മൂന്ന് വർഷത്തിനിടെ തിരിച്ചയച്ചത് 117 ചൈനക്കാരെ; 81 പേർക്ക് നോട്ടീസ് നൽകിയെന്നും കേന്ദ്രസർക്കാർ ലോക്‌സഭയിൽ
ന്യൂഡൽഹി: 2019-2012 കാലയളവിൽ 81 ചൈനീസ് പൗരന്മാർക്ക് ഇന്ത്യ വിട്ടുപോകാനുള്ള നോട്ടീസ് നൽകിയതായി കേന്ദ്ര സർക്കാർ ലോക്‌സഭയിൽ. വിസ വ്യവസ്ഥകൾ ലംഘിച്ചതിനും മറ്റ് നിയമവിരുദ്ധപ്രവർത്തനങ്ങൾ നടത്തിയതിനും 117 പേരെ ചൈനയിലേക്ക് തിരിച്ചയച്ചതായും 726 ചൈനക്കാരെ പട്ടികയിൽ ഉൾപ്പെടുത്തിയതായും കേന്ദ്രമന്ത്രി നിത്യാനന്ദ റായ് വ്യക്തമാക്കി.
സാധുവായ യാത്രാരേഖകളുമായി ഇന്ത്യയിലെത്തുന്ന ചൈനീസ് പൗരന്മാർ ഉൾപ്പെടെയുള്ള എല്ലാ വിദേശീയരുടേയും വിവരങ്ങൾ സർക്കാർ സൂക്ഷിക്കാറുണ്ടെന്നും മന്ത്രി പറഞ്ഞു. അജ്ഞത മൂലമോ ചികിത്സാകാര്യങ്ങൾക്കായോ വ്യക്തിപരമായ കാരണങ്ങളാലോ വിസയുടെ കാലാവധി കഴിഞ്ഞും ചില വിദേശികൾ ഇന്ത്യയിൽ തങ്ങാറുണ്ടെന്നും അദ്ദേഹം കൂട്ടിച്ചേർത്തു. ഇത്തരം സന്ദർഭങ്ങളിൽ പിഴ ചുമത്തി ആവശ്യമെങ്കിൽ വിസ കാലാവധി ദീർഘിപ്പിച്ച് നൽകാറുണ്ടെന്നും നിത്യാനന്ദ് റായ് പറഞ്ഞു.
ദുരുദ്ദേശപരമായോ അന്യായമായോ വിസ കാലാവധി കഴിഞ്ഞും ഇന്ത്യയിൽ കഴിയുന്നവർക്കെതിരെ 1946-ലെ ഫോറിനഴ്സ് ആക്ട് പ്രകാരം നടപടികൾ സ്വീകരിക്കാറുണ്ടെന്നും രാജ്യം വിടാനുള്ള നോട്ടീസ് നൽകാറുണ്ടെന്നും പിഴയും വിസ ഫീയും ഈടാക്കാറുണ്ടെന്നും മന്ത്രി അറിയിച്ചു.
