ബെംഗളൂരു: രോഗിയുമായി അതിവേഗത്തിൽ സഞ്ചരിക്കവെ ആംബുലൻസ് ടോൾബൂത്തിനടുത്ത് നിയന്ത്രണംവിട്ട് മറിഞ്ഞ് നാല് പേർ മരിച്ചു. കർണാടക ഉഡുപ്പി ജില്ലയിലെ ശിരൂർ ടോൾ പ്ലാസയിൽ ഒരു ടോൾബൂത്തിലാണ് അപകടമുണ്ടായത്. അപകടത്തിന്റെ ഞെട്ടിക്കുന്ന സി.സി.ടി.വി ദൃശ്യങ്ങൾ പുറത്തുവന്നു.

രോഗിയെയും കൂടെയുള്ള രണ്ടുപേരെയും വഹിച്ചാണ് വലിയ ആംബുലൻസ് വന്നത്. ടോൾ ബൂത്തിന്റെ പ്രത്യേക പാതയിലേക്ക് വാഹനം വരുന്നത് കണ്ട ടോൾ ബൂത്ത് ജീവനക്കാർ റോഡിലുള്ള ബാരിക്കേഡ് മാറ്റുന്നതിനിടെ തെന്നിമാറിയ ആംബുലൻസ് ഇടിച്ചുമറിയുകയായിരുന്നു.

ബാരിക്കേഡുകൾ പെട്ടെന്ന് എടുത്തുമാറ്റാൻ ശ്രമിക്കുന്ന ജീവനക്കാരെ സിസിടിവി ദൃശ്യങ്ങളിൽ കാണാം. രണ്ടെണ്ണം ഒരു ജീവനക്കാരൻ എടുത്തുമാറ്റി മാറ്റിയിരുന്നു. മൂന്നാമത്തേത് മറ്റൊരു ജീവനക്കാരൻ മാറ്റിക്കഴിയുന്നതിന് മുന്നെ തെന്നിവന്ന ആംബുലൻസ് ടോൾബൂത്തിന്റെ തൂണിലേക്ക് ഇടിക്കുകയായിരുന്നു. ആംബുലൻസിലുണ്ടായിരുന്ന മൂന്നുപേരും ഒരു ടോൾബൂത്ത് ജീവനക്കാരനുമാണ് അപകടത്തിൽ മരിച്ചത്.

നാലു പേർക്കു പരുക്കേറ്റു. ഇതിൽ രണ്ടു പേരുടെ നില ഗുരുതരമാണ്. റോഡിലെ വെള്ളത്തിൽ തെന്നിമാറിയ ആംബുലൻസ് ടോൾ ബൂത്ത് ക്യാബിനിൽ ഇടിച്ച് മറിയുകയായിരുന്നു.

ന്യൂസ് ഡെസ്‌ക്‌

    ന്യൂസ് ഡെസ്‌ക്‌