സിദ്ധരാമയ്യയെ ടിപ്പുസുൽത്താന്റെ വേഷത്തിൽ ചിത്രീകരിച്ചു; മുൻ മുഖ്യമന്ത്രിക്കെതിരെ ബിജെപി മന്ത്രിയുടെ പുസ്തകം; ഇടപെട്ട് കോടതി; പ്രസിദ്ധീകരണവും വിതരണവും തടഞ്ഞു

ബെംഗളുരു: സിദ്ധരാമയ്യക്കെതിരായ പുസ്തകത്തിന്റെ പ്രകാശനം അവസാന നിമിഷം തടഞ്ഞ് കോടതി ഇടപെടൽ. സിദ്ധരാമയ്യയുടെ മകൻ യതീന്ദ്ര സിദ്ധരാമയ്യ നൽകിയ ഹർജി പരിഗണിച്ച കർണാടക ജില്ലാ കോടതി പുസ്തകത്തിന്റെ പ്രകാശനം തടയുകയായിരുന്നു. സിദ്ധരാമയ്യയെ ടിപ്പുസുൽത്താന്റെ വേഷത്തിൽ ചിത്രീകരിക്കുന്ന ഒരു കാർട്ടൂണാണ് പുസ്തകത്തിന്റെ മുഖചിത്രമായി ഉൾപ്പെടുത്തിയിരുന്നത്.

ഇനിയൊരു ഉത്തരവ് ഉണ്ടാകുന്നത് വരെ പുസ്തകം പ്രസിദ്ധീകരിക്കുന്നതും വിതരണം ചെയ്യുന്നതും തടഞ്ഞുകൊണ്ടാണ് കോടതി ഉത്തരവിട്ടത്. അഡീ. സിറ്റി ആൻഡ് സിവിൽ സെഷൻസ് ജഡ്ജ് ആണ് പ്രകാശനം തടഞ്ഞത്. കർണാടകയിടെ ബിജെപി മന്ത്രിയാണ് സിദ്ധരാമയ്യയെക്കുറിച്ച് പുസ്തകം പുറത്തിറക്കാൻ തീരുമാനിച്ചത്. സിദ്ധരാമയ്യയുടെ ഭരണകാലത്തെക്കുറിച്ച് ഗുരുതരമായ ആരോപണങ്ങളുന്നയിക്കുന്നതാണ് ബിജെപി മന്ത്രിയുടെ പുസ്തകം.

സിദ്ധരാമയ്യയുടെ ഭരണകാലത്ത് ശരിഅത്ത് നിയമം നടപ്പാക്കാനും ഹലാൽ നിർബന്ധമാക്കാനും മുഖ്യമന്ത്രി തീരുമാനിച്ചിരുന്നുവെന്നതടക്കമുള്ള ആരോപണങ്ങളടക്കം പുസ്തകത്തിൽ ഉണ്ടെന്നാണ് വിവരം. കർണായകയിലെ വിദ്യാഭ്യാസമന്ത്രിയും ബിജെപി നേതാവുമായ അശ്വത്ഥ് നാരായണന്റെ പുസ്തകം മൂന്ന് മണിക്ക് പ്രകാശനം ചെയ്യാനിരിക്കെയാണ് കർണാടക ജില്ലാ കോടതിയുടെ ഇടപെടൽ ഉണ്ടായത്.