കോൺഗ്രസിന് സംഭാവന നൽകി രാഹുൽ ഗാന്ധി; ഏറ്റവും കൂടുതൽ ഫണ്ട് ലഭിച്ചത് മഹാരാഷ്ട്രയിൽ നിന്ന്

ന്യൂഡൽഹി: കോൺഗ്രസ് തുടക്കംകുറിച്ച ധനശേഖരത്തിലേക്ക് സംഭാവന നൽകി രാഹുൽ ഗാന്ധി എം പി. രാജ്യത്തിന്റെ ആത്മാവ് വീണ്ടെടുക്കാനും ഐക്യത്തിനും പുരോഗതിക്കും വേണ്ടിയാണ് സംഭാവന നൽകിയതെന്ന് രാഹുൽ പറഞ്ഞു. സംഭാവന അയക്കുന്ന വിഡിയോ അദ്ദേഹം സമൂഹമാധ്യമത്തിൽ പങ്കിട്ടു. എന്നാൽ, തുക വെളിപ്പെടുത്തിയില്ല.

കോൺഗ്രസ് പാർട്ടിക്ക് വേണ്ടി എത്ര പണം സ്വരൂപിക്കുമെന്ന് പാർട്ടി ട്രഷറർ അജയ് മാക്കനോട് രാഹുൽ ഗാന്ധി അന്വേഷിച്ചു, പാർട്ടി ഇതുവരെ തുക നിശ്ചയിച്ചിട്ടില്ലെന്നും എന്നാൽ അത് പ്രതീക്ഷിച്ചതിലും കൂടുതലായിരിക്കുമെന്നും മാക്കൻ പറഞ്ഞു.

ഏത് സംഘടനയാണ് ഏറ്റവും കൂടുതൽ ഫണ്ട് സംഭാവന നൽകിയതെന്ന ചോദ്യത്തിന്, സംസ്ഥാനാടിസ്ഥാനത്തിലാണ് ഫണ്ട് ശേഖരിച്ചതെന്നായിരുന്നു മാക്കന്റെ മറുപടി. എന്നാൽ, ഇതുവരെ ഏറ്റവും കൂടുതൽ സംഭാവന നൽകിയത് മഹാരാഷ്ട്രയാണ്. തൊട്ടുപിന്നിൽ രാജസ്ഥാനും ഉത്തർപ്രദേശുമാണെന്ന് മാക്കൻ രാഹുലിനോട് പറഞ്ഞു.