ലക്ഷക്കണക്കിന് ആരാധകരുള്ള താരസുന്ദരി, ഫാഷൻ- മോഡലിങ്ങ് രംഗത്തെ വിലപിടിച്ച താരം, ഹോളിവുഡ് സിനിമകളിലും വേഷമിട്ട നടി, കത്തുന്ന സൗന്ദര്യത്തിനൊപ്പം ബുദ്ധിപരമായി സംസാരിക്കുള്ള കഴിവുമുള്ള അഭിനേത്രി... ജാക്വിലിൻ ഫെർണാണ്ടസ് എന്ന ശ്രീലങ്കയിൽനിന്ന് വന്ന് ബോളിവുഡിൽ തിളങ്ങിയ നടിക്ക് മാധ്യമങ്ങൾ കൊടുക്കുന്ന വിശേഷണങ്ങൾ ഏറെയാണ്. 'ജ്വാകിലിൻ ബിൽഡ്സ്' എന്ന തന്റെ ജീവകാരണ്യ പ്രവർത്തന സംഘടനയുടെ ബാനറിൽ, പ്രളയകാലത്ത് കേരളത്തെ സഹായിക്കാൻപോലും ഓടിയെത്തി ഈ നടി. പക്ഷേ ഇന്ന് ഇത്തരം നല്ല വാർത്തകളല്ല, കള്ളപ്പണം വെളുപ്പിക്കലിന്റെയും തട്ടിപ്പ് കേസിന്റെയും പേരിയാണ് ഈ സുന്ദരി അറിയപ്പെടുന്നത്!

കുപ്രസിദ്ധ തട്ടിപ്പുകാരൻ സുകേഷ് ചന്ദ്രശേഖർ, ഭാര്യയും നടിയുമായ ലീന മരിയപോൾ തുടങ്ങിയവർ പ്രതികളായ 200 കോടി രൂപയുടെ സാമ്പത്തിക തട്ടിപ്പുകേസിലാണ് ജാക്വിലിനെയും പ്രതിചേർത്തിരുന്നത്. സുകേഷിൽനിന്ന് കോടിക്കണക്കിന് രൂപയുടെ സമ്മാനങ്ങൾ ജാക്വിലിൻ കൈപ്പറ്റിയെന്നായിരുന്നു എൻഫോഴ്സ്മെന്റ് ഡയറക്ടറേറ്റിന്റെ കണ്ടെത്തൽ. തുടർന്നാണ് ജാക്വിലിനെയും ഇ.ഡി. കേസിൽ പ്രതിചേർത്തത്. കേസിൽ നടി ജാക്വിലിൻ ഫെർണാണ്ടസിന് നേരിട്ട് പങ്കുണ്ടെന്ന് ഡൽഹി ഹൈക്കോടതിയിൽ ഇ ഡി റിപ്പോർട്ട് നൽകിത് കഴിഞ്ഞ ദിവസമാണ്. ജാക്വിലിൻ സത്യം മറച്ചുവെന്നും കേസിൽ കുറ്റവാളിയായ, കൊടും ക്രിമിനൽ സുകേഷ് ചന്ദ്രശേഖറിന്റെ വരുമാനം കൈവശം വെച്ചതിലും ഉപയോഗിച്ചതിലും നടിക്ക് ബോധപൂർവം പങ്കുണ്ടെന്നാണ് ഇ ഡി കണ്ടെത്തൽ.

സുകേഷ് ചന്ദ്രശേഖറിന്റെ അറസ്റ്റിന് ശേഷം, ജാക്വിലിൻ ഫോണിൽ നിന്ന് മുഴുവൻ വിവരങ്ങളും നീക്കം ചെയ്തായി ഇ ഡി പറയുന്നു. തെളിവുകൾ നശിപ്പിക്കാൻ അവർ സഹപ്രവർത്തകരോട് ആവശ്യപ്പെട്ടു. കുറ്റകൃത്യത്തിൽ നിന്നുള്ള വരുമാനം അവർ ആസ്വദിക്കുകയും ഉപയോഗിക്കുകയും കൈവശം വയ്ക്കുകയും ചെയ്തിരുന്നെന്നത് സംശയാതീതമായി തെളിഞ്ഞുവെന്നും ഇഡി റിപ്പോർട്ടിൽ പറയുന്നു.

സുകേഷ് ഉൾപ്പെട്ട കള്ളപ്പണം വെളുപ്പിക്കൽ കേസിൽ തനിക്കെതിരായ എഫ്‌ഐആർ റദ്ദാക്കണമെന്ന് ആവശ്യപ്പെട്ട് നടി നൽകിയ അപേക്ഷയ്ക്ക് മറുപടിയായി സമർപ്പിച്ച സത്യവാങ്മൂലത്തിലാണ് ഇഡിയുടെ വാദം. ഇത് ബോളവുഡിൽ ശരിക്കും ഞെട്ടലുണ്ടാക്കിയിരിക്കാണ്. കാരണം ജാക്വിലൻ മാത്രമല്ല, ഒരുപാട് നടിമാർ ഈ വിഷയത്തിൽ പെടാൻ സാധ്യയതുണ്ട്. ഇത്രയും, ബുദ്ധിയും സാമർത്ഥ്യവും ഉണ്ടായിട്ടും ജാക്വലിൻ എങ്ങനെയാണ്, സുകേഷ് ചന്ദ്രശേഖർ എന്ന ഗജഫ്രോഡിന്റെ വലയിൽ വീണത് എന്നുമാണ് ചോദ്യമുയരുന്നത്.

ലങ്കയിൽനിന്നെത്തി ഇന്ത്യ കീഴടക്കി!

'രാവണന്റെ നാട്ടിൽനിന്നെത്തി, രാമന്റെ നാട് കീഴടക്കിയ കിന്നര സുന്ദരി' എന്നാണ് ഒരു ഫാഷൻ മാസിക, ജാക്വിലിനെക്കുറിച്ചുള്ള ഫോട്ടോഷൂട്ടിന് തലക്കെട്ട് ഇട്ടത്. ശ്രീലങ്കൻ സ്വദേശിയാണ് അവർ. 1985 ഓഗസ്റ്റ് 11ന് ബഹറൈനിലാണ് ജാക്വിലിൻ ജനിക്കുന്നത്. ശ്രീലങ്കൻ വംശജനായ എലനോയ് ഫെർണാണ്ടസ് ആണ് പിതാവ്. അദ്ദേഹത്തിന് ബഹറൈനിൽ ആയിരുന്നു ബിസിനസ്.
അമ്മ കിം, മലേഷ്യൻ- കനേഡിയൻ വംശജയാണ്. ഗൾഫിലും ലങ്കയിലുമായി പ്രാഥമിക വിദ്യാഭ്യാസം പുർത്തിയാക്കിയ ജാക്വിലൻ, സിഡ്നി യൂണിവേഴ്സിറ്റിയിൽ നിന്ന് മാസ് കമ്മ്യൂണിക്കേഷനിൽ ബിരുദം നേടി. തുടർന്ന് ശ്രീലങ്കയിലെ ഒരു ടെലിവിഷൻ ചാനലിൽ റിപ്പോർട്ടർ ആയി ജോലി ചെയ്തു. 2006ൽ മിസ്സ് യൂണിവേർസ് ശ്രീലങ്ക കിരീടം നേടി. 2009-ൽ ഇന്ത്യയിൽ മോഡലിങ് രംഗത്ത് പ്രവേശിച്ചതോടെയാണ് അഭിനയ മേഖലയിലേക്ക് എത്തുന്നത്.

ബോളിവുഡിൽ അലാദ്ദീൻ എന്ന സിനിമയിലൂടെയാണ് ജാക്വിലിൻ അരങ്ങേറിയത്. 15 വർഷങ്ങൾ കൊണ്ട് ബോളിവുഡിലെ ശ്രദ്ധേയ താരമായി ഈ ശ്രീലങ്കൻ സുന്ദരി മാറി. മർഡർ 2, ഹൗസ്ഫുൾ 2, റേസ് 2, കിക്ക്, റോയ്, ഹൗസ്ഫുൾ 3, ബാഗി 2, റേസ് 3, സാഹോ, മിസിസ് സീരിയൽ കില്ലർ തുടങ്ങി നിരവധി സിനിമകളുടേയും വെബ് സീരീസുകളുടേയും ഭാഗമായിട്ടുണ്ട് ജാക്വിലിൻ. ഹോളിവുഡിലേക്കും താരം ചുവടുവെച്ചു. അഭിനയത്തിനൊപ്പം യോഗ, ഹോഴ്സ് റൈഡിങ് തുടങ്ങിയവ ആണ് ജാക്വിലിന്റെ ഹോബികൾ. അതുപോലെ ഫിറ്റ്നസിന് ഏറെ പ്രാധാന്യം നൽകുന്ന ജാക്വിലിൻ എല്ലാ ദിവസവും യോഗ പരിശീലിക്കുന്നുണ്ട്. നായികയായും അതേ സമയം ഐറ്റം ഡാൻസറായും അവർ തിളങ്ങുന്നു.

തന്റെ സൗന്ദര്യം പ്രദർശിപ്പിച്ചുകൊണ്ടുള്ള ചൂടൻ ഫോട്ടോ ഷുട്ടുകളാണ് ജാക്വിലിനെ ഏറെ ശ്രദ്ധേയയാക്കിയത്. ഈ ശ്രീലങ്കൻ സൗന്ദര്യത്തിന് ഇന്ത്യയിൽ നിരവധി ആരാധകരുണ്ട്. തിളക്കമുള്ള ചർമ്മം, നല്ല കണ്ണുകൾ ,സുന്ദരമായ മുടി ഇതെല്ലാമാണ് താരത്തെ ആകർഷകയാക്കുന്നത്. ധാരാളം വെള്ളം കുടിക്കുന്നതും യോഗ ചെയ്യുന്നതുമാണ് സൗന്ദര്യം നിലനിർത്താൻ ചെയ്യുന്ന കാര്യങ്ങളെന്ന് താരം വെളിപ്പെടുത്തിയിരുന്നു. തന്റെ വിശേഷങ്ങളും ഫോട്ടോഷൂട്ട് ചിത്രങ്ങളുമെല്ലാം താരം പങ്കുവെക്കാറുണ്ട്. 2020ൽ കോവിഡകാലത്ത് അവർ പങ്കുവെച്ച അർധനഗ്നയായി ഇരിക്കുന്ന ചിത്രങ്ങൾ സോഷ്യൽ മീഡിയയെ ശരിക്കും ചൂടുപിടിപ്പിച്ചു.

ഇങ്ങനെയൊക്കെ ആണെങ്കിലും ഒരു ഘട്ടത്തിലും ബോളിവുഡിലെ ഒന്നാം കടി നടിയായി മാറാൻ അവർക്ക് കഴിഞ്ഞില്ല. ഇടക്ക് ഒരു ഘട്ടത്തിൽ അവസരം വല്ലാതെ കുറഞ്ഞു. ഈ സമയം നോക്കിയാണ്, ഖില്ലാഡിയോക്കാം ഖില്ലാഡി എന്ന് വിളിക്കാവുന്ന ഭൂലോക ഫ്രോഡ് സുകേഷ് ചന്ദ്രശേഖർ അവളുടെ ജീവിതത്തിലേക്ക് കടന്നുവരുന്നത്. സുകേഷിന്റെ കഥ പറയാതെ ജാക്വിലിന്റെ ജീവിതം പൂർണ്ണമാവില്ല.

ശോഭ്രാജിന് തുല്യനായ ഫ്രോഡ്

ചാൾസ് ശോഭ്രാജിനുശേഷം ഇന്ത്യ കണ്ട ഏറ്റവും വലിയ ഫ്രോഡ് എന്നാണ്, കർണ്ണാടകയിൽനിന്ന് പത്താംക്ലാസും ഗുസ്തിയുമായി ഡൽഹിക്ക് വണ്ടികയറി, ഇപ്പോൾ തിഹാർ ജയിലിൽ കോടികളുടെ തട്ടിപ്പുകേസിൽ പ്രതിയായി കിടക്കുന്ന സുകേഷ് ചന്ദ്രശേഖർ അറിയപ്പെടുന്നത്. മലയാളിയായ നടി ലീന മരിയപോളിന്റെ ഭർത്താവാണ് ഇദ്ദേഹം. ലീനയും ഈ തട്ടിപ്പ്കേസിൽ പ്രതിയാണ്. ശോഭ്രാജ് ജയിനുള്ളിൽ കിടന്നും അധോലോക പ്രവർത്തനങ്ങൾ നടത്തി. എന്തിന് ജയിൽ അധികൃതരെ സ്വാധീനിച്ച് തന്നെ കാണാൻ വരുന്ന ആരാധക സ്ത്രീകളോടൊപ്പും ജയിൽ സൂപ്രണ്ടിന്റെ മുറിയിൽ ശയിച്ചു! ഒടുവിൽ തന്റെ ബർത്തേഡേ ആഘോഷിക്കാനെന്ന പേരിൽ മയക്കുമരുന്ന് കലർത്തിയ ലഡു നൽകി, ജയിൽ ജീവനക്കാരെ മുഴുവൻ വീഴ്‌ത്തി കൂളായി ഗേറ്റിലൂടെ നടന്ന്പോവുകയും ചെയ്തു. അതുപോലെ ജയിലനകത്ത് കിടക്കുന്നവരായിരുന്നു സുകേഷിന്റെ ഇര. അവരെ പുറത്തിറക്കാമെന്ന് പറഞ്ഞാണ് അയാൾ നൂറും, ഇരുനൂറും കോടിയുടെ തട്ടിപ്പ് നടത്തിയത്്.

സുകേഷ് ചന്ദ്രശേഖർ കർണാടകയിലെ ബംഗളുരുവിൽ ഒരു ഇടത്തരം കുടുംബത്തിലാണ് ജനിച്ചത്. അവൻ ഒരിക്കലും പഠനത്തിൽ താൽപ്പര്യം കാണിച്ചിരുന്നില്ല. വളരെ ചെറുപ്പം മുതലേ കോടീശ്വരനാകുകയയിരുന്നു ലക്ഷ്യം. 17 വയസ്സുള്ളപ്പോൾ, തുടങ്ങിയതാണ് ഇയാളുടെ തട്ടിപ്പ് ജീവിതമെന്നാണ് ഇന്ത്യൻ എക്പ്രസ് പറയുന്നത്. കർണാടകയിൽ എവിടെയും മോട്ടോർ ബൈക്കും കാറും പ്രവർത്തിപ്പിക്കാൻ അനുമതിയുണ്ടെന്ന് കാണിച്ച് ബംഗളൂരു പൊലീസ് കമ്മീഷണറുടെ വ്യാജ കത്ത് കൈവശംവെച്ചതാണ് ആദ്യത്തെ പിടിക്കപ്പെട്ട കുറ്റകൃത്യം. 2007ൽ ആദ്യമായി അറസ്റ്റിലാവുകയും ചെയ്തു. ഒരു വ്യവസായിയെ വഞ്ചിച്ച് 1.15 കോടി രൂപ തട്ടിയശേഷം പിന്നീട് ചെന്നൈയിലേക്ക് താമസം മാറി. പിന്നീടങ്ങോട്ട് വിവിധ പ്രദേശങ്ങളിൽ സിനിമാ സ്റ്റെൽ തട്ടിപ്പായിരുന്നു. മുഖ്യമന്ത്രിയുടെ മകനായും പിഎംഒ ഉദ്യോഗസ്ഥനായും, ജഡ്ജിയായും, അമിത്ഷായുടെ സെക്രട്ടറിയായും, സൺടീവി ഉടമയായും, ജയലളിതയുടെ മരുമകനായുമൊക്കെ പറഞ്ഞ് ഡൽഹി മുതൽ മുംബൈവരെയുള്ള വവിധി സെലിബ്രിറ്റികളെ പറ്റിച്ചു. നടിമാരെ ജീവിത പങ്കാളിയാക്കി.

2010-ൽ മദ്രാസ് കഫേയിൽവച്ചാണ് നടിയും മോഡലുമായ ലീന മരിയ പോളിനെ അദ്ദേഹം കണ്ടുമുട്ടി. അവർ പെട്ടെന്ന് ഡേറ്റിങ് ആരംഭിക്കുകയും ഒരുമിച്ച് താമസിക്കുകയും ചെയ്തു. ഇയാളുടെ തെറ്റുകൾ അറിഞ്ഞിട്ടും ലീന ക്രിമിനൽ പ്രവർത്തനങ്ങളിൽ പങ്കാളിയായി. 2015ലാണ് ഇവർ വിവാഹിതരായത്.
് ലീനക്ക് ഈ തട്ടിപ്പ് എല്ലാം അറിയാമെന്നാണ് പൊലീസ് പറയുന്നത്. തെരഞ്ഞെടുപ്പ് കമ്മീഷൻ ജീവനക്കാർക്ക് കൈക്കൂലി നൽകുന്നതിനായി എഐഎഡിഎംകെ മുൻ ടിടിവി ദിനകരനിൽ നിന്ന് 50 കോടി രൂപ തട്ടിയെടുത്ത കേസിലും ഇയാൾക്കെതിരെ കേസെടുത്തിട്ടുണ്ട് . ജാമ്യത്തിൽ പുറത്തിറങ്ങുമ്പോഴെല്ലാം അയാൾ തന്റെ തട്ടിപ്പ് തുടർന്നുകൊണ്ടേയിരുന്നു.

ഫോർട്ടിസ് ഹെൽത്ത് കെയർ പ്രമോട്ടറായ ശിവീന്ദർ സിങ്ങിന്റെ കുടുംബത്തിൽനിന്ന് 200 കോടി രൂപ തട്ടിയെടുത്തെന്ന കേസിലാണ് സുകേഷ് ചന്ദ്രശേഖർ പിടയിലായത്. ഭാര്യയും നടിയുമായ ലീന മരിയ പോളും കേസിൽ പിടിയിലായിരുന്നു. ജയിലിലായിരുന്ന ശിവീന്ദർ സിങ്ങിന് ജാമ്യം സംഘടിപ്പിച്ച് നൽകാമെന്ന് പറഞ്ഞ് സുകേഷ് ചന്ദ്രശേഖർ 200 കോടിയോളം രൂപ തട്ടിയെന്നാണ് കണ്ടെത്തൽ. നിയമകാര്യ മന്ത്രാലയത്തിലെ മുതിർന്ന ഉദ്യോഗസ്ഥനെന്ന വ്യാജേനയാണ് ഇയാൾ ശിവീന്ദർ സിങ്ങിന്റെ കുടുംബത്തിൽനിന്ന് പണം കൈക്കലാക്കിയത്. ഡൽഹിയിൽ ജയിലിൽ കഴിയുന്നതിനിടെയായിരുന്നു സുകേഷ് ഈ വമ്പൻ തട്ടിപ്പുകൾ നടത്തിയത്. ഇതിനിടെയാണ് നടി ജാക്വിലിൻ ഫെർണാണ്ടസ് അടക്കമുള്ളവരുമായി സുകേഷിന് ബന്ധമുണ്ടെന്ന വിവരങ്ങളും പുറത്തുവന്നത്.

മിനി കൂപ്പുറം 52 ലക്ഷത്തിന്റെ കുതിരയും!

സുകേഷ് എന്ന സെലിബ്രിറ്റി തട്ടിപ്പുകാരന്റെ മോഡസ് ഓപ്പറൻഡി എല്ലായിടത്തും ഒരുപോലെയായിരുന്നു. വലിയ ബിസിനസ് മാഗനറ്റാണെന്ന് പറഞ്ഞ് സെലിബ്രിറ്റികളെ, പ്രത്യേകിച്ച് നടിമാരെ പരിചയപ്പെടുക. എന്നിട്ട് അവരുമായി ലിവിങ്ങ് ടുഗദർ ആയശേഷം അവരെവെച്ച് തട്ടിപ്പ് നടത്തുക. ഇതിനായി പശ്ചാത്തലം ശരിക്ക് പഠിച്ചാണ് ഇയാൾ ഇരകളെ തെരഞ്ഞെടുക്കാറുള്ളത്്.

ബോളിവുഡിൽ അവസരം കുറഞ്ഞ് സമ്മർദത്തിലായിരുന്നു ജാക്വിലിന്റെ നിസ്സഹായതയാണ് സുകേഷ് മുതലെടുത്തത്. ആ സമയത്ത് നടൻ സൽമാൻഖാനുമായുള്ള ബന്ധം മുറിഞ്ഞ് ജാക്വിലിൻ വലിയ ട്രോമയിലായിരുന്നെന്നും റിപ്പോർട്ടുകൾ വന്നിരുന്നു. സുകേഷ് തന്നെ തെറ്റിദ്ധരിപ്പിച്ചെന്നും ജീവിതം നരകമാക്കിയെന്നും ജാക്വലിൻ ഡൽഹി പട്യാല ഹൗസ് കോടതിയിൽ നൽകിയ പ്രസ്താവനയിൽ പറഞ്ഞു. സുകേഷിന്റെ സഹായി പിങ്കി ഇറാനിയാണ് ഒരു സർക്കാർ ഉദ്യോഗസ്ഥനെന്നുപറഞ്ഞ് അദ്ദേഹത്തെ പരിചയപ്പെടുത്തിയതെന്നും ജാക്വിലിൻ പറഞ്ഞു. ഈ പരിചയപ്പെടുത്തലിന് പിങ്കി ലക്ഷങ്ങൾ വാങ്ങിയെന്നും പിന്നീട് തെളിഞ്ഞു.

സൺ ടി.വിയുടെ ഉടമയാണെന്നും അന്തരിച്ച തമിഴ്‌നാട് മുൻ മുഖ്യമന്ത്രി ജയലളിത അമ്മായിയാണെന്നുമാണ് സുകേഷ് തന്നോട് പറഞ്ഞതെന്ന് ജാക്വിലിന്റെ കോടിതി സ്റ്റേറ്റ്മെന്റിലുണ്ട്. തന്റെ വലിയ ആരാധകനാണെന്ന് സുകേഷ് പറഞ്ഞു. ദക്ഷിണേന്ത്യൻ ഭാഷാ സിനിമകളിലും ശ്രദ്ധകേന്ദ്രീകരിക്കണം. സൺ ടിവിയുടെ ഉടമയെന്ന നിലയിൽ ഈ ബാനറിന്റേതായി ഒരുപാട് ചിത്രങ്ങൾ ചെയ്യാനുണ്ട്. തെന്നിന്ത്യൻ സിനിമകളിൽ ഒരുമിച്ച് പ്രവർത്തിക്കാമെന്നും സുകേഷ് പറഞ്ഞതായി ജാക്വിലിൻ കോടതിയെ അറിയിച്ചു.

വിലയേറിയ അഞ്ച് വാച്ചുകൾ, ഒരു മസാജ് ചെയർ, രണ്ട് ഡയമണ്ട് കമ്മലുകൾ, ഒരു ബ്രേസ്ലെറ്റ് എന്നിവയുൾപ്പെടെ 20 വിലയേറിയ ഡിസൈനർ ആഭരണങ്ങൾ, 65 ജോഡി ഷൂകൾ, രണ്ട് വസ്ത്രങ്ങൾ ഉൾപ്പെടെ 47 വസ്ത്രങ്ങൾ. ഗൂച്ചിയിൽ നിന്നുള്ള വസ്ത്രങ്ങളും ലൂയി വിറ്റൺ, ലൂബൗട്ടിൻ എന്നിവരിൽ നിന്നുള്ള ഓരോ വസ്ത്രങ്ങളും, വിലപിടിപ്പുള്ള നാല് ഹെർമിസ് ബാഗുകൾ, ഒരു ലിമിറ്റഡ് എഡിഷൻ പെർഫ്യൂം, നാല് പൂച്ചകൾ, 52 ലക്ഷം രൂപ വിലയുള്ള ഒരു കുതിര, ഒരു മിനി കൂപ്പർ എന്നിവയാണ് സുകേഷ് ജാക്വിലിന് നൽകിയത്. വലിയ കുതിര കമ്പക്കാരിയാണ് ജാക്വിലിൻ. എന്നാൽ ഇവയെല്ലാം പിന്നീട് തരിച്ചുകൊടുത്തുവെന്നാണ് നടി പറയുന്നത്. പക്ഷേ ഇ ഡി അന്വേഷണത്തിൽ തിരിച്ചുകൊടുത്തതായി കണ്ടെത്തിയിട്ടില്ല.

സുകേഷ് ചന്ദ്രശേഖറിനെതിരായ കേസിൽ സാക്ഷിയായ നടി നോറ ഫത്തേഹിയും കോടതിയിൽ മൊഴി നൽകിയിരുന്നു. കാമുകിയാകാൻ സമ്മതിച്ചാൽ വലിയ വീടും ആഡംബര ജീവിതവും സുകേഷ് വാഗ്ദാനം ചെയ്തതായാണ് നോറയുടെ മൊഴി. കേസിൽ ഇഡി സമൻസ് അയച്ചതിന് ശേഷമാണ് സുകേഷ് ചന്ദ്രശേഖർ തട്ടിപ്പുകാരനാണെന്ന് മനസ്സിലായതെന്നും നടി കോടതിയിൽ അറിയിച്ചു. ഇവർ മാത്രമായിരുന്നില്ല, നടി ജാൻവിയെയും, സാറാ അലി ഖാനെയും ഭൂമി പട്നേക്കറെയും ഇയാൾ പറ്റിച്ചു. എല്ലാറ്റിനും വഴിമരുന്ന് ഇട്ടതും പരിചയപ്പെടുത്തിയതും നടി ലീന മരിയപോൾ ഉൾപ്പടെയുള്ളവരാണ്!

ഡി കാപ്രിയോക്ക് ഒപ്പം അഭിനയം

ജാക്വിലിന് ബോളിവുഡിൽ ദുർബലയാണെന്ന് തിരിച്ചറിഞ്ഞാണ് സുകേഷ് എല്ലാ നീക്കങ്ങളും നടത്തിയത് എന്നാണ് ഇഡി വെളിപ്പെടുത്തിയത്. ഹോളിവുഡിൽ അഭിനയിക്കുക, എന്ന ജാക്വിലിന്റെ ചിരകാല സ്വപ്നമാണ് ആ ക്രിമനിൽ ചൂഷണം ചെയ്തത്. 500 കോടിയുടെ സൂപ്പർ ഹീറോ പ്രൊജക്ടാണ് ജാക്വിലിനായി സുകേഷ് ഓഫർ ചെയ്തത്. ഇത് മൂന്ന് ഭാഗങ്ങളായി എടുക്കാൻ വെച്ചിരുന്ന ചിത്രമായിരുന്നു. ഇത് ജാക്വിലിനുമായി അടുക്കാൻ സുകേഷ് ഉപയോഗിച്ച തന്ത്രമായിരുന്നു. സുകേഷുമായി ഡിന്നർ സൽക്കാരത്തിലും ജാക്വിലിൻ പങ്കെടുത്തിരുന്നു. ഇതിൽ വച്ചാണ് ഹോളിവുഡ് ചിത്രം സുകേഷ് ഓഫർ ചെയ്തു. അതും ഹോളിവുഡിലെ സൂപ്പർ താരത്തിനൊപ്പം ചിത്രം ചെയ്യാനുള്ള അവസരം നൽകാമെന്നുമാണ് അറിയിച്ചിരുന്നത്. തന്റെ ആളുകൾ ഈ സൂപ്പർ താരവുമായി ബന്ധപ്പെട്ടിട്ടുണ്ടെന്നും, ഉടൻ തന്നെ ആ താരം ചിത്രത്തിന്റെ ഭാഗമാകുമെന്നും സുകേഷ് ജാക്വിലിനെ പറഞ്ഞ് വിശ്വസിപ്പിച്ചിരുന്നു.

താൻ ഒരു വലിയ സൂപ്പർ താരത്തെ വിളിച്ചിരുന്നുവെന്നും, അദ്ദേഹത്തിന്റെ പേര് രഹസ്യമായി സൂക്ഷിക്കാനാണ് ഇഷ്ടപ്പെടുന്നതെന്നും ജാക്വിലിനോട് പറഞ്ഞിരുന്നു. എന്നാൽ ഇതു കേട്ട് നടിക്ക് ഇരിക്കപൊറുതിയില്ലായിരുന്നുവെന്ന് ഇഡി വൃത്തങ്ങൾ പറയുന്നു.ആരാണ് ഈ സൂപ്പർ താരമെന്ന് അറിയാനുള്ള ശ്രമത്തിലായിരുന്നു ജാക്വിലിൻ. നടിയുടെ അക്ഷമയെ മുതലെടുത്താണ് സുകേഷ് സംസാരിച്ചത്. വൈകാതെ തന്നെ താൻ ആ പേര് വെളിപ്പെടുത്തുമെന്നും, നടി അതിനായി കാത്തിരിക്കണമെന്നും സുകേഷ് പറഞ്ഞു. എന്നാൽ നിർബന്ധം തുടർന്നതോടെ സുകേഷ് ഈ പേര് വെളിപ്പെടുത്തുകയായിരുന്നു. ലിയനാർഡോ ഡിക്രാപിയോ ആണ് തന്റെ പുതിയ ചിത്രത്തിലെ നായകനെന്നായിരുന്നു വെളിപ്പെടുത്തൽ.

ജാക്വിലിനോട് ഇക്കാര്യം രഹസ്യമായി സൂക്ഷിക്കാനായിരുന്നു സുകേഷ് ആവശ്യപ്പെട്ടത്. ആരോടും പറയരുതെന്നും പ്രത്യേകം ആവശ്യപ്പെട്ടു. ലിയോയുടെ മാനേജർമാരുമായി കൂടിക്കാഴ്‌ച്ച നടത്തിയ വിവരവും ജാക്വിലിനോട് സുകേഷ് പറഞ്ഞിരുന്നു. ഡിക്രാപിയോയും താനും സുഹൃത്തുക്കളാണെന്നും ഇയാൾ പറഞ്ഞിരുന്നു. ഇതിൽ കള്ളമുണ്ടെന്ന് പോലും അന്വേഷിക്കാതെ ജാക്വിലിൻ ഇത് വിശ്വസിക്കുകയും, കുരുക്കിൽ വീഴുകയുമായിരുന്നു. ഇക്കാര്യം പറഞ്ഞ് അധികം വൈകാതെ തന്നെ ലിയനാർഡോ ഡിക്രാപിയോയുടെ എല്ലാ ചിത്രവും കാണാൻ ജാക്വിലിനോട് സുകേഷ് ആവശ്യപ്പെട്ടിരുന്നു. അതിന് ശേഷം നേരിട്ട് കാണാമെന്നുമായിരുന്നു പറഞ്ഞത്. നിരവധി ചിത്രങ്ങളിൽ ജാക്വിലിനെ നായികയാക്കാമെന്നും, വെബ് ഷോകളിൽ നടിയെ ഉൾപ്പെടുത്താമെന്നും സുകേഷ് പറഞ്ഞിരുന്നു.

ജാക്വിലിന് ഒരു നിർമ്മാണ കമ്പനിയിൽ നിന്നെന്ന പേരിൽ ഒരു ഇമെയിലും ലഭിച്ചിരുന്നു. ഒരു ബിഗ് ബജറ്റ് ചിത്രത്തിൽ എങ്ങനെയെങ്കിലും അഭിനയിക്കാമെന്ന വിശ്വാസത്തിലായിരുന്നു ജാക്വിലിൻ. അ ടുത്തിടെ വമ്പൻ ചിത്രങ്ങളൊന്നും നടിയെ തേടി വന്നിരുന്നില്ല. ഹോളിവുഡ് ചിത്രത്തിനായി തന്നെ സമീപിക്കുമെന്ന് കരുതിയിരിക്കുകയാണ് ജാക്വിലിൻ. എന്നാൽ ഒരു മെയിൽ പോലും പിന്നീട് വന്നില്ല. എന്നാൽ തട്ടിപ്പിന്റെ കാര്യം പുറത്തുവന്നതോടെയാണ് ആ മെയിൽ തന്നെ തന്നെ വിശ്വസിപ്പിക്കാൻ വേണ്ടി ചെയ്തതാണെന്ന് മനസ്സിലായത്.

ഇടഞ്ഞപ്പോൾ ചിത്രങ്ങൾ പുറത്തുവിടുന്നു

കോടീശ്വരനായ ബിസിസസ് മാൻ എന്ന കരുതിയാണ്, കൈയിൽ അഞ്ചുപൈസയില്ലാത്ത, ഈ വാചകമടിയുടെ തമ്പുരാനെ ജാക്വലിൻ പ്രണയിച്ചത്. തുടർന്ന് അവർ ലിവിങ് ടുഗറും തുടങ്ങി. പക്ഷേ തട്ടിപ്പകേസിൽ അയാൾ അകത്താവുകയും, ജാക്വിലിൻ ഇടയുകയും ചെയ്തതോടെ സുകേഷിന്റെ തനി നിറം പുറത്തായി. ഇരുവരും തമ്മിലുള്ള സ്വകാര്യ ചിത്രങ്ങൾ സോഷ്യൽ മീഡിയയിൽ പ്രചരിപ്പിച്ചാണ് അയാൾ പക തീർത്തത്. ജയിലിനകത്ത് ഇരുന്നും അയാൾ നടിയെ ഭീഷണിപ്പെടുത്തി.

ഒടുവിൽ ഗത്യന്തരമില്ലാതായപ്പോൾ, സുകേഷ് ചന്ദ്രശേഖറിനെതിരേ ജാക്വിലിൻ കോടതിയെ സമീപിച്ചു. ജയിലിൽ കഴിയുന്ന സുകേഷ് ചന്ദ്രശേഖർ സന്ദേശങ്ങളയച്ചും മാധ്യമങ്ങൾക്ക് കത്തുകളയച്ചും തന്നെ ഭീഷണിപ്പെടുത്തുകയാണെന്നാണ് നടിയുടെ പരാതി. സുകേഷിന്റെ അനാവശ്യമായ ഇത്തരം പ്രവൃത്തികളിൽനിന്ന് തനിക്ക് സംരക്ഷണം നൽകണമെന്ന് ആവശ്യപ്പെട്ടാണ് നടി ഡൽഹി പട്യാല ഹൗസ് കോടതിയിൽ ഹർജി സമർപ്പിച്ചത്. കോടതി നടപടികളിൽ പങ്കെടുക്കുന്നതിനിടെയും സുകേഷ് തനിക്ക് സന്ദേശങ്ങൾ അയച്ചതായാണ് നടിയുടെ ആരോപണം. 2023 ജൂലായ് 18-ാം തീയതി താൻ ഓൺലൈൻ വഴി കോടതി നടപടികളിൽ പങ്കെടുക്കുന്നതിനിടെയാണ് ഇതേ കോടതി നടപടികളിലുണ്ടായിരുന്ന സുകേഷ് ശബ്ദസന്ദേശം അടക്കം അയച്ചത്. ഈ സന്ദേശങ്ങളെല്ലാം തീർത്തും അനുചിതമായിരുന്നു. അയാളുടെ സന്ദേശങ്ങളോട് താൻ പ്രതികരിച്ചില്ല. ഇതിനുപുറമേ മാധ്യമങ്ങൾക്ക് മനഃപൂർവം കത്തുകളയച്ചും സുകേഷ് ഭീഷണിപ്പെടുത്തുന്നുണ്ട്. ഇക്കാര്യത്തിൽ ഡൽഹി പൊലീസിൽ പരാതി നൽകിയിരുന്നെങ്കിലും പൊലീസ് ഒരുനടപടിയും സ്വീകരിച്ചിട്ടില്ലെന്നും നടി ഹർജിയിൽ ആരോപിച്ചു.

സുകേഷ് ചന്ദ്രശേഖർ ജയിലിൽനിന്ന് ജാക്വിലിനെ സംബന്ധിച്ച് വിവിധ മാധ്യമങ്ങൾക്ക് കത്തുകളയക്കാറുണ്ടെന്ന് ഡൽഹി പൊലീസിന്റെ സാമ്പത്തിക കുറ്റാന്വേഷണ വിഭാഗം കോടതിയെ അറിയിച്ചു. നടിക്ക് ശല്യമാകുന്നതിനൊപ്പം ഇത്തരം കത്തുകൾ അവരുടെ സാമൂഹിക,പ്രൊഫഷണൽ രംഗത്തെകൂടി ബാധിക്കുമെന്നും പൊലീസ് പറഞ്ഞിരുന്നു.

ഇക്കഴിഞ്ഞ ഹോളിയിലും സ്വന്തം കൈപ്പടയിലാണ് സുകേഷ് ജാക്വിലിന് കത്തെഴുതി. ഹോളി ആശംസകൾ നേരുന്നതിനൊപ്പം താരത്തിന് വേണ്ടി ഏത് അറ്റം വരെയും പോകുമെന്നും സുകേഷ് പറയുന്നു."എന്റെ എക്കാലത്തെയും സുന്ദരിയായ ജാക്വലിന് ഹോളി ആശംസകൾ. നിറങ്ങളുടെ ഉത്സവമായ ഇന്ന് മാഞ്ഞുപോയ നിറങ്ങൾ നൂറു മടങ്ങായി നിങ്ങൾക്ക് തിരികെ തരുമെന്ന് ഞാൻ ഉറപ്പ് പറയുന്നു. അത് എന്റെ ഉത്തരവാദിത്തമാണ്. ബേബി ഗേൾ, നിനക്ക് വേണ്ടി ഏത് അറ്റം വരെയും പോകാൻ തയ്യാറാണ്. ഐലവ്യു' "-എന്നാണ് സുകേഷിന്റെ കുറിപ്പ്.

പരസ്യവിണിയിലും പുതുചരിത്രം

കേസും ഭീഷണിയും ഒരുഭാഗത്തുകൂടെ നടന്നുപോവുന്നുണ്ടെങ്കിലും, അതൊന്നും തന്റെ കരിയറിനെ ബാധിക്കാതിരിക്കാൻ ഈ നടി ഏറെ ശ്രദ്ധിക്കുന്നുണ്ടായിരുന്നു. രാജ്യത്തെ പരസ്യവിപണിയിലും അവർ പുതുചരിത്രമായി. ആദ്യമായി പുരുഷന്മാരുടെ അടിവസ്ത്ര ബ്രാൻഡിന്റെ അംബാസിഡറായി മാറിയിരിക്കുകയാണ് അവർ. ഇതനുസരിച്ചുള്ള ആദ്യ ടിവി പരസ്യം 2023 ഫെബ്രുവരി 13ന് ജാക്വിലിൻ ഫെർണാണ്ടസ് തന്നെയാണ് അവരുടെ ഇൻസ്റ്റാഗ്രാമിലൂടെ പുറത്തുവിട്ടത്.

ഇത്തരമൊരു പരസ്യത്തിലൂടെ ബ്രാൻഡിന്റെ ചരിത്രപരമായ കാമ്പെയ്‌നിന്റെ ഭാഗമായതിലുള്ള ആവേശം ജാക്വിലിൻ ഫെർണാണ്ടസ് മറച്ചുവെച്ചില്ല, "എന്തൊരു അത്ഭുതകരമായ അനുഭവമാണ് ഗൗരി ഷിൻഡെ സംവിധാനം ചെയ്ത ഈ പരസ്യം'- അവർ എഴുതി. ചാരനിറത്തിലുള്ള ഷോർട്ട്‌സ് ധരിച്ച് അതീവ ഗ്ലാമറായാണ് ജാക്വിലിൻ ഈ പരസ്യത്തിൽ പ്രത്യക്ഷപ്പെടുന്നത്. പുരുഷന്മാരുടെ ഇന്നർവെയർ വിൽക്കാൻ ആഗ്രഹിക്കുന്നവർക്ക് ബോളിവുഡിലെ ഗ്ലാമർ താരങ്ങളിൽ ഒരാളായ ജാക്വിലിൻ ഫെർണാണ്ടസിനേക്കാൾ മികച്ച മറ്റൊരു ഓപ്ഷൻ ഉണ്ടാകില്ലെന്നാണ് സോഷ്യൽ മീഡിയയിൽ ആരാധകരുടെ പ്രതികരണം. പരസ്യങ്ങളിൽ ഇതുവരെ പ്രത്യക്ഷപ്പെട്ട ഏതൊരു സ്ത്രീയേക്കാളും ഏറെ മികച്ച് നിൽക്കുന്നത് ജാക്വിലിൻ തന്നെയാണെന്ന് മറ്റൊരാൾ അഭിപ്രായപ്പെട്ടത്.

സുകേഷ് പിരിഞ്ഞുപോയതോടെ ജാക്വലിന്റെ ജീവിതത്തിലും നല്ല ഉയർച്ചയാണ് ഉണ്ടായത്. ആരുടെയും സഹായമില്ലാതെ അവർ ഹോളിവുഡിലെത്തി.
2023ൽ ജാക്വിലിൻ അഭിനയിച്ച ഹോളിവുഡ് ചിത്രമായ 'ടെൽ ഇറ്റ് ലൈക്ക് എ വുമൺ' എന്നതിലെ 'അപ്ലാസ്' എന്ന ഗാനം ഓസ്‌കാർ പുരസ്‌ക്കാരത്തിനായി നാമനിർദ്ദേശം ചെയ്യപ്പെട്ടു. വിദ്യുത് ജംവാൾ, സോനു സൂദ് എന്നിവരുടേത് ഉൾപ്പടെ കൈനിറയെ ചിത്രങ്ങളാണ് 2023ൽ ജാക്വിലിന് ഉണ്ടായിരുന്നത്. ഈ രീതിയിൽ കത്തി നിൽക്കുമ്പോഴാണ്, തട്ടിപ്പുവീൻ സുകേഷ് ചന്ദ്രശേഖറിന്റെ പേരിൽ വീണ്ടും വിവാദം ഉണ്ടാകുന്നത്. കേസിൽ കോടതി വിധി എതിരായാൽ ഈ നടിയുടെ ഇമേജിനെ അത് സാരമായി ബാധിക്കുമെന്ന് ഉറപ്പാണ്.

വാൽക്കഷ്ണം: സാമൂഹിക സേവന രംഗത്തും, നിരവധി പ്രവർത്തനങ്ങൾ ജാക്വിലിൻ നടത്തുന്നുണ്ട്. കടൽ സംരക്ഷണത്തിനും മൃഗ സംരക്ഷണത്തിനുമൊക്കെ അവർ മുന്നിട്ട് ഇറങ്ങുന്നു. 2016-ലെ ചെന്നെ പ്രളയത്തിൽ തകർന്ന പല വീടുകൾ ജാക്വലിൻ ബിൽഡ്സ് എന്ന സംഘടനയുടെ പേരിൽ പുനർനിർമ്മിച്ചിരുന്നു. 2018-ലെ കേരളത്തിലെ പ്രളയാകാലത്തും ഇതേ സംഘടന 50 ലക്ഷത്തോളം രൂപ സമാഹരിച്ച് നൽകിയിരുന്നു.