മട്ടൻ വിഭവം രാഹുലിന് വിളമ്പി ലാലു പ്രസാദ്; ഉച്ച ഭക്ഷണത്തിനായി ഒന്നിച്ചു 'ഇന്ത്യ' നേതാക്കൾ; അപകീർത്തി കേസിലെ ശിക്ഷ വിധി സ്റ്റേ ചെയ്തതിനു പിന്നാലെ ആഘോഷം

ന്യൂഡൽഹി: അപകീർത്തി കേസിലെ ശിക്ഷ വിധി സുപ്രീംകോടതി സ്റ്റേ ചെയ്തതിനു പിന്നാലെ 'ഇന്ത്യ' ക്യാമ്പിൽ ആഘോഷം. കോൺഗ്രസ് നേതാവ് രാഹുൽ ഗാന്ധിക്കായി ഉച്ച ഭക്ഷണം ഒരുക്കിയാണ്
ആർ.ജെ.ഡി നേതാവ് ലാലു പ്രസാദ് യാദവ് കോടതി വിധിയെ സ്വാഗതം ചെയ്തത്.

ഫോട്ടോ സെഷനു ശേഷം പൂക്കൾ നൽകി ലാലു രാഹുലിനെ സ്വീകരിച്ചു. ആർ.ജെ.ഡി എംപി മിസ ഭാരതിയുടെ ഡൽഹിയിലെ വസതിയിലായിരുന്നു കൂടിക്കാഴ്ച. ബിഹാർ ഉപമുഖ്യമന്ത്രി തേജസ്വി യാദവും ഒപ്പമുണ്ടായിരുന്നു.

പിന്നീട് താൻ തയാറാക്കിയ മട്ടൻ വിഭവം ലാലു രാഹുലിന് വിളമ്പി. രാഷ്ട്രീയത്തിനൊപ്പം നാട്ടുകാര്യങ്ങളും പറഞ്ഞ് ഇരുവരും ഭക്ഷണം ആസ്വദിച്ചു കഴിച്ചു. ബിഹാറിന്റെ തനതായ ചമ്പാരൻ മട്ടനാണ് ലാലു രാഹുലിന് വിളമ്പിയത്. പ്രത്യേക രീതിയിലാണ് അത് തയാറാക്കുക. അതിനെ കുറിച്ചൊക്കെ ലാലു രാഹുലിന് വിശദീകരിച്ചു കൊടുക്കുകയും ചെയ്തു.

രാഹുലിന് ഭക്ഷണമൊരുക്കാൻ ബിഹാറിൽ നിന്ന് നാടൻ ആട്ടിറച്ചിയും സുഗന്ധവ്യഞ്ജനങ്ങളും കൊണ്ടുവരാൻ ലാലു ഏർപ്പാട് ചെയ്തിരുന്നു. ബിഹാറി രീതിയിൽ അത് പാകം ചെയ്യുന്നത് രാഹുലിന് കാണിച്ചു കൊടുക്കുകയും ചെയ്തു. ലാലുവിന്റെ ആരോഗ്യ കാര്യങ്ങളെ കുറിച്ച് രാഹുലും ചോദിച്ചറിഞ്ഞു.