ഇന്ത്യൻ - 2വിൽ സർപ്രൈസ് താരം; സുപ്രധാനവേഷത്തിൽ യുവരാജ് സിങ്ങിന്റെ പിതാവ്; സിനിമയ്ക്കായി മേക്കപ്പ് ഇടുന്ന ചിത്രം പങ്കുവച്ച് താരം
ചെന്നൈ: കമൽഹാസൻ ആരാധകർ നെഞ്ചേറ്റിയ ചിത്രമാണ് ഇന്ത്യൻ. വൻവിജയമായ ചിത്രത്തിന്റെ രണ്ടാം ഭാഗം വരുന്നു എന്ന റിപ്പോർട്ടുകൾ ഏറെ പ്രതീക്ഷയോടെയാണ് ആരാധകർ ഏറ്റെടുത്തത്. ഷങ്കർ സംവിധാനം ചെയ്യുന്ന ഇന്ത്യൻ 2. വിന്റെ ചിത്രീകരണം ഇക്കഴിഞ്ഞമാസം പുനരാരംഭിച്ചിരുന്നു.
അഭിനേതാക്കളേക്കുറിച്ച് അണിയറപ്രവർത്തകർ ഇതുവരെ അധികം വിവരങ്ങളൊന്നും പുറത്തുവിട്ടിട്ടില്ല. എന്നാൽ ആരാധകർക്ക് സർപ്രൈസ് ആയി ഒരു താരം താൻ ഇന്ത്യൻ 2 ന്റെ ഭാഗമാവുന്നുവെന്ന് പറഞ്ഞിരിക്കുകയാണ്.
മുൻ ഇന്ത്യൻ ക്രിക്കറ്ററും നടനുമായ യോഗ് രാജ് സിങ് ആണ് ആ താരം. മുൻ ഇന്ത്യൻ താരം യുവരാജ് സിങ്ങിന്റെ പിതാവുകൂടിയാണ് യോഗ് രാജ് സിങ്. ഇൻസ്റ്റാഗ്രാമിലൂടെയാണ് അദ്ദേഹം ഇക്കാര്യം വെളിപ്പെടുത്തിയിരിക്കുന്നത്. ചിത്രത്തിനായി മേക്കപ്പ് ഇടുന്ന ചിത്രവും അദ്ദേഹം പോസ്റ്റ് ചെയ്തിട്ടുണ്ട്. ക്യാമറയ്ക്ക് പിന്നിൽ പ്രവർത്തിക്കുന്ന എല്ലാ നായകന്മാരോടും വലിയ ആദരവുണ്ടെന്ന് ചിത്രത്തിനൊപ്പം യോഗ് രാജ് കുറിച്ചു.
'എന്നെ കൂടുതൽ സ്മാർട്ടാക്കിയതിന് മേക്കപ്പ് കലാകാരന്മാരോട് നന്ദി പറയുന്നു. പഞ്ചാബിന്റെ സിംഹം ഇന്ത്യൻ 2 നുവേണ്ടി തയ്യാറായിക്കഴിഞ്ഞു.' യോഗ് രാജ് എഴുതി.
ലൈക്ക പ്രൊഡക്ഷൻസും റെഡ് ജയന്റ് മൂവീസും ചേർന്നാണ് ഇന്ത്യൻ 2 നിർമ്മിക്കുന്നത്. 1996-ൽ ഷങ്കർ തന്നെ സംവിധാനം ചെയ്ത് പുറത്തിറങ്ങിയ ഇന്ത്യൻ എന്ന ചിത്രത്തിന്റെ രണ്ടാം ഭാഗമാണ് ചിത്രം. സേനാപതി എന്ന കഥാപാത്രമായാണ് കമൽ എത്തുന്നത്. മലയാളി നടൻ നന്ദു പൊതുവാളും ചിത്രത്തിലുണ്ട്. നിലവിൽ രാം ചരൺ, കിയാരാ അദ്വാനി, ജയറാം എന്നിവരെ മുഖ്യ കഥാപാത്രങ്ങളാക്കി ഒരു ചിത്രവും ഷങ്കർ സംവിധാനം ചെയ്യുന്നുണ്ട്.
