ഷിക്കാഗോ: അമേരിക്കയിൽ നിന്നും ഇന്ത്യൻ വിദ്യാർത്ഥിയെ കാണാതായതായി റിപ്പോർട്ട്. ഹൈദരാബാദിൽ നിന്നുള്ള രൂപേഷ് ചന്ദ്ര ചിന്തകിണ്ടിയെ ആണ് ഷിക്കാഗോയിൽ നിന്നും കാണാതായത്. രൂപേഷിനെ കുറിച്ച് ഒരാഴ്ചയായിട്ടും യാതൊരു വിവരവുമില്ലെന്നാണ് റിപ്പോർട്ട്. വിസ്‌കോൺസിനിലെ കോൺകോർഡിയ യൂണിവേഴ്സിറ്റിയിൽ ബിരുദാനന്തര ബിരുദത്തിന് പഠിക്കുന്ന 25 കാരനായ രൂപേഷിനെ കുറിച്ച് മെയ് രണ്ടു മുതൽ യാതൊരു വിവരവുമില്ലെന്ന് കോൺസുലേറ്റ് അറിയിച്ചു.

വിശദവിവരത്തിനായി പൊലീസുമായും ഇന്ത്യൻ പ്രവാസികളുമായും ബന്ധപ്പെട്ടിട്ടുണ്ടെന്ന് ഷിക്കാഗോയിലെ ഇന്ത്യൻ കോൺസുലേറ്റ് ജനറൽ അറിയിച്ചു. രൂപേഷിനെ കണ്ടെത്തുകയാണെങ്കിൽ പൊലീസിൽ വിവരം നൽകണമെന്ന് ഷിക്കാഗോ പൊലീസ് പ്രസ്താവനയിൽ അഭ്യർത്ഥിച്ചു. എൻ ഷെരിഡൻ റോഡിലെ 4300 ബ്ലോക്കിൽ നിന്നാണ് ഇയാളെ കാണാതായതെന്നാണ് വിവരം.

സമീപകാലത്ത് ഇന്ത്യൻ സമൂഹത്തിൽ ഇത്തരം ദുരന്തങ്ങൾ വർധിച്ചുവരികയാണ്. ഏപ്രിലിൽ, ഒഹായോയിലെ ക്ലീവ്‌ലാൻഡിൽ ഉമ സത്യ സായി ഗദ്ദെ എന്ന ഇന്ത്യൻ വിദ്യാർത്ഥി മരിച്ചിരുന്നു. പൊലീസ് അന്വേഷണം നടന്നുവരികയാണ്.