ഇന്ത്യയിലെ ആദ്യ ബുള്ളറ്റ് ട്രെയിൻ 2026-ൽ സർവീസ് തുടങ്ങും; സ്വപ്ന പദ്ധതിയെക്കുറിച്ച് പ്രഖ്യാപനവുമായി റെയിൽവേ മന്ത്രി
അഹ്‌മദാബാദ്: ഇന്ത്യയിലെ ആദ്യത്തെ ബുള്ളറ്റ് ട്രെയിൻ 2026 മുതൽ പ്രവർത്തനം തുടങ്ങുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ്. സൂറത്ത് മുതൽ ബിലിമോറ വരെയാണ് ആദ്യ ബുള്ളറ്റ് ട്രെയിൻ സർവീസ് നടത്താൻ തീരുമാനിച്ചിരിക്കുന്നത്. ഗാന്ധിനഗറിൽ നടക്കുന്ന 2024-ലെ വൈബ്രന്റ് ഗുജറാത്ത് സമ്മിറ്റിൽ വച്ചായിരുന്നു സ്വപ്ന പദ്ധതിയെക്കുറിച്ചുള്ള മന്ത്രിയുടെ പ്രഖ്യാപനം.
'2026-ൽ സൂറത്തിനും ബിലിമോറിനുമിടയിൽ ആദ്യ ബുള്ളറ്റ് ട്രെയിൻ ഓടിക്കാനാണ് ഞങ്ങൾ പദ്ധതിയിടുന്നത്', സമ്മിറ്റിൽ അശ്വിനി വൈഷ്ണവ് പറഞ്ഞു. ബുള്ളറ്റ് ട്രെയിനിന്റെ 270 കിലോമീറ്ററോളം നീണ്ട അടിത്തറയുടെ പണികൾ ഇതിനോടകം പൂർത്തിയായിട്ടുണ്ട്. തീരുമാനിച്ചതു പ്രകാരം പദ്ധതിയുടെ പണികൾ പുരോഗമിക്കുന്നുണ്ടെന്നാണ് ഇത് സൂചിപ്പിക്കുന്നതെന്നും കേന്ദ്രമന്ത്രി പറഞ്ഞു.
ഗുജറാത്ത്, മഹാരാഷ്ട്ര, ദാദ്ര, നാഗർ ഹവേലി എന്നീ സ്ഥലങ്ങളിലൂടെ കടന്നുപോകുന്ന ബുള്ളറ്റ് ട്രെയിൻ പ്രൊജക്ടിന് ആവശ്യമായ മുഴുവൻ സ്ഥലവും ഏറ്റെടുത്തതായി റെയിൽവേ മന്ത്രാലയം ജനുവരി എട്ടിന് പ്രഖ്യാപിച്ചിരുന്നു.
