യുഎഇ പ്രസിഡന്റുമായി എസ് ജയ്ശങ്കർ കൂടിക്കാഴ്ച നടത്തി

അബുദാബി: യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാനുമായി ഇന്ത്യൻ വിദേശകാര്യ മന്ത്രി എസ് ജയ്ശങ്കർ കൂടിക്കാഴ്ച നടത്തി. അൽ ഷാതി കൊട്ടാരത്തിൽ വച്ചാണ് കൂടിക്കാഴ്ച നടന്നത്. ഇരുരാജ്യങ്ങളുടെയും ഉഭയകക്ഷി ബന്ധവും പൊതുതാൽപ്പര്യമുള്ള വിഷയങ്ങളും ചർച്ചയായി.

ഇന്ത്യ- യുഎഇ ബന്ധം ശക്തിപ്പെടുത്തുന്നതിനും പൊതു താൽപ്പര്യങ്ങൾ നിറവേറ്റുന്നതിനുമുള്ള മാർഗങ്ങളെ കുറിച്ച് ഇന്ത്യൻ പ്രധാനമന്ത്രി നരേന്ദ്ര മോദിയുടെ കത്ത് എസ് ജയ്ശങ്കർ യുഎഇ പ്രസിഡന്റിന് കൈമാറി.

യുഎഇ-ഇന്ത്യ സംയുക്ത സമിതിയുടെ പതിനാലാമത് സമ്മേളനത്തിലും യുഎഇ-ഇന്ത്യ സ്ട്രാറ്റജിക് ഡയലോഗിന്റെ മൂന്നാം സമ്മേളനത്തിലും പങ്കെടുക്കാൻ യുഎഇയിലെത്തിയതാണ് എസ് ജയ്ശങ്കർ.
യുഎഇയ്ക്കും പൗരന്മാർക്കും അഭിവൃദ്ധിയും പുരോഗതിയും നേർന്നു കൊണ്ടുള്ള പ്രധാനമന്ത്രിയുടെ ആശംസകൾ കൂടിക്കാഴ്ചയുടെ തുടക്കത്തിൽ കൈമാറി. യുഎഇ പ്രസിഡന്റ് ഇന്ത്യക്കും ആശംസകൾ നേർന്നു.