കൊച്ചി: കേരളത്തിൽനിന്നു കാണാതായ ആപ്പിൾ എയർപോഡ് എക്‌സ് പ്ലാറ്റ്‌ഫോമിന്റെ സഹായത്തോടെ ഗോവയിൽ കണ്ടെത്തിയത് സാങ്കേതിക സഹായത്തോടെ നടത്തിയ അന്വേഷണത്തിൽ. അവധിയാഘോഷിക്കാൻ കേരളത്തിലെത്തിയ മുംബൈയിലെ സോഷ്യൽ മീഡിയ മാർക്കറ്റിങ് വിദഗ്ധൻ നിഖിൽ ജെയിനിന്റെ പുത്തൻ എയർപോഡാണു നഷ്ടമായത്.

ബസിൽ വച്ചാണ് നഷ്ടമായത്. 25,000നു മുകളിൽ വിലയുള്ള ഉപകരണത്തെ 'ഫൈൻഡ് മൈ ഫീച്ചർ' സംവിധാനത്തിലൂടെ നിരീക്ഷിച്ചപ്പോൾ 40 കിലോമീറ്റർ അകലെയുള്ള ഹോട്ടലിൽ ഉണ്ടെന്നു കണ്ടെത്തി. കേരള പൊലീസിന്റെ സഹായത്തോടെ അവിടെ എത്തിയെങ്കിലും മുറി തിരിച്ചറിയാൻ കഴിഞ്ഞില്ല. സ്വകാര്യത പരിഗണിച്ചു പരിശോധിക്കാൻ ഹോട്ടൽ അധികൃതരും തയാറായില്ല. ഇതോടെ ആ വഴി അടഞ്ഞു. എങ്കിലും അന്വേഷണവുമായി മുമ്പോട്ട് പോയി.

എയർപോഡ് മംഗളൂരു വഴി ഗോവയ്ക്ക് നീങ്ങുന്നതായി കണ്ടു. സൗത്ത് ഗോവയിലെ അൽവാരോ ഡി ലെയോള ഫുർട്ടാഡോ റോഡിലാണെന്നും കണ്ടെത്തി. ഇതാണ് നിർണ്ണായകമായത്. ഉടൻ തന്നെ എയർപോഡ് കൈവശമുള്ളയാൾ ഇവിടെയുണ്ടെന്നും കണ്ടെത്താൻ സഹായിക്കണമെന്നും അഭ്യർത്ഥിച്ച് നിഖിൽ എക്‌സ് പ്ലാറ്റ്‌ഫോമിൽ പോസ്റ്റിട്ടു. ഈ പോസ്റ്റ് വൈറലായി. ഇതോടെ അന്വേഷണം സോഷ്യൽ മീഡിയയിലെ സുഹൃത്തുക്കൾ ഏറ്റെടുത്തു.

ഇതു സുഹൃത്തുക്കളും ഫോളോവേഴ്‌സും പങ്കിട്ടതോടെ അന്വേഷണം "എക്‌സ്" ഏറ്റെടുത്തു. 12 ലക്ഷം പേരാണ് ആദ്യത്തെ പോസ്റ്റ് കണ്ടത്. നൂറുകണക്കിനു മറുപടികളും കിട്ടി. ലൊക്കേഷൻ കാണിക്കുന്ന കൃത്യമായ വീടിന്റെ ചിത്രം റീട്വീറ്റായെത്തുകയും ചെയ്തു. ഇതും നിർണ്ണായകമായി. ഇതോടെ മോഷ്ടാവിനെ തിരിച്ചറിഞ്ഞു. അയാളുമായും ചർച്ച നടത്തി. ഇതോടെ എയർപോഡ് പൊലീസ് സ്റ്റേഷനിൽ ഏൽപ്പിക്കാമെന്ന് അതെടുത്തയാൾ സമ്മതിച്ചു.

മർഗോവ പൊലീസ് സ്റ്റേഷനിൽനിന്നു നിഖിലിന്റെ സുഹൃത്ത് സങ്കേത് അത് ഏറ്റുവാങ്ങി. എടുത്തതാരെന്നു വെളിപ്പെടുത്താൻ നിഖിൽ ആഗ്രഹിക്കുന്നില്ല. മോഷ്ടിച്ചതല്ലെന്നും നഷ്ടമായ എയർപോഡ് ഇയാൾക്ക് കിട്ടുകയായിരുന്നുവെന്നുമാണ് സൂചന. ഏതായാലും അന്വേഷണത്തിൽ എക്‌സ് പ്ലാറ്റ് ഫോം നടത്തിയ ഇടപെടൽ പൊലീസിനേയും ഞെട്ടിച്ചു.