ഛത്തീസ്‌ഗഢിൽ ഇടിമിന്നലേറ്റ് അഞ്ചുപേർ മരിച്ചു; നാല് പേർക്ക് പരിക്ക്

റായ്പൂർ: ഛത്തീസ്‌ഗഢിൽ ഇടിമിന്നലേറ്റ് അഞ്ചുപേർ മരിച്ചു. ജഞ്ച്ഗിർ-ചമ്പ ജില്ലയിലാണ് അപകടമുണ്ടായത്. ജില്ലയിലെ നാലു ഗ്രമങ്ങളിലായി ശനിയാഴ്ചയുണ്ടായ മിന്നലിൽ നാലുപേർക്ക് പരിക്കേറ്റതായും അധികൃതർ അറിയിച്ചു. ശ്യാം കുമാരി, അനിൽ യാദവ്, മഹേഷ് ഡോംഗ്രെ, ദിലീപ് യാദവ്, വിജയ് റാത്തോഡ് എന്നിവരാണ് മരിച്ചത്

സഹോദരിയോടൊപ്പം വീട്ടിലേക്ക് മടങ്ങുന്നതിനിടെയാണ് കിയാരി സ്വദേശിയായ ശ്യാം കുമാരിക്ക് മിന്നലേറ്റത്. ഗുരുതരമായി പരിക്കേറ്റ സഹോദരിയെ ആശുപത്രിയിൽ പ്രവേശിപ്പിച്ചു. മരിച്ച അനിൽ യാദവും കിയാരി സ്വദേശിയാണ്.

വയലിൽ ജോലിചെയ്യുന്നതിനിടെയാണ് മധുവ സ്വദേശിയായ മഹേഷ് ഡോംഗ്രെക്ക് മിന്നലേറ്റത്. മകനുമായി വീട്ടിലേക്ക് പോകുമ്പോഴാണ് ചോർഭട്ടി സ്വദേശിയായ ദിലീപ് യാദവിന് മിന്നലേറ്റതെന്ന് അധികൃതർ അറിയിച്ചു. സിയോനി സ്വദേശി വിജയ് റാത്തോഡിനും സമാനരീതിയിൽ മിന്നലേൽക്കുകയായിരുന്നു.