അബുദാബി: അബുദാബി ബിഗ് ടിക്കറ്റ് നറുക്കെടുപ്പിൽ വീണ്ടും മലയാളിയെ തേടി കോടികളുടെ ഭാഗ്യം. 2.5 കോടി ദിർഹം അതായത് 50 കോടിയിലധികം രൂപയുടെ ഒന്നാം സമ്മാനമാണ് ഹോട്ടൽ തൊഴിലാളിയായ മലയാളിക്ക് ലഭിച്ചത്. ബിഗ് ടിക്കറ്റിന്റെ 245 -ാം സീരീസ് നറുക്കെടുപ്പിലാണ് എൻ. എസ്. സജേഷ് ഒന്നം സമ്മാനം സ്വന്തമാക്കിയത്. ദുബായിൽ താമസിക്കുന്ന സജേഷ് രണ്ടു വർഷം മുൻപാണ് ഒമാനിൽ നിന്നു യുഎഇയിൽ എത്തിയത്.
ബിഗ് ടിക്കറ്റിൽ കഴിഞ്ഞ നാലുവർഷമായി ഭാഗ്യം പരീക്ഷിക്കുന്ന ആളാണ് സജേഷ്. എല്ലാ മാസവും സജേഷ് ബിഗ് ടിക്കറ്റ് വാങ്ങിയിരുന്നു. സമ്മാനാർഹമായ ടിക്കറ്റ് ഓൺലൈനായി 20 സുഹൃത്തുക്കളുമായി ചേർന്നാണ് വാങ്ങിയത്. സമ്മാന തുക ഇവരുമായി പങ്കിട്ടെടുക്കും. സജേഷ് വാങ്ങിയ 316764 എന്ന ടിക്കറ്റ് നമ്പരാണ് സമ്മാനത്തിന് അർഹമായത്.
'ജോലി ചെയ്യുന്ന ഹോട്ടലിൽ 150ൽ അധികം ജോലിക്കാരുണ്ട്. ഇവരിൽ പലരെയും സഹായിക്കാൻ ആഗ്രഹിക്കുന്നു'. പണം എങ്ങനെ ചെലവഴിക്കുമെന്ന ചോദ്യത്തിന് സജേഷിന്റെ മറുപടി ഇതായിരുന്നു. ബിഗ് ടിക്കറ്റിൽ ഭാഗ്യപരീക്ഷണം തുടരുമെന്നും അദ്ദേഹം പറഞ്ഞു.
