കണ്ണൂർ: മസ്‌കറ്റിൽനിന്ന് സൗദി വഴി നാട്ടിലേക്ക് യാത്രതിരിച്ച ന്യൂമാഹി സ്വദേശിയായ യുവാവിനെ കാണാതായെന്ന ബന്ധുക്കളുടെ പരാതിയിൽ ഇതുവരെയും പരിഹാരമായില്ല. ന്യൂമാഹി പെരിങ്ങാടി പുതിയ റോഡ് നയറസിലെ വള്ളിൽ ആബുട്ടിയെയാണ് (34) ദുരൂഹ സാഹചര്യത്തിൽ റിയാദിലെ കിങ് ഖാലിദ് വിമാനത്താവളത്തിൽ കാണാതായത്. നാട്ടിലേക്ക് പുറപ്പെട്ടുവെന്ന് അറിയിച്ചെങ്കിലും അബൂട്ടി ഒരുമാസമായിട്ടും വീട്ടിലെത്തിയില്ല.

മസ്‌കറ്റിലെ വാദി ഖബീർ എന്ന സ്ഥലത്ത് ജോലിയുള്ള ആബൂട്ടി നാട്ടിലേക്കുള്ള യാത്രയിൽ ഡിസംബർ രണ്ടിന് ഒമാനിൽനിന്ന് സൗദിയിലേക്ക് പോകുന്നതായി മാതാവ് ഷാഹിദയെ അറിയിച്ചിരുന്നു. റോഡ് വഴിയായിരുന്നു യാത്ര. റിയാദിൽനിന്ന് കോഴിക്കോട്ടേക്കുള്ള എയർ ഇന്ത്യ എക്സ്പ്രസിന് ടിക്കറ്റും എടുത്തതായി കോപ്പിസഹിതം മാതാവിനെ വിവരം അറിയിച്ചു. തൊട്ടടുത്ത ദിവസം ഷാഹിദ, ആബൂട്ടിയുടെ ഭാര്യയും മക്കളുമൊത്ത് മകനെ സ്വീകരിക്കാൻ കോഴിക്കോട് വിമാനത്താവളത്തിൽലെത്തി.

റിയാദിൽനിന്നുള്ള വിമാനം എത്തി യാത്രക്കാർ മുഴുവൻ പുറത്തെത്തിയിട്ടും ആബൂട്ടി മാത്രം വന്നില്ല. മൂന്നുമണിക്കൂർ കാത്തിരുന്നിട്ടും കാണാതായതോടെ വിമാനത്താവള ഓഫീസിൽ തിരക്കിയപ്പോൾ അങ്ങനെ ഒരാൾ റിയാദിൽനിന്നുള്ള വിമാനത്തിൽ ഉണ്ടായിരുന്നില്ലെന്നാണ് മറുപടി കിട്ടിയത്.

1 X 322 നമ്പർ ടിക്കറ്റിൽ റിയാദിൽനിന്ന് ബോർഡിങ് പാസ് എടുത്തതാണെങ്കിലും എമിഗ്രേഷൻ കഴിഞ്ഞിരുന്നില്ലെന്ന് തുടരന്വേഷണത്തിൽ അറിഞ്ഞു. റിയാദിലെ കിങ് ഖാലിദ് വിമാനത്താവളത്തിൽ ആബൂട്ടിക്ക് എന്തുസംഭവിച്ചുവെന്ന് വിവരമില്ല. മകനെ കാണാതായ വിഷയത്തിൽ ഇടപെടണമെന്ന് കാണിച്ച് മാതാവും ബന്ധുക്കളും ഇന്ത്യൻ എംബസി, മുഖ്യമന്ത്രി പിണറായി വിജയൻ, കേന്ദ്ര വിദേശകാര്യ സഹമന്ത്രി വി. മുരളീധരൻ, നിയമസഭാ സ്പീക്കർ എ.എൻ. ഷംസീർ, കെ. മുരളീധരൻ എംപി., കേരള ഡി.ജി.പി. എന്നിവർക്ക് നിവേദനം നൽകിയിരുന്നു.

റിയാദിൽ നിന്നും ബോർഡിങ് പാസെടുത്താണെങ്കിലും എമിഗ്രേഷൻ കഴിഞ്ഞിരുന്നില്ലെന്ന് തുടർ അന്വേഷണത്തിൽ വ്യക്തമാവുകയായിരുന്നു. റിയാദിലെ കിങ് ഖാലിദ് വിമാന താവളത്തിൽ അബുട്ടിക്ക് എന്തു സംഭവിച്ചിരുന്നുവെന്ന് ഇതുവരെ ഒരു വിവരവുമില്ലെന്നാണ് ബന്ധുക്കൾ പറയുന്നത്. മകനെ കാണാതായ വിഷയത്തിൽ ഇടപെടണമെന്ന് ആവശ്യപ്പെട്ടു ഉമ്മയും ബന്ധുക്കളും ഇന്ത്യൻ എംബസിക്ക് കത്തു നൽകിയിട്ടുണ്ട്.

സംഭവത്തിൽ ദുരൂഹത തുടരവെ സൗദി ഭരണകൂടവുമായി ബന്ധപ്പെട്ടുള്ള അന്വേഷണത്തിനാണ് ബന്ധുക്കൾ ആവശ്യപ്പെടുന്നത്. യുവാവിനെ സൗദി പൊലിസ് അറസ്റ്റു ചെയ്തതായി നേരത്തെ അഭ്യൂഹം പരന്നിരുന്നുവെങ്കിലും പിന്നീട് അതു തെറ്റാണെന്ന് തെളിയുകയായിരുന്നു.