അക്കൗണ്ടിൽ കിടന്ന പതിനയ്യായിരം രൂപയിൽ 13,300 രൂപ ഒറ്റയടിക്ക് അപ്രത്യക്ഷമായി..! ബാങ്കിലെത്തി കാര്യം തിരക്കിയപ്പോൾ ഇംഐഎ പിടിച്ചതാകുമെന്ന് ഞഞ്ഞാ..പിഞ്ഞാ.. പറഞ്ഞ് അധികൃതർ; ബാങ്കല്ല, എസ്.ബി.ഐ കൊള്ളസംഘം തന്നെയെന്ന് മാധ്യമ പ്രവർത്തകൻ: ദുരനുഭവം വിവരിച്ച് കെ എ സൈഫുദ്ദീൻ എഴുതുന്നു

അക്കൗണ്ടിൽ പതിനയ്യായിരത്തിനുമേൽ രൂപ ഉണ്ടെന്ന ഉറപ്പോടെയാണ് ഇന്ന് രാവിലെ ഒരു പാന്റ്‌സെടുക്കാൻ കടയിൽ കയറിയത്..

ക്യാഷ് പേ ചെയ്യാൻ എ.ടി.എം/ഡെബിറ്റ് കാർഡെടുത്ത് സ്വൈപ്പ് ചെയ്യുമ്പോൾ എറർ. അക്കൗണ്ടിൽ മതിയായ പണമില്ല... ഞെട്ടിപ്പോയി..
കുറച്ചുമുമ്പ് കാർഡുപയോഗിച്ച് പെട്രോൾ അടിക്കുകയും എ.ടി.എമ്മിൽ നിന്ന് ക്യാഷായി രണ്ടായിരം എടുത്ത് മറ്റൊരാൾക്ക് കൊടുക്കുകയും ചെയ്തതാണ്..
ഇതെന്ത് മറിമായം...?
പാക്ക് ചെയ്ത സാധനം തിരികെ കൊടുത്ത് നേരേ വീട്ടിലത്തെി എസ്‌ബിഐ സൈറ്റിൽ കയറി അക്കൗണ്ട് ഡീറ്റയിൽസ് പരിശോധിക്കുമ്പോൾ കാണാം, 13,300 രൂപ ഡിസംബർ 15ന് അക്കൗണ്ടിൽനിന്ന് വലിച്ചിരിക്കുന്നു. അത് സംബന്ധമായി യാതൊരുവിധ മെസേജോ മറ്റ് അറിയിപ്പോ ഒന്നും വന്നിരുന്നില്ല. ദോഷം പറയരുതല്ലോ, മാസംതോറും എസ്.എം.എസ് സംവിധാനത്തിന്റെ  പേരിൽ അക്കൗണ്ടിൽനിന്ന് കൃത്യമായി പണം പിടിക്കുന്നുണ്ട്.

നേരേ ബാങ്കിലത്തെി കാര്യം ചോദിച്ചപ്പോൾ അവർക്കാർക്കും യാതൊരു വിവരവുമില്ല. തുക പിൻവലിച്ചിരിക്കുന്നു എന്നല്ലാതെ മറ്റൊന്നും അറിയില്ല. ആര് പിൻവലിച്ചു എന്ന ചോദ്യത്തിനും മറുപടി ഇല്ല..

വിശദമായ അന്വേഷണത്തിൽ കാശുപോയ വഴി തെളിഞ്ഞുവരുന്നു...

എസ്‌ബിഐയും എസ്‌ബിറ്റിയും ലയിക്കുന്നതിനും നാല് വർഷം മുമ്പ് വീട് നിർമ്മാണത്തിന് എസ്‌ബിഐയിൽനിന്ന് 10 ലക്ഷം രൂപ ലോണെടുത്തിരുന്നു. അതിന്റെ ഇഎംഐ 13,300 രൂപയാണ്. എന്റെയും വൈഫിന്റെയും പേരിലാണ് ലോൺ എടുത്തിരിക്കുന്നത്. കോഴിക്കോട് മാനാഞ്ചിറയിലെ RASMECCബ്രാഞ്ചിൽനിന്നാണ് ലോൺ. അതിന്റെ തിരിച്ചടവിനായി ഞങ്ങളുടെ പേരിൽ അവിടെ തന്നെ ഒരു ജോയന്റ് എസ്ബി അക്കൗണ്ടുമുണ്ട്. 15ാം തിയതിയാണ് ഇഎംഐ അടയ്‌ക്കേണ്ട ദിവസം. എല്ലാ ദിവസവും 15ന് മുമ്പായി ഈ അക്കൗണ്ടിലേക്ക് ക്യാഷ് എത്തിക്കാറുണ്ട്. തിരിച്ചടവ് തുടങ്ങിയ അന്നു മുതൽ ഇക്കഴിഞ്ഞ ഡിസംബർ 15 വരെ ഒരു തവണ പോലും ഇഎംഐ മുടങ്ങിയിട്ടില്ല. (എന്നിട്ടും രണ്ടുതവണ ഇഎംഐ മുടങ്ങിയെന്ന പേരിൽ 1800 രൂപ പിഴയായി ഈടാക്കിയിരുന്നു. അക്കൗണ്ട് ഡീറ്റെയിൽസിന്റെ പ്രിന്റുമായി ബ്രാഞ്ചിലത്തെി ബോധ്യപ്പെടുത്തിയപ്പോൾ അത് തിരികെ ക്രെഡിറ്റ് ചെയ്തു)

കോഴിക്കോട് വെള്ളിമാടുകുന്നിലെ എസ്‌ബിറ്റി ബ്രാഞ്ചിലാണ് ഞങ്ങളുടെ സാലറി അക്കൗണ്ട്. എസ്‌ബിഐയിൽ ലയിക്കുന്നതുവരെ വലിയ കുഴപ്പമില്ലാതെ പോയതാണ്്. ലയിച്ചുകഴിഞ്ഞപ്പോൾ മുതൽ കഷ്ടകാലവും തുടങ്ങി. ഇക്കഴിഞ്ഞ ഡിസംബർ 15ന് മാനാഞ്ചിറയിലെ ഞങ്ങളുടെ ജോയന്റ് അക്കൗണ്ടിൽനിന്നും എന്റെ സാലറി അക്കൗണ്ടിൽനിന്നും ഒരേ പോലെ 13,300 രൂപ വീതം പിടിച്ചിരിക്കുന്നു. അതാണ് അക്കൗണ്ടിലെ പണം ആവിയായി പോയതിനു കാരണം.

ഇഎംഐ അടയ്ക്കുന്നതിൽ വീഴ്ചവരുത്താത്ത ഒരാളിൽ നിന്ന് ഒരേ ദിവസം എങ്ങനെയാണ് രണ്ട് ഇഎംഐ പിടിക്കുക...? മാത്രവുമല്ല, എന്റെ സാലറി അക്കൗണ്ടിൽനിന്ന് പണം ഇഎംഐ പിടിക്കാൻ ഞാൻ യാതൊരുവിധ സ്റ്റാൻഡിങ് ഇൻസ്ട്രക്ഷനും കൊടുത്തിട്ടില്ലെന്നിരിക്കെ എന്റെ അറിവോ സമ്മതമോ ഇല്ലാതെ എന്റെ അക്കൗണ്ടിലെ പണം എങ്ങനെയാണ് മറ്റൊരിടത്തേക്ക് മാറ്റുക..? അപ്പോൾ എന്തു സുരക്ഷയാണ് കസ്റ്റമറുടെ പണത്തിനുള്ളത്...?

ഈ ചോദ്യങ്ങൾക്കൊന്നും ബ്രാഞ്ച് മാനേജർക്ക് മറുപടിയില്ല. നിങ്ങളുടെ പണം ഞങ്ങൾ എടുത്തിട്ടില്ല എന്നായി അവർ. 'പിന്നെ ഞാൻ വന്നു കുത്തിപ്പൊളിച്ച് എടുത്തോണ്ടു പോയതാണോ..?' എന്നായി ഞാൻ...

എടുത്തിടത്തു പോയി ചോദിക്കൂ എന്നാണ് അവരുടെ ഹുങ്കോടെയുള്ള മറുപടി.
'എന്റെ സാലറി നിങ്ങളുടെ ബ്രാഞ്ചിലെ അക്കൗണ്ടിലാണ് എത്തിയത്. നിങ്ങൾ ഈ ബ്രാഞ്ചിന്റെ മാനേജറാണ്. ഞാൻ ഈ ബാങ്കിലെ കസ്റ്റമറും. ഞാൻ വന്നു ചോദിക്കുമ്പോൾ എന്റെ പണം തന്നേപറ്റൂ. അതിനു പറ്റില്ലെങ്കിൽ പിന്നെ നിങ്ങളെന്തിനാണ് ബ്രാഞ്ച് മാനേജറായിരിക്കുന്നത്....?'
അങ്ങനെ കലഹം മൂർഛിക്കുന്നതിനിടയിൽ അവർ പറയുന്നു ഞാൻ ഇഎംഐ അടയ്ക്കാത്തതുകൊണ്ട് പിടിച്ചതായിരിക്കും, അല്ലെങ്കിൽ ഫ്രീസ് ചെയ്തതായിരിക്കും എന്ന്.
കൺട്രോളു പോകാൻ വേറേ വല്ലതും വേണോ...!

'നിങ്ങളുടെ ബ്രാഞ്ചിൽനിന്ന് ഞാൻ ലോണെടുത്തിട്ടുണ്ടോ..?'
'ഇല്ല...'
'മറ്റൊരിടത്തുനിന്ന് എടുത്ത ലോണിന് ഇവിടുത്തെ അക്കൗണ്ടിൽനിന്ന് പണമെടുക്കാൻ സ്റ്റാൻഡിങ് ഇൻസ്ട്രക്ഷൻ തന്നിട്ടുണ്ടോ..?'
'ഇല്ല...'
'പിന്നെ എന്റെ പണം എവിടെപ്പോയി..?'
'അതെനിക്കറിയില്ല...'
ഞാൻ പുറത്തുപോയി രണ്ട് അക്കൗണ്ടിന്റെയും ആറുമാസത്തെ സ്‌റ്റേറ്റ്‌മെന്റിന്റെ പ്രിന്റെടുത്ത് അവരുടെ മുന്നിൽ കൊണ്ടുപോയി കാണിച്ചു.
അതിൽ രണ്ട് അക്കൗണ്ടിൽ നിന്നും ഒരേ ദിവസം 13,300 രൂപ ഇഎംഐ പിടിച്ചിരിക്കുന്നു..

ഒടുവിൽ അവർ പറയുകയാണ് 'നിങ്ങൾ ഒരു പരാതി എഴുതിത്ത്ത്ത്ത്തരൂ, മുകളിലേക്ക് അയക്കാം... ഞങ്ങൾ അന്വേഷിക്കാം' എന്ന് ...' ഞാൻ പറഞ്ഞു പരാതി നിങ്ങൾ എഴുതി മോളിൽ കൊടുത്താൽ മതി. 'എന്റെ ബ്രാഞ്ചിലെ കസ്റ്റമറുടെ പണം കാണുന്നില്ല, തിരികെ തരണമെന്ന്..'

അവസാനം, 24 മണിക്കൂറിനുള്ളിൽ പണം എന്റെ അക്കൗണ്ടിൽ എത്തിച്ചില്ലെങ്കിൽ നാളെ ബാങ്കിന്റെ നടയിൽ കുത്തിയിരിക്കുമെന്ന് അന്ത്യശാസനം കൊടുത്തിരിക്കുകയാണ്...

മുമ്പും ഇതേപോലെ ഇഎംഐ തിയതിക്കു മുമ്പായി എന്റെ സാലറി അക്കൗണ്ടിൽനിന്ന് പണം പിടുങ്ങിയപ്പോൾ അത് ബാങ്ക് ലയിപ്പിച്ചതുകൊണ്ട് സർവറിലുണ്ടായ ആശയക്കുഴപ്പമാണ്, ഇനിയുണ്ടാവില്ല എന്നു പറഞ്ഞതാണ്..
നാളെ മിക്കവാറും കലാപം നടത്തേണ്ടിവരുമെന്നാ തോന്നുന്നത്...

പ്രത്യേക ശ്രദ്ധയ്ക്ക്
----------------------
കണക്കും കാര്യവും സൂക്ഷ്മമായി നോക്കി പോകുന്നതുകൊണ്ടും അതിനു മാത്രമുള്ള പണമേ നമ്മുടെ കൈയിൽ ഉള്ളൂ എന്നതിനാലുമാണ് ഇങ്ങനെ അക്കൗണ്ട് ആവിയായി പോകുന്നത് തിരിച്ചറിയാൻ കഴിഞ്ഞത്. അങ്ങനെയല്ലാത്തവരുടെ അക്കൗണ്ടുകളിൽ എന്തു നടക്കുന്നു പണം എങ്ങോട്ടു പോകുന്നു എന്നൊക്കെ ഇടയ്ക്കിടെ പരിശോധിച്ചു നോക്കുന്നത് നന്നായിരിക്കും...
കാരണം, മൂത്രമൊഴിക്കാനുള്ള കാശടയ്ക്കൽ പോലും അക്കൗണ്ട് വഴിയേ നടക്കൂ എന്ന് നിയമം പാസാക്കിയിരിക്കെ പ്രത്യേകിച്ചും...