സ്‌കൂള്‍ വിട്ട് തനിച്ച് വീട്ടിലേക്ക് പോകുകയായിരുന്ന 10-ാംക്ലാസുകാരിയെ പീഡിപ്പിക്കാന്‍ ശ്രമം; മലപ്പുറത്ത് 28കാരന്‍ പിടിയില്‍
പത്താം ക്ലാസുകാരിയെ പീഡിപ്പിക്കാന്‍ ശ്രമിച്ച 28 കാരന്‍ പിടിയില്‍
മലപ്പുറം: സ്‌കൂള്‍ വിട്ട് വീട്ടിലേക്ക് പോകുകയായിരുന്ന 10-ാംക്ലാസുകാരിയെ വിജനമായ സ്ഥലത്തേക്ക് ബലം പ്രയോഗിച്ച് കൂട്ടികൊണ്ടുപോയി പീഡിപ്പിക്കാന്‍ ശ്രമിച്ച സംഭവത്തില്‍ പ്രതി പിടിയില്‍. അകമ്പാടം എരഞ്ഞിമങ്ങാട് പൂക്കോളന്‍ നിഷാദി (28)നെയാണ് ഇന്‍സ്പെക്ടര്‍ മനോജ് പറയറ്റയുടെ നേതൃത്വത്തില്‍ അറസ്റ്റ് ചെയ്തത്. ജൂണ്‍ 19നാണ് കേസിനാസ്പദമായ സംഭവം.
പത്താം ക്ലാസ്സ് വിദ്യാര്‍ത്ഥിനിയായ പെണ്‍കുട്ടി രാവിലെ ക്ലാസ് കഴിഞ്ഞ് വീട്ടിലേക്ക് മടങ്ങുകയായിരുന്നു. തനിച്ച് പോവുകയായിരുന്ന പെണ്‍കുട്ടിയെ പിന്തുടര്‍ന്ന പ്രതി എരഞ്ഞിമങ്ങാട് ഫോറസ്റ്റ് ഓഫീസിനു സമീപം എത്തിയപ്പോള്‍ ബലം പ്രയോഗിച്ച് പെണ്‍കുട്ടിയുടെ ഷാള്‍ കൊണ്ട് കൈകള്‍ പിറകിലേക്ക് കെട്ടി തൊട്ടടുത്ത കുറ്റിക്കാട്ടിലേക്ക് പിടിച്ച് വലിച്ച് കൊണ്ട് പോയി പീഡിപ്പിക്കാന്‍ ശ്രമിക്കുകയായിരുന്നു.
പെണ്‍കുട്ടിയുടെ നിലവിളി കേട്ട് ആളുകള്‍ വരുന്നത് കണ്ട് പ്രതി കുട്ടിയെ ഉപേക്ഷിച്ച് കാട്ടില്‍ ഓടി ഒളിക്കുകയായിരുന്നു. തുടര്‍ന്ന് പെണ്‍കുട്ടിയുടെ മൊഴി പ്രകാരം പോലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. പ്രതിയുടെ ശരീരഘടനയെ കുറിച്ചും പ്രായത്തെ കുറിച്ചും പെണ്‍കുട്ടി നല്‍കിയ ചില സൂചനകള്‍ മാത്രമാണ് പോലീസിന് മുന്നിലുണ്ടായിരുന്ന തെളിവ്.
ഇതിന്റെ അടിസ്ഥാനത്തില്‍ രേഖാചിത്രം തയ്യാറാക്കിയും പ്രദേശത്തെ സിസിടിവികള്‍ പരിശോധിച്ചും, സമാന കുറ്റകൃത്യത്തിലുള്‍പ്പെട്ട പ്രതികളെ കേന്ദ്രീകരിച്ചും നടത്തിയ അന്വേഷണത്തിലാണ് പ്രതിയെ കുറിച്ച് സൂചന ലഭിച്ചത്. പ്രതിയെ നിലമ്പൂര്‍ കോടതിയില്‍ ഹാജരാക്കി.എ.എസ്.ഐ ഇ.എന്‍.സുധീര്‍, എസ്.സി.പി.ഒ ബിജേഷ്, പ്രിന്‍സ്.കെ, സിപിഒമാരായ ഉജേഷ്, അജിത്, അനസ്, മനു, സന്ധ്യ എന്നിവരും ചേര്‍ന്നാണ് പ്രതിയെ പിടികൂടിയത്.
