കോൺഗ്രസിന്റെ പാലാരിവട്ടം പൊലീസ് സ്‌റ്റേഷൻ ഉപരോധം റിപ്പോർട്ടു ചെയ്യവേ മറുനാടൻ മലയാളി ക്യാമറാമാന് മർദ്ദനം; ഫോൺ പിടിച്ചുവാങ്ങി മർദ്ദിച്ചത് സ്വകാര്യ ബസ് ഡ്രൈവറായ യൂത്ത് കോൺഗ്രസ് നേതാവ് പി എൻ നവാസ്; പ്രതിഷേധക്കാരായ സ്വന്തം പാർട്ടിക്കാരോടും കയർത്ത് യൂത്ത് കോൺഗ്രസ് മണ്ഡലം പ്രസിഡന്റ്
കൊച്ചി: പാലാരിവട്ടം പൊലീസ് സ്‌റ്റേഷൻ ഉപരോധിച്ചു കൊണ്ടുള്ള കോൺഗ്രസ് പ്രതിഷേധം റിപ്പോർട്ടു ചെയ്യവേ മറുനാടൻ മലയാളി ക്യാമറാമാന് മർദ്ദനം. മറുനാടൻ മലയാളി കൊച്ചി ബ്യൂറോയിലെ ക്യാമറാമാൻ എസ് ദിലീപിനാണ് മർദ്ദനമേറ്റത്. യൂത്ത് കോൺഗ്രസ് തൃക്കാക്കര വെസ്റ്റ് മണ്ഡലം പ്രസിഡന്റായ പി എൻ നവാസും സംഘവും ചേർന്നാണ് മർദ്ദിച്ചത്. ഇയാൾ സമരത്തിൽ പങ്കെടുക്കുകയായിരുന്നില്ല. സ്വകാര്യ ബസിന്റെ ഡ്രൈവറായിരുന്നു.
കോൺഗ്രസിന്റെ പാലാരിവട്ടം പൊലീസ് സ്‌റ്റേഷൻ ഉപരോധത്തിനിടെ പ്രവർത്തകർ റോഡ് ഉപരോധിക്കുകയും ചെയ്തിരുന്നു. ഈ സമയം സ്വകാര്യ ബസുമായി നവാസ് എത്തി. ഗതാഗത തടസം ഉണ്ടായപ്പോൾ കോൺഗ്രസ് പ്രവർത്തകരുമായി വാക്കേറ്റമുണ്ടായി. ഈ ദൃശ്യം പകർത്താൻ ശ്രമിക്കവേയാണ് ദിലീപിനെ ബസ് ഡ്രൈവറായ നവാസ് മർദ്ദിക്കുകയും മൊബൈൽ ഫോൺ പിടിച്ചു വാങ്ങുകയും ചെയ്തത്. പ്രതിഷേധക്കാർ ഇയാൾ ഓടിച്ച ബസ് തടഞ്ഞപ്പോൾ ഉണ്ടായ വാക്കേറ്റം ചിത്രീകരിച്ചതോടെയാണ് നവാസ് കുപിതനായി ആക്രമിച്ചത്.
സംഭവത്തിൽ ദിലീപ് പൊലീസിൽ പരാതി നൽകിയിട്ടുണ്ട്. തന്റെ ജോലി ചെയ്യുകയായിരുന്ന മാധ്യമപ്രവർത്തകനെ പ്രകോപനം കൂടാതെയാണ് ഇയാളും കൂട്ടാളികളും മർദ്ദിച്ചത്. കോൺഗ്രസ് പ്രവർത്തകർക്ക് നേരെയും മാധ്യമപ്രവർത്തകർക്ക് നേരെയും അതിക്രമം കാട്ടിയ ഇയാൾക്കെതിരെ നടപടി എടുക്കണമെന്ന് ഡിസിസി പ്രസിഡന്റ്ിനും പരാതി നല്കിയിട്ടുണ്ട്.
എറണാകുളത്തെ നവകേരള യാത്രയ്ക്കിതെ മുഖ്യമന്ത്രിയെ കരിങ്കൊടി കാണിച്ചതിന് കസ്റ്റഡിയിൽ എടുത്തവരെ വിടാത്തതിനെ തുടർന്നായിരുന്നു പാലാരിവട്ടം പൊലീസ് സ്റ്റേഷനിൽ കോൺഗ്രസ് പ്രതിഷേധം ഉണ്ടായത്. എം പി ഹൈബി ഈഡൻ, എംഎൽഎമാരായ ഉമ തോമസ്, ടി ജെ വിനോദ് എന്നിവർ പ്രവർത്തകർക്കൊപ്പം പ്രതിഷേധത്തിൽ പങ്കുചേർന്നിരുന്നു. പ്രതിഷേധത്തിനിടെ പ്രവർത്തകർ റോഡ് തടഞ്ഞു പ്രതിഷേധിച്ചു. ഇതിനിടെയാണ് നവാസിന്റെ നേതൃത്വത്തിൽ അക്രമം ഉണ്ടായതും. തോപ്പ് സ്വദേശിയാണ് നവാസ്.
