സോഷ്യൽമീഡിയയിലൂടെ പരിചയം; പലതവണ ലൈംഗികമായി പീഡിപ്പിച്ചു; എതിർത്താൽ ജോലിയിൽ നിന്ന് പുറത്താക്കുമെന്ന് ഭീഷണിപ്പെടുത്തി; മെക്‌സിക്കൻ വനിതാ ഡി.ജെയെ പീഡിപ്പിച്ച മാനേജർ അറസ്റ്റിൽ
മുംബൈ: മുംബൈയിൽ മെക്‌സിക്കൻ സ്വദേശിനിയായ ഡിസ്‌ക് ജോക്കി (ഡി.ജെ)യെ ഭീഷണിപ്പെടുത്തി നിരന്തരം ലൈംഗികമായി പീഡിപ്പിച്ച മാനേജർ അറസ്റ്റിൽ. 31കാരിയായ യുവതിയെയാണ് പീഡനത്തിന് ഇരയാക്കിയത്. സംഭവത്തിൽ ഡി.ജെ കൂടിയായ 35കാരനാണ് അറസ്റ്റിലായത്. ഇരയായ യുവതി കഴിഞ്ഞയാഴ്ച നൽകിയ പരാതിയിലാണ് നടപടിയെന്ന് ബാന്ദ്ര പൊലീസ് പറഞ്ഞു.
2019 മുതൽ പല സ്ഥലങ്ങളിലെത്തിച്ച് ഇയാൾ തന്നെ ബലാത്സംഗം ചെയ്‌തെന്ന് പരാതിയിൽ പറയുന്നു. നിലവിൽ മുംബൈയിൽ താമസിക്കുന്ന യുവതി 2017ൽ സോഷ്യൽമീഡിയയിലൂടെയാണ് പ്രതിയുമായി പരിചയപ്പെടുന്നത്. സൗഹൃദത്തിലായ ശേഷം, 2019 ജൂലൈയിൽ പ്രതി ഇയാളുടെ വീട്ടിൽ വച്ച് തന്നെ ലൈംഗികമായി പീഡിപ്പിച്ചു. അതിനു ശേഷം പലതവണ ബലാത്സംഗം തുടരുകയായിരുന്നെന്നും പരാതിയിൽ ചൂണ്ടിക്കാട്ടുന്നു.
വിസമ്മതിച്ചാൽ ജോലിയിൽ നിന്ന് പുറത്താക്കുമെന്ന് ഭീഷണിപ്പെടുത്തി പ്രതി തന്നെ ലൈംഗികബന്ധത്തിന് നിർബന്ധിക്കാറുണ്ടായിരുന്നുവെന്നും ഈ ദൃശ്യങ്ങൾ പകർത്തി പിന്നീട് ഇതുകാട്ടി ബ്ലാക്ക് മെയിൽ ചെയ്തതായും യുവതി പറഞ്ഞതായി പൊലീസ് ഉദ്യോഗസ്ഥൻ വ്യക്തമാക്കി.
പ്രതി തനിക്ക് അശ്ലീല ചിത്രങ്ങൾ അയച്ചുതരാറുണ്ടെന്നും യുവതിയുടെ പരാതിയിൽ പറയുന്നു. 2020ൽ മറ്റൊരു സ്ത്രീയെ വിവാഹം കഴിച്ചിട്ടും അയാൾ ഈ യുവതിക്ക് അശ്ലീല സന്ദേശങ്ങളും വീഡിയോകളും അയയ്ക്കുകയും ലൈംഗിക ആവശ്യം ഉന്നയിക്കുകയും ചെയ്തു- പൊലീസുകാരൻ പറഞ്ഞു.
പരാതിയുടെ അടിസ്ഥാനത്തിൽ, ഐപിസി 376 (ബലാത്സംഗം), 377 (പ്രകൃതിവിരുദ്ധ ലൈംഗികത), 354 (സ്ത്രീത്വത്തെ അപമാനിക്കാനുള്ള ബലപ്രയോഗം), 506 (ഭീഷണിപ്പെടുത്തൽ) എന്നീ വകുപ്പുകൾ പ്രകാരം പൊലീസ് കേസെടുത്തു. പ്രതിക്കെതിരെ കൂടുതൽ അന്വേഷണം നടക്കുകയാണെന്നും ഉദ്യോഗസ്ഥൻ കൂട്ടിച്ചേർത്തു.
