ഡൽഹിയിൽ ഇന്നും കനത്ത മൂടൽമഞ്ഞ്; നൂറിലേറെ വിമാനങ്ങൾ വൈകുന്നു; നിരവധി ട്രെയിനുകൾ റദ്ദാക്കി

ന്യൂഡൽഹി: കനത്ത മൂടൽമഞ്ഞ് ഇന്നും വിമാന സർവീസുകളെ ബാധിച്ചു. ഡൽഹി വിമാനത്താവളത്തിൽ നിന്ന് പുറപ്പെടേണ്ടതും ഇറങ്ങേണ്ടതുമായ രാജ്യാന്തര യാത്രകൾ അടക്കം 110 വിമാന സർവീസുകളാണ് വൈകുന്നത്. തൊട്ടടുത്തുള്ള കാഴ്ച പോലും മറച്ചുകൊണ്ട് കനത്ത മൂടൽമഞ്ഞാണ് ഡൽഹിയിൽ അനുഭവപ്പെടുന്നത്. മൂടൽമഞ്ഞ് ദൂരക്കാഴ്ചയെ മറച്ചതോടെ, ഡൽഹിയിൽ നിന്നുള്ള യാത്ര, ചരക്കു ട്രെയിൻ സർവീസുകളുടെയും താളംതെറ്റിയിട്ടുണ്ട്. നിരവധി ട്രെയിനുകൾ റദ്ദാക്കിയതായാണ് വിവരം.

കനത്ത മൂടൽമഞ്ഞിന്റെ പശ്ചാത്തലത്തിൽ കേന്ദ്ര കാലാവസ്ഥ വകുപ്പ് ഡൽഹിയിൽ ഓറഞ്ച് ജാഗ്രത പ്രഖ്യാപിച്ചു. വ്യാഴാഴ്ച യെല്ലോ അലർട്ട് മുന്നറിയിപ്പും നൽകിയിട്ടുണ്ട്. അടുത്ത മൂന്ന് ദിവസം കൂടി ഇതേ അവസ്ഥ തന്നെ തുടരുമെന്നാണ് കാലാവസ്ഥ വകുപ്പിന്റെ കണക്കുകൂട്ടൽ.

ബുധനാഴ്ച കുറഞ്ഞ താപനില ഏഴു ഡിഗ്രിയായി താഴുമെന്നാണ് പ്രവചനം. 24 ഡിഗ്രിയായിരിക്കും കൂടിയ താപനില. രാവിലെയാണ് മൂടൽമൂഞ്ഞ് കൂടുതലായി അനുഭവപ്പെടുന്നത്. മൂടൽമഞ്ഞ് ഗതാഗതക്കുരുക്കിനും കാരണമാകുന്നുണ്ട്. ഡൽഹിക്ക് പുറമേ ഹരിയാന, യുപിയുടെ വിവിധ ഭാഗങ്ങൾ, രാജസ്ഥാന്റെ വടക്കൻ ഭാഗങ്ങൾ എന്നിവിടങ്ങളിലും മൂടൽമഞ്ഞ് അനുഭവപ്പെടുന്നുണ്ട്.