വിവാഹേതരബന്ധം പുറത്തറിഞ്ഞു; ലോഡ്ജ്മുറിയിൽ യുവതിയെ കൊലപ്പെടുത്തി യുവാവ് ജീവനൊടുക്കി; പൊലീസ് അന്വേഷണം തുടങ്ങി

തിരുപ്പതി: ആന്ധ്രാപ്രദേശിൽ ലോഡ്ജ്മുറിയിൽ യുവതിയെയും യുവാവിനെയും മരിച്ചനിലയിൽ കണ്ടെത്തിയ സംഭവത്തിൽ അന്വേഷണം തുടങ്ങി. നന്തികൊട്ടൂർ സ്വദേശികളായ വിജയ്കുമാർ(35) റുക്സാന(45) എന്നിവരെയാണ് കർണൂലിലെ ലോഡ്ജ്മുറിയിൽ മരിച്ചനിലയിൽ കണ്ടത്. വിവാഹേതര ബന്ധം പുറത്തറിഞ്ഞതോടെ റുക്സാനയെ കൊലപ്പെടുത്തിയശേഷം വിജയ്കുമാർ വിഷംകുത്തിവെച്ച് ജീവനൊടുക്കിയെന്നാണ് പൊലീസിന്റെ പ്രാഥമികനിഗമനം.

റുക്സാനയും വിജയ്കുമാറും വിവാഹേതരബന്ധത്തിലായിരുന്നുവെന്നാണ് പൊലീസ് പറയുന്നത്. വിവാഹിതരായ ഇരുവരും അടുത്തിടെയാണ് അടുപ്പത്തിലായത്. എന്നാൽ, ഇവരുടെ ബന്ധം പുറത്തറിഞ്ഞതോടെ ഇരുകുടുംബങ്ങളിലും പ്രശ്നങ്ങളുണ്ടായി. ഇതാണ് കൊലപാതകത്തിനും ആത്മഹത്യയ്ക്കും കാരണമായതെന്നും പൊലീസ് പറഞ്ഞു.

വെള്ളിയാഴ്ചയാണ് റുക്സാനയും വിജയ്കുമാറും ലോഡ്ജിൽ മുറിയെടുത്തത്. ശനിയാഴ്ച രാവിലെ ഇവരെ പുറത്തുകാണാത്തതിനാൽ ലോഡ്ജ് ജീവനക്കാരന് സംശയം തോന്നി. തുടർന്ന് ഏറെനേരം വാതിലിൽമുട്ടിയെങ്കിലും പ്രതികരണമുണ്ടായില്ല. ഇതോടെ പൊലീസിനെ വിവരമറിയിക്കുകയായിരുന്നു.

പൊലീസ് സ്ഥലത്തെത്തിയശേഷം വാതിൽ തകർത്ത് അകത്തുകടന്നതോടെയാണ് മുറിക്കുള്ളിൽ രണ്ടുപേരെയും ചോരയിൽകുളിച്ചനിലയിൽ കണ്ടത്. യുവതിയുടെ ദേഹമാസകലം മുറിവുകളുണ്ടായിരുന്നു. മുറിയിൽനിന്ന് ഒരു സിറിഞ്ചും പൊലീസ് കണ്ടെടുത്തിട്ടുണ്ട്.

റുക്സാനയെ കുത്തിപരിക്കേൽപ്പിച്ച് കൊലപ്പെടുത്തിയശേഷം വിജയ്കുമാർ വിഷംകുത്തിവെച്ച് ജീവനൊടുക്കിയതാണെന്നാണ് പൊലീസ് കരുതുന്നത്. സംഭവത്തിൽ കർണൂർ ടൗൺ പൊലീസ്(മൂന്ന്) കേസെടുത്ത് അന്വേഷണം ആരംഭിച്ചു.