അസമിൽ ശിവക്ഷേത്രത്തിലെ വിഗ്രഹങ്ങൾ അടിച്ച് തകർത്തു

ഗുവാഹട്ടി: അസമിൽ ഹിന്ദു ക്ഷേത്രത്തിലെ വിഗ്രഹം അടിച്ച് തകർത്തു. ദിബ്രുഗഢിലെ ചബുവ സംഷാനിലെ ശിവ ക്ഷേത്രത്തിന് നേരെയായിരുന്നു ആക്രമണം.

ക്ഷേത്രം തുറക്കാനെത്തിയ ജീവനക്കാരൻ ആണ് സംഭവം ആദ്യം കണ്ടത്. ഉടനെ വിവരം അധികൃതരെയും പൊലീസിനെയും അറിയിക്കുകയായിരുന്നു. ആക്രമണത്തിൽ വിഗ്രഹങ്ങൾ പൂർണമായി തകർന്നിട്ടുണ്ട്.

സംഭവത്തിൽ ഒരാളെ അറസ്റ്റ് ചെയ്തിട്ടുണ്ടെന്നാണ് പൊലീസ് പറയുന്നത്. എന്നാൽ ഇയാളുടെ പേര് വിവരങ്ങൾ പുറത്തുവിട്ടിട്ടില്ല. മാനസികാസ്വാസ്ഥ്യം ഉള്ള ആളാണ് പ്രതിയെന്നാണ് പൊലീസ് പറയുന്നത്. ഈ വർഷം മേയിലും അസമിൽ ക്ഷേത്രത്തിന് നേരെ ആക്രമണം ഉണ്ടായിരുന്നു. ഭെട്ടപാറയിലെ ക്ഷേത്രത്തിന് നേരെയായിരുന്നു ആക്രമണം ഉണ്ടായത്.