രാത്രിയിൽ ആളൊഴിഞ്ഞ സ്ഥലത്ത് ഓട്ടോ നിർത്തി യുവതിയെ പീഡിപ്പിച്ചു; പോക്‌സോ ഉൾപ്പെടെ മറ്റ് ഒൻപത് കേസുകളിലെ പ്രതിയായ ഡ്രൈവർ അറസ്റ്റിൽ; പിടിയിലായത് മുട്ടത്തറ സ്വദേശി
തിരുവനന്തപുരം: വീട്ടിലേക്കുള്ള യാത്രയ്ക്കിടെ യുവതിയെ ഓട്ടോയിൽവച്ച് പീഡിപ്പിച്ച കേസിൽ ഓട്ടോ ഡ്രൈവർ അറസ്റ്റിൽ. മുട്ടത്തറ സ്വദേശി മുഹമ്മദ് ജിജാസിനെയാണ് തിരുവനന്തപുരം ഫോർട്ട് പൊലീസ് പിടികൂടിയത്.
അട്ടക്കുളങ്ങരയിൽ നിന്ന് മുപ്പത്തിയഞ്ചുകാരിയായ യുവതി ഓട്ടോ വിളിച്ച് മുട്ടത്തറയിലെ വീട്ടിലേക്ക് പോകും വഴിയായിരുന്നു പീഡനം. വെള്ളിയാഴ്ച രാത്രിയാണ് കേസിനാസ്പദമായ സംഭവം നടന്നത്. അട്ടക്കുളങ്ങരയിൽ നിന്ന് മുട്ടത്തറയിലെ വീട്ടിലേക്ക് ജിജാസിന്റെ ഓട്ടോയിലാണ് പരാതിക്കാരി യാത്ര ചെയ്തത്. എന്നാൽ, ആളൊഴിഞ്ഞ സ്ഥലത്ത് ഓട്ടോ നിർത്തിയ ഇയാൾ യുവതിയെ ഭീഷണിപ്പെടുത്തി പീഡിപ്പിക്കുകയായിരുന്നു.
അതിക്രമത്തിനിരയായ യുവതി തിരുവനന്തപുരം ജനറൽ ആശുപത്രിയിൽ ചികിത്സ തേടി. ഇവിടെ നിന്ന് വിവരങ്ങൾ ലഭിച്ച പൊലീസ് പിന്നീട് പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്യുകയായിരുന്നു.
ആളൊഴിഞ്ഞ സ്ഥലത്ത് ഓട്ടോ നിർത്തിയ ഡ്രൈവർ ഭീഷണിപ്പെടുത്തി പീഡിപ്പിക്കുകയായിരുന്നു. പോക്‌സോ ഉൾപ്പെടെ മറ്റ് ഒൻപത് കേസുകളിൽ പ്രതിയാണ് മുഹമ്മദ് ജിജാസ്. ഞായറാഴ്ച രാവിലെയാണ് ഓട്ടോഡ്രൈവറായ ജിജാസ് അറസ്റ്റിലായത്. പ്രതിയെ തെളിവെടുപ്പിന് കൊണ്ടുപോയി.
