ഷോപ്പിങ് മാളിൽനിന്ന് ചോക്കലേറ്റ് മോഷ്ടിക്കുന്ന വീഡിയോ ദൃശ്യം; ബംഗാളിൽ കോളേജ് വിദ്യാർത്ഥിനി ജീവനൊടുക്കി

കൊൽക്കത്ത: പശ്ചിമ ബംഗാളിൽ ഷോപ്പിങ് മാളിൽനിന്ന് ചോക്കലേറ്റ് മോഷ്ടിക്കവെ പിടിയിലായതിന്റെ വീഡിയോ ദൃശ്യം സാമൂഹിക മാധ്യമങ്ങളിൽ പ്രചരിച്ചതിന് പിന്നാലെ കോളേജ് വിദ്യാർത്ഥിനി ആത്മഹത്യചെയ്തു. ആലിപുർദ്വാർ ജില്ലയിലെ ജയ്ഗാവ് പൊലീസ് സ്റ്റേഷൻ പരിധിയിൽ ഞായറാഴ്ചയാണ് സംഭവം. മൂന്നാംവർഷ ബിരുദ വിദ്യാർത്ഥിനിയെയാണ് വീട്ടിൽ തൂങ്ങിമരിച്ച നിലയിൽ കണ്ടെത്തിയത്.

സെപ്റ്റംബർ 29-ന് സഹോദരിയോടൊപ്പം പെൺകുട്ടി സമീപത്തെ ഷോപ്പിങ് മാളിൽ പോയിരുന്നു. അവിടെനിന്ന് ചോക്കലേറ്റ് മോഷ്ടിച്ച് പുറത്തിറങ്ങുന്നതിനിടെ പിടിയിലായി. തുടർന്ന് പെൺകുട്ടി ചോക്കലേറ്റിന്റെ പണം നൽകുകയും കടയുടമകളോട് മാപ്പ് അപേക്ഷിക്കുകയും ചെയ്തു.

എന്നാൽ കടയിലെ ആളുകൾ സംഭവത്തിന്റെ മുഴുവൻദൃശ്യങ്ങളും പകർത്തി സാമൂഹികമാധ്യമങ്ങളിൽ പ്രചരിപ്പിച്ചു. ഈ ദൃശ്യങ്ങൾ വൈറലായെന്നും ഇതിലുള്ള നാണക്കേട് കാരണമാണ് പെൺകുട്ടി ജീവനൊടുക്കിയതെന്നും പെൺകുട്ടിയുടെ പിതാവ് പറഞ്ഞു.

പെൺകുട്ടി ജീവനൊടുക്കിയതിന് പിന്നാലെ പ്രദേശവാസികൾ ഷോപ്പിങ് മാളിനു പുറത്ത് പ്രതിഷേധിച്ചു. വീഡിയോ ചിത്രീകരിച്ച് ഓൺലൈനിൽ പങ്കുവെച്ചവർക്കതിരേ കടുത്ത നടപടി സ്വീകരിക്കണമെന്നും അവർ ആവശ്യപ്പെട്ടു. പെൺകുട്ടിയുടെ മൃതദേഹം പോസ്റ്റ്മോർട്ടത്തിന് അയച്ചെന്നും അന്വേഷണം പുരോഗമിക്കുകയാണെന്നും പൊലീസ് അറിയിച്ചു.