ആകാശപാതയുടെ മേൽക്കൂരയിൽ കയറി യുവാവിന്റെ ആത്മഹത്യാഭീഷണി; സാഹസികമായി രക്ഷപ്പെടുത്തി പൊലീസ്

മുംബൈ: മുംബൈ നാനാ ചൗക്കിലെ ആകാശപാതയുടെ മേൽക്കൂരയിൽ കയറി ആത്മഹത്യാഭീഷണി മുഴക്കിയ യുവാവിനെ പൊലീസ് സാഹസികമായി രക്ഷപ്പെടുത്തി. ഇയാൾ ലഹരി ഉപയോഗിച്ചിരുന്നെന്ന് സംശയിക്കുന്നതായി പൊലീസ് പറഞ്ഞു. ബുധനാഴ്ചയാണ് സംഭവം .

ഷക്കീൽ അഹിയ എന്ന 24 കാരനായ യുവാവിനെയാണ് ആകാശപാതയുടെ മേൽക്കൂരയിൽ നിന്ന് ഗാവ് ദേവി പൊലീസ് രക്ഷപ്പെടുത്തിയത്. ഇയാൾക്കെതിരെ ലഹരി ഉപയോഗിച്ചതിന് കേസെടുത്തിട്ടുണ്ട്. മേൽക്കൂരയ്ക്ക് മുകളിൽ കയറിയ യുവാവ് അറ്റത്തിരുന്നാണ് ആത്മഹത്യാഭീഷണി മുഴക്കിയതെന്നാണ് റിപ്പോർട്ട്.

മേൽക്കൂരയ്ക്ക് മുകളിൽ യുവാവ് കയറിയതായി വിവരം ലഭിച്ചതിനെത്തുടർന്ന് പൊലീസ് ഉദ്യോഗസ്ഥരും അഗ്നിരക്ഷാസേന ഉദ്യോഗസ്ഥരും സ്ഥലത്തെത്തുകയായിരുന്നു. ഇയാളോട് താഴെയിറങ്ങാൻ ആവശ്യപ്പെട്ടെങ്കിലും ഇയാൾ വഴങ്ങിയില്ല. തുടർന്ന് പൊലീസുകാരിൽ ഒരാൾ യുവാവിനെ പിടികൂടുകയും ബലം പ്രയോഗിച്ചു കീഴ്പ്പെടുത്തുകയുമായിരുന്നു.

രണ്ടുമണിക്കൂർ നീണ്ടുനിന്ന പരിശ്രമങ്ങൾക്കൊടുവിലാണ് ഇയാളെ രക്ഷപ്പെടുത്തിയത്. കുഷ്യൻ അടക്കമുള്ള സംവിധാനങ്ങൾ രക്ഷാസേന തയ്യാറാക്കി നിർത്തിയിരുന്നു. രക്ഷാപ്രവർത്തനത്തിനിടെ പ്രദേശത്ത് ഗതാഗതം തടസ്സപ്പെട്ടിരുന്നു.