കെട്ടിടം പൊളിക്കുന്നതിനിടെ മേൽക്കൂര തകർന്ന് ബൈക്ക് യാത്രികർക്കു മേൽ വീണു; ഭർത്താവിന് ദാരുണാന്ത്യം; ഭാര്യ അത്ഭുതകരമായി രക്ഷപ്പെട്ടു

ചണ്ഡിഗഡ്: കെട്ടിടം പൊളിക്കുന്നതിനിടെ മേൽക്കൂര തകർന്ന് റോഡിലേക്ക് വീണതിനെ തുടർന്ന് പരിക്കേറ്റ ബൈക്ക് യാത്രികന് ദാരുണാന്ത്യം. ഒപ്പം യാത്ര ചെയ്ത ഇയാളടെ ഭാര്യ അത്ഭുതകരമായി രക്ഷപ്പെട്ടു. ഇതിന്റെ വീഡിയോ സാമൂഹിക മാധ്യമങ്ങളിൽ ഉൾപ്പടെ വ്യാപകമായി പ്രചരിച്ചു. ഹരിയാനയിലെ പാനിപ്പത്തിൽ നിന്നുള്ളതാണ് വീഡിയോ.

ഷോപ്പിങ്ങാനായി ദമ്പതികൾ ബൈക്കിൽ പോകുന്നതിനിടെ, പൊളിച്ചുമാറ്റുകയായിരുന്ന കെട്ടിടത്തിന്റെ മേൽക്കൂരഭാഗം തകർന്ന് റോഡിലേക്ക് പതിക്കുകയായിരുന്നു. ബൈക്കിന്റെ പുറകിലിരുന്ന യുവതിയുടെ കെട്ടിടഭാഗം താഴേക്ക് വീഴുന്നത് ശ്രദ്ധയിൽപ്പെട്ടതിന് പിന്നാലെ ബൈക്കിൽ നിന്ന് ചാടി രക്ഷപ്പെട്ടെങ്കിലും ബൈക്ക് ഓടിച്ച സുശീലിന്റെ ശരീരത്തിലാണ് കെട്ടിടത്തിന്റെ ഭാഗം പതിച്ചത്. അയാൾ സംഭവസ്ഥലത്തുവച്ചുതന്നെ മരിച്ചു.

സുശീലിനെ രക്ഷിക്കാൻ ഭാര്യ ഓടിയെത്തുന്നത് സിസിടിവിയിൽ കാണാം. ആളുകൾ ഓടിയെത്തി രക്ഷാപ്രവർത്തനം നടത്തിയെങ്കിലും ഫലമുണ്ടായില്ല. സംഭവത്തിൽ മറ്റൊരു വഴിയാത്രക്കാരനും പരിക്കേറ്റു. കെട്ടിടം പൊളിക്കുന്നതിനിടെ തൊഴിലാളികളുടെ ഭാഗത്തുനിന്നുണ്ടായ അനാസ്ഥയാണ് അപകടത്തിന് കാരണമെന്ന് നാട്ടുകാർ പറഞ്ഞു. സംഭവത്തിൽ പൊലീസ് അന്വേഷണം ആരംഭിച്ചു.

#Haryana: The balcony of a building collapsed in Panipat. Death of a person riding a bike passing below. When the wife looked up a second later, she jumped off the bike and ran away and was saved.#india pic.twitter.com/6GBEjnMl5k

- Siraj Noorani (@sirajnoorani) November 3, 2023