ലോകകപ്പ് ഫൈനൽ ദിനത്തിലുൾപ്പെടെ ഡൽഹിയിൽ മദ്യനിരോധനം

ന്യൂഡൽഹി: നാല് ദിവസം നീളുന്ന ഛഠ് പൂജ ഉത്സവത്തിന്റെ ഭാഗമായി ഡൽഹിയിൽ മദ്യനിരോധനം. ലോക കിരീടത്തിനായി ഇന്ത്യയും ഓസ്ട്രേലിയയും ഏറ്റുമുട്ടുന്ന ഞായറാഴ്ച ഡ്രൈ ഡേ പ്രഖ്യാപിച്ചിരിക്കുകയാണ് ഡൽഹി എക്സൈസ് വകുപ്പ്. ഇതോടെ ലോകകപ്പ് ക്രിക്കറ്റ് ഫൈനലിൽ ഇന്ത്യ ജയിച്ചാൽ ആഘോഷിക്കാനും തോറ്റാൽ സങ്കടം തീർക്കാനുമായി രണ്ടെണ്ണം 'അടിക്കണ'മെങ്കിൽ ഡൽഹിക്കാർ നിരാശപ്പെടും.

നാല് ദിവസം നീളുന്ന ഛഠ് പൂജ ഉത്സവത്തിന്റെ ഭാഗമായാണ് ഫൈനൽ നടക്കുന്ന ദിവസം ഡൽഹിയിൽ മദ്യം നിരോധിച്ചിരിക്കുന്നത്. ഉത്സവം നടക്കുന്ന നവംബർ 17 മുതൽ 20 വരെയാണ് ഡൽഹിയിൽ മദ്യനിരോധനം. ഡൽഹി എക്സൈസ് നിയമത്തിലെ 52-ാം വകുപ്പ് പ്രകാരമാണ് മദ്യനിരോധനം ഏർപ്പെടുത്തിയതെന്ന് എക്സൈസ് വകുപ്പ് അറിയിച്ചു.

ഗുജറാത്തിലെ അഹമ്മദാബാദിലുള്ള നരേന്ദ്ര മോദി സ്റ്റേഡിയത്തിലാണ് ഇന്ത്യ-ഓസ്ട്രേലിയ ലോകകപ്പ് ക്രിക്കറ്റ് ഫൈനൽ നടക്കുക. ഞായറാഴ്ച ഉച്ചയ്ക്ക് രണ്ട് മണിക്കാണ് മത്സരം ആരംഭിക്കുക. ദീപാവലിക്ക് ശേഷമുള്ള ആറാമത്തെ ദിവസമാണ് സൂര്യഷഷ്ഠി എന്നും അറിയപ്പെടുന്ന ഛഠ് പൂജ ആഘോഷിക്കുന്നത്.