജൻസികളും സംഭവത്തെ കുറിച്ചു അന്വേഷണം ആരംഭിച്ചിട്ടുണ്ട്. വെടിവെച്ചുവെന്ന് സംശയിക്കുന്ന ചെറുപ്പക്കാരൻ ഒരു റൈഫിളും, നിരവധി മാഗസിനും, കൈയിൽ സൂക്ഷിച്ചിരുന്നുവെന്ന് പൊലീസ് പറഞ്ഞു. പൊലീസ് മരിച്ചവരുടേയും, അക്രമിയുടെയോ, അക്രമിയെ വെടിവെച്ചു കൊലപ്പെടുത്തിയ യുവാവിന്റേയോ വിവരങ്ങൾ പുറത്തുവിട്ടിട്ടില്ല.
അമേരിക്കയിൽ വർദ്ധിച്ചുവരുന്ന വെടിവെപ്പു സംഭവങ്ങൾ ഒഴിവാക്കുന്നതിന് യു.എസ്. ഹൗസ് ജുഡീഷറി കമ്മിറ്റി അസ്സോൾട്ട് വെപ്പൻ നിയന്ത്രിക്കുന്നതിനുള്ള നിയമനിർമ്മാണത്തിന് തയ്യാറാകുമ്പോഴാണ് ഈ പുതിയ സംഭവം.
