അബുദാബി: യുഎഇയിൽ കുടുംബസമേതം എത്താൻ ആഗ്രഹിക്കുന്നവർക്ക് കുടുംബ ഗ്രൂപ്പ് വിസ നൽകാൻ അധികൃതർ. 60, 180 ദിവസ കാലാവധിയുള്ള സിംഗിൾ, മൾട്ടിപ്പിൾ എൻട്രി വീസകളാണു ലഭിക്കുക. വിനോദസഞ്ചാരം, ചികിത്സ തുടങ്ങിയവയ്ക്കായി കുടുംബസമേതം എത്താൻ ആഗ്രഹിക്കുന്നവർക്കാണ് ഈ വിസ നൽകുക. രോഗികളെ അനുഗമിക്കുന്നവരെയും ഈ വീസയിൽ കൊണ്ടുവരാനാകും.
എന്നാൽ കുടുംബ ഗ്രൂപ്പ് വിസയെ കുറിച്ചുള്ള കൂടുതൽ വിവരങ്ങൾ പുറത്ത് വിട്ടിട്ടില്ല. വിശദാംശങ്ങൾ പിന്നീടു പ്രഖ്യാപിക്കുമെന്ന് അധികൃതർ വ്യക്തമാക്കി. യുഎഇ താമസ വീസയുള്ളവർക്ക് മാതാപിതാക്കൾ, ജീവിതപങ്കാളി, മക്കൾ എന്നിവരെ സ്വന്തം സ്‌പോൺസർഷിപ്പിൽ 90 ദിവസത്തെ വീസയിൽ കൊണ്ടുവരാനാകും. 750 (ഏകദേശം 16,892 രൂപ) ദിർഹമാണ് വീസ ഫീസ്. ബാങ്ക് ഗ്യാരന്റിയായി നിക്ഷേപിക്കുന്ന 1000 ദിർഹം വീസയുടമ മടങ്ങിയാൽ തിരികെ ലഭിക്കും.
അതേസമയം വ്യക്തിഗത വീസ എടുക്കണമെങ്കിൽ കുറഞ്ഞത് 8000 ദിർഹമോ (1,80,000 രൂപ) അതിൽ കൂടുതലോ ശമ്പളം ഉള്ളവരായിരിക്കണം. സ്വന്തം പേരിൽ കെട്ടിട വാടകക്കരാർ ഉണ്ടായിരിക്കണം.
അതേസമയം യുഎഇയിൽ 30, 60, 90 ദിവസ കാലാവധിയുള്ള വ്യക്തിഗത സന്ദർശക വീസ രാജ്യം വിടാതെ 30 ദിവസത്തേക്കുകൂടി പുതുക്കാം.1000 ദിർഹമാണു (ഏകദേശം 22,521 രൂപ) ചെലവ്.
