മെഡിക്കൽ വിദ്യാർത്ഥിനിയുടെ കുളിമുറി ദൃശ്യങ്ങൾ പകർത്താൻ ശ്രമിച്ച യുവാവ് അറസ്റ്റിൽ

മുംബൈ: മെഡിക്കൽ വിദ്യാർത്ഥിനിയുടെ കുളിമുറി ദൃശ്യങ്ങൾ മൊബൈൽ ഫോൺ ക്യാമറയിൽ പകർത്താൻ ശ്രമിച്ച സംഭവത്തിൽ ഒരാൾ അറസ്റ്റിൽ. വിദ്യാർത്ഥിനി കുളിക്കുന്നതിനിടെ ആശുപത്രി ജീവനക്കാരൻ മതിലിന് മുകളിൽ കയറി ദൃശ്യങ്ങൾ പകർത്താൻ ശ്രമിക്കുകയായിരുന്നു. മുംബൈയിലെ പ്രമുഖ ആശുപത്രിയിലെ താത്കാലിക ജീവനക്കാരനെയാണ് അറസ്റ്റ് ചെയ്തതെന്ന് പൊലീസ് അറിയിച്ചു.

കഴിഞ്ഞ ശനിയാഴ്ചയായിരുന്നു സംഭവം. 27കാരിയായ വിദ്യാർത്ഥിനി ആശുപത്രിയിൽ നടന്ന ഒരു യോഗത്തിൽ പങ്കെടുക്കാനായാണ് എത്തിയത്. കുളിക്കാനായി ഹോസ്റ്റലിൽ പോയപ്പോഴാണ് ആശുപത്രി ജീവനക്കാരൻ ദൃശ്യങ്ങൾ പകർത്താൻ ശ്രമിച്ചതെന്ന് പൊലീസ് അറിയിച്ചു. പുരുഷന്മാരുടെയും സ്ത്രീകളുടെയും കുളിമുറികൾ അടുത്തടുത്താണ് സ്ഥിതി ചെയ്തിരുന്നത്. ദൃശ്യം പകർത്താൻ ശ്രമിക്കവെ ഇയാളെ കണ്ട പെൺകുട്ടി ബഹളം വച്ചതിനെ തുടർന്ന് ഇയാൾ ഓടി രക്ഷപ്പെട്ടു. പിന്നാലെ പെൺകുട്ടി വിവരം ആശുപത്രി അധികൃതരെ വിവരം അറിയിക്കുകയായിരുന്നു.

തുടർന്ന് പരാതിയുമായി പൊലീസിനെ സമീപിക്കുകയായിരുന്നു. ദൃക്സാക്ഷികളുടെ മൊഴികളുടെ അടിസ്ഥാനത്തിൽ കസ്റ്റഡിയിലെടുത്ത യുവാവിനെ വിദ്യാർത്ഥിനി തിരിച്ചറിഞ്ഞതായും ഇയാളുടെ അറസ്റ്റ് രേഖപ്പെടുത്തിയതായും മുംബൈ പൊലീസ് അറിയിച്ചു.