യൂത്ത് കോൺഗ്രസ് പ്രവർത്തകരെ കേന്ദ്രീകരിച്ച് പൊലീസ് അന്വേഷിക്കുന്നുവെന്ന വിവരം പുറത്തു വിട്ടത് സിപിഎം പ്രാദേശിക നേതാക്കൾ; മുഖ്യമന്ത്രിക്കെതിരെ പ്രതിഷേധമുണ്ടായ വിമാനത്തിൽ ഉണ്ടായിരുന്ന ആൾ മേനംകുളത്തുകാരനെ കൊണ്ട് എകെജി സെന്റർ ആക്രമിച്ചുവെന്നത് വെറും പ്രാചരണമോ? അക്രമി എത്തിയ സ്‌കൂട്ടർ ഉടമയേയും അവർ കണ്ടെത്തി! എകെജി സെന്ററിൽ സത്യം പുറത്തു വരുമോ?
തിരുവനന്തപുരം: സിപിഎം ആസ്ഥാനമായ എകെജി സെന്ററിലേക്ക് സ്‌ഫോടകവസ്തു എറിഞ്ഞ കേസിൽ പ്രതിയെക്കുറിച്ച് പൊലീസിന് സൂചന ലഭിച്ചതായി പ്രചാരണത്തിന് പിന്നിൽ സിപിഎം കേന്ദ്രങ്ങളെന്ന് മനോരമ. സിപിഎമ്മുമായി ബന്ധപ്പെട്ട കേന്ദ്രങ്ങളാണ് ഈ പ്രചാരണം നടത്തുന്നതെങ്കിലും പൊലീസ് ഇക്കാര്യം സ്ഥിരീകരിക്കാൻ തയാറായിട്ടില്ലെന്ന് മനോരമ റിപ്പോർട്ട് ചെയ്യുന്നു.
കഴക്കൂട്ടം, മേനംകുളം സ്വദേശികളായ 2 യൂത്ത് കോൺഗ്രസ് പ്രവർത്തകരെ കേന്ദ്രീകരിച്ച് പൊലീസ് അന്വേഷിക്കുന്നുവെന്നാണ് സിപിഎം പ്രാദേശിക നേതാക്കൾ ഇന്നലെ പുറത്തുവിട്ട വിവരം. പ്രചാരണം ഇങ്ങനെ: മുഖ്യമന്ത്രിക്കെതിരെ വിമാനത്തിലുണ്ടായ പ്രതിഷേധത്തിന്റെ ആലോചനയിൽ കഴക്കൂട്ടം സ്വദേശിയായ യൂത്ത് കോൺഗ്രസ് പ്രവർത്തകൻ പങ്കെടുത്തിരുന്നു. ഇയാൾ മേനംകുളം സ്വദേശിയെക്കൊണ്ട് കൃത്യം ചെയ്യിച്ചു. അക്രമി എത്തിയ മോഡലിലുള്ള ചുവന്ന സ്‌കൂട്ടർ ഇവരിൽ ഒരാളുടെ ബന്ധുവിനുണ്ട്. അതേസമയം, ഈ സംശയങ്ങൾ സ്ഥിരീകരിക്കാനുള്ള വിവരങ്ങൾ ഒന്നും ലഭിച്ചിട്ടില്ലെന്നാണ് പൊലീസ് പറയുന്നതെന്ന് മനോരമ റിപ്പോർട്ട് ചെയ്യുന്നു.
അതിനിടെ പ്രതിപക്ഷ നേതാവിനുൾപ്പെടെ ആക്രമണ ഗൂഢാലോചനയിൽ പങ്കുണ്ടെന്ന ആക്ഷേപവുമായി ഡിവൈഎഫ്‌ഐ രംഗത്തെത്തി. ആക്രമണത്തിൽ പങ്കില്ലെന്ന നിലപാട് പ്രതിപക്ഷ നേതാവ് വി.ഡി.സതീശൻ ആവർത്തിച്ചു. കട്ടവനെ കിട്ടിയില്ലെങ്കിൽ കിട്ടിയവനെ പ്രതിയാക്കാനാണ് പൊലീസ് ശ്രമമെന്ന് കെപിസിസി അധ്യക്ഷൻ കെ സുധാകരനും ആരോപിച്ചു. ഏതായാലും ഈ വിഷയം വീണ്ടും രാഷ്ട്രീയ ചർച്ചയാകും. എ.കെ.ജി സെന്റർ ആക്രമിച്ചത് കഴക്കൂട്ടം മേനംകുളത്തുള്ള സംഘമെന്ന നിലപാടിൽ ക്രൈംബ്രാഞ്ച്. തെളിവ് ശേഖരണം തുടരുന്നതായും ക്രൈംബ്രാഞ്ച് വിശദീകരിക്കുന്നുവെന്ന് ഏഷ്യാനെറ്റ് വാർത്ത നൽകിയിരുന്നു. പ്രതിയെ തിരിച്ചറിഞ്ഞതായി സൂചനയെന്ന് റിപ്പോർട്ട് നേരത്തെ പുറത്തു വന്നിരുന്നു. പ്രതി വിദേശത്തേക്ക് കടന്നതായും വിവരമുണ്ട്. മീഡിയാ വണ്ണാണ് ഈ വാർത്ത പുറത്തു വിട്ടത്.
പ്രതിപക്ഷ യുവജന സംഘടനയുടെ നേതാവാണ് സൂത്രധാരനെന്ന് പൊലീസ് പറയുന്നു. ഇയാൾ പൊലീസ് നിരീക്ഷണത്തിലാണ്. മുഖ്യമന്ത്രിക്കെതിരെ പ്രതിഷേധം നടന്ന വിമാനത്തിലും ഇയാൾ ഉണ്ടായിരുന്നെന്ന് അന്വേഷണ സംഘം പറയുന്നുവെന്ന് മീഡിയാ വൺ വിശദീകരിക്കുന്നു. ഇതിന് പിന്നാലെയാണ് മേനംകുളത്തെ സംഘത്തിലേക്ക് അന്വേഷണം എത്തിയതായി ക്രൈംബ്രാഞ്ച് പറയുന്നത്. സംശയിക്കുന്ന ചിലരുടെ മൊഴികളിൽ സംശയമുണ്ടെന്ന് ക്രൈംബ്രാഞ്ച് പറയുന്നതായി ഏഷ്യാനെറ്റ് ന്യൂസും പറയുന്നു.
ആക്രമണം പദ്ധതിയിട്ടതും അതിന് വാഹനമടക്കം എത്തിച്ചതും മേനംകുളത്തുകാരനാണെന്ന് ക്രൈംബ്രാഞ്ച് സംഘം കണ്ടെത്തിയിട്ടുണ്ട് എന്ന തരത്തിലായിരുന്ന വാർത്ത. എ.കെ.ജി സെന്റർ ആക്രമണ കേസ് പ്രതിയെ പിടികൂടാനാവാത്തതിൽ പൊലീസിനു നേരെ വലിയ വിമർശനം ഉയർന്നിരുന്നു. പ്രതിയെ കൃത്യമായി തിരിച്ചറിഞ്ഞ സാഹചര്യത്തിൽ ഇനി കൂടുതൽ തെളിവുകൾ ശേഖരിക്കുന്ന ഘട്ടത്തിലാണ് ക്രൈംബ്രാഞ്ച് സംഘമുള്ളത് എന്ന് മീഡിയാ വൺ വിശദീകരിക്കുന്നു. മുഖ്യമന്ത്രിയുടെ വിമാന പ്രതിഷേധത്തിൽ ഇയാൾ ഉണ്ടായിരുന്നു. ഇയാളെ കേന്ദ്രീകരിച്ചാണ് അന്വേഷണം. മുഖ്യമന്ത്രിയെ ആക്രമിച്ച കേസിലെ പ്രതിപട്ടികയിൽ ഇയാൾ ഉൾപ്പെടുത്തിയിരുന്നില്ല. രഹസ്യമായാണ് അന്വേഷണം നടക്കുന്നതെന്നും വാർത്ത വന്നു.
വയനാട്ടിലെ രാഹുൽ ഗാന്ധിയുടെ ഓഫീസ് ആക്രമണത്തിനു പകരമായുള്ള ഗൂഢാലോചനയാണ് എകെജി സെന്ററിലെന്നാണ് വാദം. രഹസ്യ അന്വേഷണം ആയതുകൊണ്ട് തന്നെ പ്രതികളുടെ വിവരങ്ങൾ പുറത്തു വിട്ടിട്ടില്ല. ആക്രമണത്തിനു പിന്നാലെ ആരോപണ- പ്രത്യാരോപണങ്ങളുമായി ഭരണ-പ്രതിപക്ഷ കക്ഷികൾ നിയമസഭയിലടക്കം രംഗത്തെത്തിയിരുന്നു. കൂടുതൽ തെളിവുകൾ ശേഖരിച്ച ശേഷം അറസ്റ്റ് അടക്കമുള്ള നടപടികളിലേക്ക് കടക്കുമെന്നാണ് വിവരം. ജൂൺ 30നാണ് എ.കെ.ജി സെന്ററിനു നേരെ ആക്രമണം ഉണ്ടായത്.
ബോംബല്ല, പടക്കം പോലുള്ള വസ്തുവാണ് എ.കെ.ജി സെന്ററിന് നേരെയെറിഞ്ഞതെന്ന് സിറ്റി പൊലീസ് കമ്മീഷണർ വ്യക്തമാക്കിയിരുന്നു. പ്രാഥമിക അന്വേഷണത്തിലാണ് പടക്കം പോലുള്ള വസ്തുവാണെന്ന് മനസിലായത്. കുന്നുകുഴി ഭാഗത്ത് നിന്ന് ബൈക്കിലെത്തിയ ആളാണ് പടക്കം എറിഞ്ഞതെന്ന് സി.സി.ടി.വി ദൃശ്യങ്ങളിൽ വ്യക്തമായിരുന്നു. വാഹനം നിർത്തിയ ശേഷം കൈയിലുണ്ടായിരുന്ന ബാഗിൽ നിന്ന് സ്ഫോടക വസ്തു എടുത്തെറിയുന്നത് ദൃശ്യത്തിലുണ്ട്. എറിഞ്ഞ ശേഷം തിരിച്ച് തിരിച്ച് കുന്നുകുഴി ഭാഗത്തേക്ക് വാഹനം ഓടിച്ച് പോവുകയും ചെയ്തു. ദുരൂഹമായി തുടരുന്ന എ.കെ.ജി സെന്റർ ആക്രമണക്കേസിൽ തട്ടുകടക്കാരനെ കേന്ദ്രീകരിച്ചുള്ള അന്വേഷണം ക്രൈംബ്രാഞ്ച് അവസാനിപ്പിച്ചിരുന്നു.
രണ്ടാഴ്ച നീണ്ട അന്വേഷണത്തിനൊടുവിലും സംശയനിഴലിലായിരുന്ന ഇയാൾക്കെതിരെ തെളിവുകളൊന്നും ലഭിക്കാത്ത സാഹചര്യത്തിലാണ് ഇയാൾക്ക് സംഭവവുമായി ബന്ധമില്ലെന്ന് ക്രൈംബ്രാഞ്ച് സ്ഥിരീകരിച്ചത്. ഇക്കഴിഞ്ഞ ജൂൺ 30നായിരുന്നു പൊലീസ് കാവലുണ്ടായിരുന്ന എ.കെ.ജി സെന്ററിന് നേരെ സ്‌കൂട്ടറിൽ ഹെൽമറ്റും മാസ്‌കും ധരിച്ചെത്തിയ അക്രമി പടക്കമെറിഞ്ഞത്. സംഭവത്തിൽ ലോക്കൽ പൊലീസും പിന്നീട് ക്രൈംബ്രാഞ്ചും നടത്തിയ അന്വേഷണം ആഴ്ചകൾ പിന്നിട്ടിട്ടും പ്രതിയിലേക്ക് എത്താത്തത് രാഷ്ട്രീയ ആരോപണങ്ങൾക്കും വിവാദങ്ങൾക്കും ഇടയാക്കിയിരുന്നു.ആക്രമണത്തിന് പിന്നിൽ സിപിഎം ആയതിനാലാണ് പ്രതികളെ പിടികൂടാത്തതെന്ന ആക്ഷേപം പ്രതിപക്ഷം ഉന്നയിച്ചിരുന്നു. ഈ സമയത്ത് അതുവഴി സ്‌കൂട്ടറിൽ സഞ്ചരിച്ച തട്ടുകടക്കാരനും സിപിഎം പ്രാദേശിക നേതാവുമായി ബന്ധമുണ്ടെന്നായിരുന്നു ആരോപണം.
രാജാജി നഗർ സ്വദേശിയായ തട്ടുകടക്കാരനെ പൊലീസ് ആദ്യം കസ്റ്റഡിയിലെടുത്ത് ചോദ്യം ചെയ്ത് വിട്ടയച്ചിരുന്നു. നഗരസഭാ കൗൺസിലറായിരുന്ന സിപിഎം യുവനേതാവ് ഇടപെട്ടാണ് ഇയാളെ വിട്ടയച്ചതെന്ന ആരോപണങ്ങളും പ്രതിപക്ഷം ഉയർത്തി.തട്ടുകടയിലേക്ക് വെള്ളം എടുക്കാൻ എത്തിയതാണെന്നാണ് ഇയാൾ പൊലീസിനോട് പറഞ്ഞത്. പൊലീസിൽ നിന്ന് അന്വേഷണം ഏറ്റെടുത്ത ക്രൈംബ്രാഞ്ചും പ്രതിയല്ലെന്ന് കണ്ടെത്തിയതും ദുരൂഹമാണ്.
